بۇگىن شىمكەنت قالاسىنداعى كورەي ەتنوسىنىڭ مادەنيەتى كۇنى ءىس-شاراسى ءوتتى.
جيىنعا قالالىق قحا مۇشەلەرى، زيالى قاۋىم وكىلدەرى، كورەي ەتنيكالىق قاۋىمداستىعىنىڭ وكىلدەرى، قالالىق كورەي ەتنومادەني بىرلەستىگىنىڭ مۇشەلەرى، قالا تۇرعىندارى قاتىستى.
شىمكەنت قالاسىنىڭ ىشكى ساياسات جانە جاستار ىستەرى جونىندەگى باسقارماسىنىڭ باسشىسى مۇراتجان شوتانوۆ شاhارداعى كورەيلەر قاۋىمداستىعى بارلىق سالانىڭ دامۋىنا ءوز ۇلەستەرىن قوسىپ جاتقانىن اتاپ ءوتتى.
- بيىل كورەيلەردىڭ قازاقستان جەرىنە كۇشتەپ قونىس اۋدارعانىنا 85 جىل تولىپ وتىر. زۇلمات جىلدارى كورەيلەردىڭ 8 مىڭعا جۋىق وتباسىن وڭتۇستىك ولكەسى قابىلدادى. 85-جىلدىق كەزەڭ ىشىندە كورەيلەر قاۋىمداستىعى قازاقستاننىڭ عىلىمى مەن بىلىمىندە، مادەنيەتىندە، ونەرى مەن ادەبيەتىندە، دەنساۋلىق ساقتاۋ جۇيەسىندە، سپورت سالاسىندا جارقىن ءىز قالدىردى. شىمكەنت قالاسىنداعى كورەيلەر قاۋىمداستىعىنىڭ بەلدى وكىلدەرى قالامىزدىڭ ساۋلەتىن ارتتىرۋعا، ءبىلىمىن كوتەرۋگە، عىلىمىن قالىپتاستىرۋعا، مادەنيەتى مەن ونەرىن ىلگەرىلەتۋگە، تۇرعىنداردىڭ دەنساۋلىعىن ساقتاۋعا، سپورتتا الدىڭعى ورىننان كورىنۋىنە قىزمەت ەتۋدە، - دەدى باسقارما باسشىسى.
وسىدان 33 جىل بۇرىن قالامىزدا كورەي ەتنومادەني بىرلەستىگى قۇرىلىپ، وڭتۇستىك ولكەدەگى 50 مىڭعا جۋىق كورەي ەتنوسى وكىلدەرىنىڭ باسىن بىرىكتىردى.
شىمكەنت قالالىق كورەي ەتنومادەني بىرلەستىگىنىڭ ءتورايىمى روزا پاك قاۋىمداستىق وكىلدەرى ەلىمىزدىڭ دامۋىنا بار كۇش-جىگەرىن سالىپ جاتقانىن ايتا كەلە، قازاق حالقىنا العىسىن جەتكىزدى.
مەرەكەلىك جيىندا ەلىمىزدىڭ الەۋمەتتىك-مادەني دامۋىنا، ىشكى تۇراقتىلىقتى ساقتاۋعا ۇلەس قوسقان قاۋىمداستىق وكىلدەرى شىمكەنت قالاسى اكىمىنىڭ، ىشكى ساياسات جانە جاستار ىستەرى جونىندەگى باسقارما باسشىسىنىڭ العىس حاتىمەن ماراپاتتالدى.
ءىس-شارادا كورەي ەتنومادەني بىرلەستىگى جانىنداعى شىعارماشىلىق ۇجىمدار ازىرلەگەن كونتسەرتتىك باعدارلاما ۇسىنىلدى.
