سۇلتانماحمۇت تورايعىروۆ. ۇلاعاتتى ويلار.

3584
Adyrna.kz Telegram

انا ءتىلى – قايناعان قاننىڭ، قينالعان جاننىڭ، تولعانتقان كوڭىلدىڭ، لۇپىلدەگەن جۇرەكتىڭ سىعىندىسى، وندا ءدام دە، ءمان دە بولۋ كەرەك.

 * * *

ميللەتكە بەك زور ءۇمىت – شاكىرت حالقى.

 * * *

 بايقايمىسىڭ، ءبىزدىڭ قازاق ءان قۇمار حالىق. گازەت وقىپ، نە شاريعات، نە ناسيحات ايتا باستاساڭ، قۇلاعىن سالار-سالماس شەتتەپ كەتەدى. بىرەۋ قولىنا دومبىرا ۇستاپ ءان سالا باستاسا، ويداعى-قىرداعىسى جيىلىپ، سەگىزدەگى بالا، سەكسەندەگى شالىنا دەيىن قالماي قامالاپ، ايتشى-ايتشىلاپ جانىن جاعاسىنا كەلتىرەدى.

 * * *

 مولدالار! جاس بالالاردى ءان ۇيرەنۋگە قىزىقتىرىڭدار! جاڭا شىققان ەلدەردىڭ جۇرەك جاندىراتىندارىنان ءۇنى جاقسى بالالارعا ءان سالعىزىپ قويساڭدار – اۋ! شىركىن، قانداي ءوتىمدى! ولەڭ ايتۋشى ءانپاز ادامداردى جۇرتقا ەسەرسوق دەپ كورسەتپەي، ەستى دەپ، قادىرلى دەپ كورسەتۋگە تىرىسىڭدار...

 * * *

 ەۆروپا جۇرتىنىڭ قازاق حالىندەي حالىنەن – مىڭداپ جىلداردى وتكىزىپ بارىپ جەتكەن وسى كۇنگى ءبىز سۇقتاناتىن حالىنە – قازاقتىڭ جەتۋىنە مىڭداپ، جۇزدەپ جىلدار كەرەك ەمەس، ونداپ، جيىرمالاپ، كوپ بولسا وتىزداپ جىلدار كەرەك. ەۆروپا حالقىنىڭ  كوپ جىلدا جەتكەن جەرىنە ءبىز از جىلدا جەتەمىز. سەبەبى: ولاردىڭ دايارلاپ سالىپ قويعان جولىمەن بارامىز.

 * * *

20-30 جىلدا ەۋروپانىڭ بىلگەنىن ءبىلىپ، ەۆروپا قاتارىنا قوسىلىپ كەتە الۋىمىزعا تاريحتان ياپوندار مىسال بولا السا كەرەك. مۇنان 58 جىل بۇرىن 1860 جىلداعى ياپوندار جايى – وسى كۇنگى ءبىزدىڭ قازاقتىڭ جايىنان نەمەنەسى ارتىق ەدى؟ قايتا ول كەزدەگى ياپونداردىڭ ەسۋاسى بولسا دا، اتادان بالاسىنا ميراس بولىپ كوشىپ وتىرعان – دايميوس (گۋبەرناتور) شو گۋندەرىندەي (نامەستنيك) كەسەل ءبىزدىڭ قازاقتا از ەدى.

* * *

 ادام بالاسىنىڭ اۋىر كۇن كورىستەن قۇتىلىپ، باقىتتى بولۋىنا  سەبەپ بولاتىن ەۆروپاداعى عىلىمدى مەن ەكى جىككە ايىرىپ ۇعامىن، ءبىرى – دەنە ازىعى، ءبىرى – ار ازىعى.

 * * *

 ار ازىعىنسىز – قۇر ونەردىڭ وسۋىمەن باسقالاردىڭ باقىتتى بولا الماعانى سەكىلدى كەلەشەكتە قازاق تا باقىتتى بولا المايدى. ىلگەرى كەتكەن جۇرتتاردىڭ تاريحىنىڭ قاتەسىن ەندى ىلگەرىلەيىن دەپ تۇرعان جۇرتتار ىستەسە، كورە بىلە – وتقا تۇسكەندىك بولادى. تاريح عىلىمىنىڭ پايداسى دا الدىڭعىنىڭ قاتەسىن كەيىنگىنىڭ ىستەمەۋىندە.

 * * *

 ەردىڭ ەڭبەگىن ەل بىلەرلىك زامان بىزگە دە بولار ما ەكەن؟ ءبىزدىڭ ەڭبەكشىلەرىمىزگە دە سونداي كۇن تۋار-داعى! بىراق قاشان، قاشان؟ قايدا؟

 * * *

 ءبىر تيىنىم قالعانشا وقيمىن.  سونان سوڭ، تۇرمىس قانداي جۇك سالسا دا كوتەرەمىن. بىراق كوڭىلىم وقۋدا بولماق.

 

 

 

پىكىرلەر