Aqtóbede qoı júninen qurylys materıalyn jasaıtyn zaýyt salynady. Bul týraly "Habar 24". arnasy jarııalady, dep habarlaıdy ”Adyrna” ulttyq portaly.
Ár jerde taý bolyp úıilgen shıkizatty paıdaǵa asyrý kerek. Júnge suranystyń joqtyǵynan keı sharýalar órtep jiberýge májbúr. Jańa óndiris ashylsa, shopandardyń tabysy da artady.
Talǵat Nurjigitovtyń otarynda 800-ge jýyq qoı bar. Barlyǵy da bııazy júndi merınos tuqymynan. Bolashaqta mal basyn 2 myńnan asyrýdy kózdeıdi. Biraq kásipker etti túlikke kóshýdi oılap otyr. Sebebi jyl saıyn qyrqylatyn júndi órtegennen basqa amal joq deıdi.
"Bir qoıdy qyrqýǵa 800 teńgeden myń teńgege deıin tóleımiz. Qabyldaıtyn mekemeler bolsa, jún men terini satýǵa bolatyn edi", - deıdi sharýa qojalyǵynyń ıesi Talǵat Nurjigitov.
Bul qurylys materıaldary baspana men ózge de ǵımarattarda jylý saqtaý úshin qoldanylady. Jobany jergilikti kompanııa ıtalııandyq ınvestorlarmen birigip júzege asyrmaqshy. Qazir kásipkerler sharýa qojalyqtarynan shıkizat qabyldaý joldaryn qarastyryp otyr. Árbir aýdanda qabyldaý pýnktin ornalastyrý josparlanǵan.
Aıta ketý kerek jyl saıyn oblysta úsh jarym myń tonna qoı júni paıdaǵa aspaı, dalada qalady.
"Joba úsh kezeńnen turady. Alǵashqyda qoı júninen jylý men dybys oqshaýlaǵysh plıta shyǵaramyz. Keıinnen daıyn ónimniń birneshe túrine kóshýdi oılap otyrmyz. Bizdiń qurylǵylar júnnen bólek zyǵyr sııaqty ósimdik talshyqtaryn, toqyma óndirisi qaldyqtary men porolondy da qaıta óńdeýge qaýqarly", - dep atap ótti kásipker Erlan Jańabergenov.
Qazir qurylysqa daıyndyq bastalyp ketken. Jalpy ınvestıııa kólemi 10 mln evro shamasynda. Jylyna 2 myń tonna daıyn ónim shyǵarylady. Alǵashqy taýar keler jyldyń kúzinde ázir bolýǵa tıis.
”Adyrna” ulttyq portaly
