احمەتجان ەسىموۆ الماتى اكىمى بولعان كەزەڭدە 7 ملرد تەڭگەگە زاڭسىز بەرىلگەن جەر تەلىمدەرى مەملەكەت مەنشىگىنە قايتارىلدى، دەپ حابارلايدى "ادىرنا" پورتالى.
«قۇنى 7 ملرد تەڭگەنى قۇرايتىن جەر تەلىمدەرى مەملەكەتكە قايتارىلدى»، - دەپ حابارلادى سارسەنبى كۇنى قالالىق پروكۋراتۋرادا.
زاڭسىز بەرىلگەن جەر ۋچاسكەسىن الماتى قالاسىنىڭ قاداعالاۋ ورگانى تالداۋ بارىسىندا انىقتادى.
«2014 جىلى الماتى قالاسىنىڭ شەكاراسىن كەڭەيتۋ ناتيجەسىندە الماتى وبلىسىنىڭ جەر تەلىمدەرىنىڭ ءبىر بولىگى قالانىڭ قۇرامىنا كىردى. وسىلايشا، «حالىقارالىق كلۋبتار قاۋىمداستىعى» جشس-نە قوسالقى شارۋاشىلىق جۇرگىزۋ ءۇشىن الماتى وبلىسى قاراساي اۋدانىنان 30,9 گەكتار جەر تەلىمى الىندى. الايدا، جشس جەر تەلىمىنىڭ كاداسترلىق قۇنىن تولەۋ بويىنشا مىندەتتەمەلەرىن ورىنداماعان. پروكۋراتۋرانىڭ تالاپ-ارىزى بويىنشا الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن ۋچاسكە مەملەكەت مەنشىگىنە قايتارىلدى. سوت شەشىمى زاڭدى كۇشىنە ەنگەن جوق»، - دەپ ناقتىلادى پروكۋراتۋرا.
ايتا كەتەيىك، بۇل كەزەڭدە الماتى اكىمى قىزمەتىن ەكس-پرەزيدەنت نۇرسۇلتان نازارباەۆتىڭ جيەنى احمەتجان ەسىموۆ اتقارعان بولاتىن.
ۇقساس جاڭالىقتار
