اباي اۋدانىنا قاراستى ىنتىماق-2 شاعىن اۋدانىنىڭ باتىس بولىگىندە 2 071 ءۇي ورنالاسقان. ينفراقۇرىلىممەن قامتۋ ماسەلەسى وزەكتى. قازىرگى تاڭدا گاز، سۋ، جول، جارىقتىڭ جىرىن شەشۋ ءۇشىن قۇرىلىس جۇمىستارى قارقىندى جۇرگىزىلۋدە. شىم شاھار باسشىسى م.ايتەنوۆ اتالعان ەلدى مەكەنگە بارىپ، نىساندار قۇرىلىس ساپاسىن تەكسەردى، تۇرعىندارىمەن كەزدەسىپ، ءوتىنىش-تىلەكتەرىن تىڭدادى.
ايتىپ وتەيىك، اۋماقتى ەلەكتر قۋاتىمەن قامتۋ ماقساتىندا مەردىگەر "تۋران ەنەرگو گرۋپپ" جشس قۇرىلىس جۇمىستارىن جۇرگىزۋدە. ال "ەنەرگو رەسۋرس شىمكەنتگاز" جشس گاز قۇبىرلارىن تارتۋمەن اينالىسۋدا. ەكى نىساننىڭ دا قۇرىلىس جۇمىستارى جىل سوڭىنا دەيىن اياقتالىپ، ابونەنتتەۋ جۇرگىزىلەدى.
كوشەلەردى اسفالتتاۋ 2023 جىلدان باستاپ كەزەڭ-كەزەڭىمەن جۇزەگە اسىرىلادى. قازىر مۇندا 22 كوشە بار. 4-ءى اسفالتتالعان، 15 جولعا تاس توسەلگەن، قالعان 3-ءى توپىراق جول.
شاعىناۋدان بالالارى 1 مەكتەپ، 3 بالاباقشادا ءبىلىم الادى. باتىس بولىگىنە 900 ورىندى مەكتەپ سالۋ ءۇشىن 2,46 گا جەر تەلىمىنىڭ قۇجاتى راسىمدەلىپ، قازىر جوبالىق-سمەتالىق قۇجاتى ازىرلەنۋدە.
1 سپورت الاڭشاسى ەل يىگىلىگىندە، بىلتىر بەرىلگەن.
كەزدەسۋ بارىسىندا شەشىمىن تاپقان ماسەلەلەر ءۇشىن العىسىن بىلدىرگەن تۇرعىندار، ارىز-شاعىمدارىن شاhار باسشىسىنا جەتكىزدى.
– بۇرىن اۋىل بەلسەندىسى رەتىندە تۇرعىنداردىڭ مۇقتاجىن جەتكىزۋ ءۇشىن بارماعان جەرىمىز قالمايتىن. ناتيجەسىن دە كورمەدىك. 2020 جىلدان بەرى وزىڭىزبەن ءجيى كەزدەسىپ، وتىنىشتەرىمىز ورىندالىپ جاتىر، ەندى جولىمىز اسفالتتالىپ، ساپالى ەلەكتر ەنەرگياسىن تۇتىناتىن كۇن دە الىس ەمەس دەپ ويلايمىن،-دەدى اۋىل ءبيى ءا. بالعابايۇلى.
ماسەلەلەردىڭ تاياۋ ارادا وڭ شەشىمىن تابۋى ءۇشىن قالا اكىمى ارنايى حاتتاما تولتىرتىپ، سالا باسشىلارىنا بىرقاتار تاپسىرمالار جۇكتەدى.
