اقتوبەدە قوي جۇنىنەن قۇرىلىس ماتەريالىن جاسايتىن زاۋىت سالىنادى. بۇل تۋرالى "حابار 24". ارناسى جاريالادى، دەپ حابارلايدى ”ادىرنا” ۇلتتىق پورتالى.
ءار جەردە تاۋ بولىپ ۇيىلگەن شيكىزاتتى پايداعا اسىرۋ كەرەك. جۇنگە سۇرانىستىڭ جوقتىعىنان كەي شارۋالار ورتەپ جىبەرۋگە ءماجبۇر. جاڭا ءوندىرىس اشىلسا، شوپانداردىڭ تابىسى دا ارتادى.
تالعات نۇرجىگىتوۆتىڭ وتارىندا 800-گە جۋىق قوي بار. بارلىعى دا بيازى ءجۇندى مەرينوس تۇقىمىنان. بولاشاقتا مال باسىن 2 مىڭنان اسىرۋدى كوزدەيدى. بىراق كاسىپكەر ەتتى تۇلىككە كوشۋدى ويلاپ وتىر. سەبەبى جىل سايىن قىرقىلاتىن ءجۇندى ورتەگەننەن باسقا امال جوق دەيدى.
ء"بىر قويدى قىرقۋعا 800 تەڭگەدەن مىڭ تەڭگەگە دەيىن تولەيمىز. قابىلدايتىن مەكەمەلەر بولسا، ءجۇن مەن تەرىنى ساتۋعا بولاتىن ەدى", - دەيدى شارۋا قوجالىعىنىڭ يەسى تالعات نۇرجىگىتوۆ.
بۇل قۇرىلىس ماتەريالدارى باسپانا مەن وزگە دە عيماراتتاردا جىلۋ ساقتاۋ ءۇشىن قولدانىلادى. جوبانى جەرگىلىكتى كومپانيا يتالياندىق ينۆەستورلارمەن بىرىگىپ جۇزەگە اسىرماقشى. قازىر كاسىپكەرلەر شارۋا قوجالىقتارىنان شيكىزات قابىلداۋ جولدارىن قاراستىرىپ وتىر. ءاربىر اۋداندا قابىلداۋ پۋنكتىن ورنالاستىرۋ جوسپارلانعان.
ايتا كەتۋ كەرەك جىل سايىن وبلىستا ءۇش جارىم مىڭ توننا قوي ءجۇنى پايداعا اسپاي، دالادا قالادى.
"جوبا ءۇش كەزەڭنەن تۇرادى. العاشقىدا قوي جۇنىنەن جىلۋ مەن دىبىس وقشاۋلاعىش پليتا شىعارامىز. كەيىننەن دايىن ءونىمنىڭ بىرنەشە تۇرىنە كوشۋدى ويلاپ وتىرمىز. ءبىزدىڭ قۇرىلعىلار جۇننەن بولەك زىعىر سياقتى وسىمدىك تالشىقتارىن، توقىما ءوندىرىسى قالدىقتارى مەن پورولوندى دا قايتا وڭدەۋگە قاۋقارلى", - دەپ اتاپ ءوتتى كاسىپكەر ەرلان جاڭابەرگەنوۆ.
قازىر قۇرىلىسقا دايىندىق باستالىپ كەتكەن. جالپى ينۆەستيتسيا كولەمى 10 ملن ەۆرو شاماسىندا. جىلىنا 2 مىڭ توننا دايىن ءونىم شىعارىلادى. العاشقى تاۋار كەلەر جىلدىڭ كۇزىندە ءازىر بولۋعا ءتيىس.
”ادىرنا” ۇلتتىق پورتالى
