Abaı aýdanyna qarasty Yntymaq-2 shaǵyn aýdanynyń Batys bóliginde 2 071 úı ornalasqan. Infraqurylymmen qamtý máselesi ózekti. Qazirgi tańda gaz, sý, jol, jaryqtyń jyryn sheshý úshin qurylys jumystary qarqyndy júrgizilýde. Shym shahar basshysy M.Áıtenov atalǵan eldi mekenge baryp, nysandar qurylys sapasyn tekserdi, turǵyndarymen kezdesip, ótinish-tilekterin tyńdady.
Aıtyp óteıik, aýmaqty elektr qýatymen qamtý maqsatynda merdiger "Týran Energo grýpp" JShS qurylys jumystaryn júrgizýde. Al "Energo resýrs Shymkentgaz" JShS gaz qubyrlaryn tartýmen aınalysýda. Eki nysannyń da qurylys jumystary jyl sońyna deıin aıaqtalyp, abonentteý júrgiziledi.
Kóshelerdi asfalttaý 2023 jyldan bastap kezeń-kezeńimen júzege asyrylady. Qazir munda 22 kóshe bar. 4-i asfalttalǵan, 15 jolǵa tas tóselgen, qalǵan 3-i topyraq jol.
Shaǵynaýdan balalary 1 mektep, 3 balabaqshada bilim alady. Batys bóligine 900 oryndy mektep salý úshin 2,46 ga jer teliminiń qujaty rásimdelip, qazir jobalyq-smetalyq qujaty ázirlenýde.
1 sport alańshasy el ıigiliginde, byltyr berilgen.
Kezdesý barysynda sheshimin tapqan máseleler úshin alǵysyn bildirgen turǵyndar, aryz-shaǵymdaryn shahar basshysyna jetkizdi.
– Buryn aýyl belsendisi retinde turǵyndardyń muqtajyn jetkizý úshin barmaǵan jerimiz qalmaıtyn. Nátıjesin de kórmedik. 2020 jyldan beri ózińizben jıi kezdesip, ótinishterimiz oryndalyp jatyr, endi jolymyz asfalttalyp, sapaly elektr energııasyn tutynatyn kún de alys emes dep oılaımyn,-dedi aýyl bıi Á. Balǵabaıuly.
Máselelerdiń taıaý arada oń sheshimin tabýy úshin qala ákimi arnaıy hattama toltyrtyp, sala basshylaryna birqatar tapsyrmalar júktedi.
