Búgin Shymkent qalasyndaǵy koreı etnosynyń mádenıeti kúni is-sharasy ótti.
Jıynǵa qalalyq QHA músheleri, zııaly qaýym ókilderi, koreı etnıkalyq qaýymdastyǵynyń ókilderi, qalalyq koreı etnomádenı birlestiginiń músheleri, qala turǵyndary qatysty.
Shymkent qalasynyń ishki saıasat jáne jastar isteri jónindegi basqarmasynyń basshysy Muratjan Shotanov shahardaǵy koreıler qaýymdastyǵy barlyq salanyń damýyna óz úlesterin qosyp jatqanyn atap ótti.
- Bıyl koreılerdiń Qazaqstan jerine kúshtep qonys aýdarǵanyna 85 jyl tolyp otyr. Zulmat jyldary koreılerdiń 8 myńǵa jýyq otbasyn ońtústik ólkesi qabyldady. 85-jyldyq kezeń ishinde koreıler qaýymdastyǵy Qazaqstannyń ǵylymy men biliminde, mádenıetinde, óneri men ádebıetinde, densaýlyq saqtaý júıesinde, sport salasynda jarqyn iz qaldyrdy. Shymkent qalasyndaǵy koreıler qaýymdastyǵynyń beldi ókilderi qalamyzdyń sáýletin arttyrýǵa, bilimin kóterýge, ǵylymyn qalyptastyrýǵa, mádenıeti men ónerin ilgeriletýge, turǵyndardyń densaýlyǵyn saqtaýǵa, sportta aldyńǵy orynnan kórinýine qyzmet etýde, - dedi basqarma basshysy.
Osydan 33 jyl buryn qalamyzda koreı etnomádenı birlestigi qurylyp, ońtústik ólkedegi 50 myńǵa jýyq koreı etnosy ókilderiniń basyn biriktirdi.
Shymkent qalalyq koreı etnomádenı birlestiginiń tóraıymy Roza Pak qaýymdastyq ókilderi elimizdiń damýyna bar kúsh-jigerin salyp jatqanyn aıta kele, qazaq halqyna alǵysyn jetkizdi.
Merekelik jıynda elimizdiń áleýmettik-mádenı damýyna, ishki turaqtylyqty saqtaýǵa úles qosqan qaýymdastyq ókilderi Shymkent qalasy ákiminiń, ishki saıasat jáne jastar isteri jónindegi basqarma basshysynyń Alǵys hatymen marapattaldy.
Is-sharada koreı etnomádenı birlestigi janyndaǵy shyǵarmashylyq ujymdar ázirlegen konerttik baǵdarlama usynyldy.
