رەداكتسيامىزعا وسكەمەن قالاسىنىڭ تۇرعىنى گۇلنۇر باجاكوۆادان حات كەلىپ ءتۇستى. وقىرمان ءوز حاتىندا "وتباسى" بانكىنىڭ "باقىتتى وتباسى" باعدارلاماسىنا قاتىسىپ، الايدا تىزىمنەن شىعىپ قالعانى جايلى جازادى. حات يەسى نەبارى ءۇش كۇن قالعاندا دەپوزيتپەن ءۇي الۋعا ۇمىتكەرلەر ساناتىنان شىعىپ قالعان، دەپ حابارلايدى "ادىرنا" ۇلتتىق پورتالى.
"وسى جىلدىڭ 20 شىلدەسىندە وتباسى بانكىنىڭ "باقىتتى وتباسى" باعدارلاماسى بويىنشا قۇجات قابىلداۋ باستالعان ەدى. ءبىز بۇل ءساتتى كوپتەن كۇتتىك. ءۇي الامىز دەپ ۇمىتتەندىك. بىراق 28 قىركۇيەك كۇنى بارلىق سالىمشىلارعا حات كەلدى. سايتتارى جۇمىس ىستەمەدى. ءوتىنىش بەرەتىن كەزدە دە سايت ىستەن شىعىپ، ءوتىنىشىمىزدى سوڭىنان ارەڭ جۇكتەپ ۇلگەرگەن ەدىك. كەيىن ءوتىنىم قابىلداۋ مەرزىمى 19 تامىزعا دەيىن ۇزارتىلدى. ءبىز شەشىمىن كۇتىپ جۇردىك. كەيىن باكنكە حابارلاسسام، تىزىمنەن ءبىزدى، ياعني "تولىق ەمەس وتباسىلاردى" شىعارىپ تاستاعانىن ايتتى. بىراق "نەلىكتەن؟" دەگەن سۇراعىما تولىققاندى جاۋاپ الا المادىم. مەنى قازىر "نەگە باعدارلامانىڭ تالاپتارى شىنايى ەمەس؟" دەگەن ساۋال تولعاندىرادى. ءبىز بىرنەشە اي بويى تىزىمنەن سەبەپسىز شىعىپ قالعانىمىزدى ەستۋ ءۇشىن باعدارلامانىڭ شەشىمىن كۇتتىك پە؟ مۇنىڭ بارلىعى 3 كۇننىڭ ىشىندە شەشىلگەنى دە قىزىق. ادىلەتتىك قايدا؟ ءوزىم 8 جىل پاتەر جالداپ، كەزەك كۇتۋدەن شارشادىم. و باستا ءبىزدى بۇدان حاباردار ەتكەن بولسا، بانكتەگى دەپوزيتىمىزدى اشپاس ەدىك. ونى باسقا باعدارلاما ءۇشىن قولدانار ەدىك. ءبىز ەشكىمنەن تەگىن تۇرعىن ءۇي سۇرامايمىز، بارلىعىنىڭ زاڭ نەگىزىندە جۇزەگە اسقانىن قالايمىز. ءتىپتى، بانكتىڭ جۇمىسىندا ءتارتىپ جوق. بۇل مەنىڭ عانا ەمەس، مەن سەكىلدى قازاقستانداعى بارلىق انالاردىڭ جانايقايى دەپ ويلايمىن. اياقتالۋىنا 3 كۇن قالعاندا باعدارلاما شارتتارىن وزگەرتىپ جىبەرۋ ءبىزدىڭ ەلگە عانا ءتان. مۇندايدى باسقا قاي جەردەن كوردىڭىز؟" - دەپ جازادى وقىرمان.
سونىمەن قاتار، وقىرمان وسى باعدارلامادان شىعىپ قالعان اتا-انالاردىڭ اتىنان قويىلاتىن تالابىن جەتكىزدى.
ء"بىزدىڭ تالابىمىز:
1."باقىتتى وتباسى" باعدارلاماسىنا تولىق ەمەس وتباسى كاتەگورياسىن قايتا قوسسىن.
2.ءبىرىنشى نارىقتان ەمەس، ەكىنشى نارىقتاعى پاتەرلەر بەرىلسىن.
3. ءبىرىنشى نارىقتان بەرىلگەن كۆارتيرانىڭ شارشى مەترى 200مىڭنان اسىرماۋىن سۇرايمىز" - دەدى اۆتور.
