شىمكەنتتە جاقىن ارادا ەلىمىزدەگى ەڭ ۇلكەن يپپودرومنىڭ قۇرىلىسىنىڭ اياقتالۋى اياسىندا العاش رەت ءباسپاسوز تۋرى بولىپ ءوتتى، دەپ جازادى "ادىرنا" ۇلتتىق پورتالى.
نىسان بوزارىق اۋدانىنداعى اسەم جەردە ورنالاسقان جانە حالىقارالىق ءىرى جارىستار مەن ويىن-ساۋىق جارىستارى ءۇشىن وتاندىق باستى ورىن بولۋعا ۇمىتكەر. مۇندا ۇلتتىق سپورت تۇرلەرى بويىنشا كەزدەسۋلەردى دە، ىرىكتەۋ وليمپيادا كەزەڭدەرىن دە ۇيىمداستىرۋعا بولادى.
يپپودروم جوباسىنا كىرىكتىرىلە سالىنعان اكىمشىلىك ءۇي-جايلارى بار توبەسى جابىلعان 1500 ورىندىقتى تريبۋنا، قىسقى جانە جازعى ات قورالار، ۆەتەرينارلىق بلوك، قوسالقى ءۇي-جايلار كىرەدى. تريبۋنانىڭ جوعارعى قاباتىندا اشىق تەرراسا بولادى.
ويىندار مەن جارىستار ءۇشىن اشىق بولىمدە ۇزىندىعى 2012 مەتر بايگە جولى، كوكپار مەن كونكۋرعا ارنالعان الاڭ، اۋماقتا كىرمە جولدار، 310 كولىككە ارنالعان كەڭ تۇراق سياقتى دامىعان ينفراقۇرىلىم بولادى.
قۇرىلىستى جۇرگىزۋشى BI Group كومپانياسى نىساندى سالا باستاعاننان بەرى جۇمىس كولەمىن ايتارلىقتاي ۇلعايتتى. يگەرۋ الاڭى 1,5 ەسەگە، ياعني 24 گەكتاردان 39 گەكتارعا دەيىن، بايگە شەڭبەرىنىڭ ۇزىندىعى 14 مىڭنان 41 مىڭ شارشى مەترگە دەيىن، ەنى 10 م-دەن 20 م-گە دەيىن ەكى ەسەگە كەڭەيتىلدى. كوكپار القابى 16 مىڭنان 18 مىڭ شارشى مەترگە دەيىن ۇلعايتىلدى. جەر جۇمىستارىنىڭ كولەمى 550 000 م3-گە ءوستى، بۇل – 27 000 جۇكتى ءوزى تۇسىرەتىن كولىك جۇمىستارىنىڭ كولەمى.
قۇرىلىس سالۋشى جوباعا ءوز قاراجاتى ەسەبىنەن قۇنى 1 ملرد. تەڭگە بولاتىن مانەج قۇرىلىسىن قوستى. يپپودرومنىڭ جالپى قۇرىلىسى كومپانياعا 6 ملرد. تەڭگەدەن استام شىعىن اكەلدى.
ءباسپاسوز تۋرى اياسىندا قۇرىلىس كومپانياسىنىڭ وكىلدەرى باق وكىلدەرىن قۇرىلىستىڭ سالىنۋ كەزەڭدەرىمەن تانىستىرىپ، بارلىق سۇراققا، سونىڭ ىشىندە كولىك كوممۋنيكاتسيالارىن جۇرگىزۋگە قاتىستى ساۋالدارعا جاۋاپ بەردى.
حالىقارالىق بارلىق ستاندارتقا سايكەس سالىنعان يپپودروم شىمكەنتتە جاڭا ينۆەستيتسيالار تارتۋ مەن بيزنەستى دامىتاتىن ورىنعا اينالاتىن بولادى.
«قازاقستان ءۇشىن ات سپورتى ءداستۇرلى ويىن تۇرىنە جاتادى، سوندىقتان ونى ودان ءارى جەتىلدىرە دامىتۋ قاجەت. ول ءۇشىن زاماناۋي يپپودروم كەرەكتىگى تۇسىنىكتى. مۇندا كەلۋشىلەر ۋاقىتتارىن ءتيىمدى وتكىزىپ، ەرەكشە اسەر الاتىنىنا سەنىمدىمىز. سونىمەن قاتار يپپودروم وڭىردە اتالعان سپورت ءتۇرىنىڭ دامۋىنا وڭ ىقپال ەتەدى»، - دەپ اتاپ ءوتتى جوبا جەتەكشىسى ايدىن جاكەجانوۆ.
كومپانيا 2023 جىلدىڭ كوكتەمىندە ناۋرىز مەرەكەسى اياسىندا يپپودرومنىڭ رەسمي اشىلۋى تۋرالى حابارلاعان بولاتىن.
BI Group كومپانياسىنىڭ شىمكەنت نارىعىنا 2019 جىلى كوممەرتسيالىق جوبالارمەن شىعىپ، الەۋمەتتىك نىسانداردى ىسكە اسىرۋعا كىرىسكەنىن ەستەرىڭىزگە سالا كەتەيىك.
كومپانيا شىمكەنتتە 2021 جىلدىڭ شىلدەسىندە BI University كورپوراتيۆتىك ۋنيۆەرسيتەتىنىڭ فيليالىن اشتى. وسى جىلدىڭ باسىندا بالالار مەن ەرەسەكتەردى نەيرورەابيليتاتسيالاۋ جانە كارديورەابيليتاتسيالاۋ ءۇشىن «جۇلدىزاي» كورپوراتيۆتىك قورىنىڭ بەسىنشى مەديتسينالىق وڭالتۋ ورتالىعى ىسكە قوسىلدى. سونىمەن قاتار قور وڭىردە ورتالىق اشا وتىرىپ، رەابيليتولوگيا جانە ورتوپەديا سالاسىنداعى شەتەلدىك جەتەكشى ماماندار كونسۋلتاتسيالار مەن وپەراتسيالار جۇرگىزەتىن تالىمگەرلىك باعدارلاماسىن ەنگىزە باستادى. كومپانيا جىل سايىنعى BI Green ەكولوگيالىق اكتسياسى اياسىندا قالانى كوگالداندىرۋدى جۇزەگە اسىرادى. جاقىندا اسانباي اسقاروۆتىڭ ءجۇز جىلدىعىنا ارنالعان BI Chess شاحمات ويىندارى بويىنشا العاشقى قالالىق رەيتينگتىك تۋرنير بولىپ ءوتتى. سونداي-اق شىمكەنتتە اكادەميك ا. قۋاتبەكوۆ اتىنداعى حالىقتار دوستىعى ۋنيۆەرسيتەتىمەن قۇرىلىس سالاسىنداعى ءبىلىم بەرۋدى قولداۋ جونىندەگى مەموراندۋمعا العاش رەت قول قويىلدى.
"ادىرنا" ۇلتتىق پورتالى
