قارجى نارىعىن رەتتەۋ جانە دامىتۋ اگەنتتىگىنىڭ توراعاسى مادينا ابىلقاسىموۆا تۇتىنۋشىلىق نەسيە نارىعىندا تاۋەكەلدەردى تومەندەتۋ شارالارى تۋرالى ايتىپ بەردى. بۇل تۋرالى قازاقپارات حابارلايدى.
ول: «كەپىلسىز تۇتىنۋشىلىق نەسيەنىڭ شامادان تىس وسۋىنە جول بەرمەۋ بويىنشا تاپسىرمانى ىسكە اسىرۋ ءۇشىن مىناداي شارالار كوزدەلەدى: توتەنشە جاعداي كەزەڭىندە جانە تۇلعالاردىڭ بارلىق كەپىلسىز تۇتىنۋشىلىق قارىزى بويىنشا 90 كۇن وتكەن كەزدە سىياقى ەسەپتەۋگە تىيىم سالىنادى. بۇدان ارى اتالعان شارا زاڭنامالىق نەگىزدە ەنگىزىلەدى. جەكە تۇلعالاردىڭ نەسيە تاريحىن قالپىنا كەلتىرۋ ءۇشىن 50 پايىزدان استام مەرزىمى وتكەن بەرەشەكتى 12 ايدا وتەگەن جانە مىندەتتەمەلەردى كەيىننەن ورىنداعان جاعدايدا قارىز الۋشى ءۇشىن جاعىمسىز نەسيە تاريحىن تۇزەتۋ بويىنشا مۇمكىندىك كوزدەلەدى»، - دەدى.
ءمادينا ابىلقاسىموۆا سونىمەن قاتار حالىق جانە بيزنەس ءۇشىن بورىش وتەمەسىنىڭ وسۋىنە جول بەرمەۋ باعىتىنداعى شارالاردى دا ايتىپ ءوتتى. ونىڭ ايتۋىنشا قازاقستاندا توتەنشە جاعداي ەنگىزىلىپ، ەكونوميكانىڭ جەكەلەگەن سالالارىنا شەكتەۋ شارالارىنىڭ ەنگىزىلۋىنە بايلانىستى حالىق پەن شوب سۋبەكتىلەرىنىڭ قارجىلىق جاي-كۇيىنىڭ ناشارلاۋىنا جول بەرمەۋ ءۇشىن قوسىمشا شارالار قابىلداۋ قاجەت. اگەنتتىك قازاقستان قارجىگەرلەرىنىڭ قاۋىمداستىعىمەن، ەكىنشى دەڭگەيلى بانكتەرمەن جانە نەسيە نارىعىنداعى باسقا دا سۋبەكتىلەرمەن بىرلەسىپ، مىناداي شارالاردى پىسىقتاپ، قولدانباق.
«بىرىنشىدەن قر ازاماتتىق كودەكسىنىڭ 359-بابىنا سايكەس نەسيە بويىنشا مىندەتتەمەسىن ورىنداماعان قارىز الۋشى اسا كۇردەلى، ياعني توتەنشە جانە تويتارۋعا بولمايتىن ءمان-جايلارعا تاپ بولعان كەزدە مۇلىكتىك جاۋاپكەرشىلىكتى اتقارمايدى. مۇنداي جاعدايعا توتەنشە جاعداي رەجىمىنىڭ ەنگىزىلۋى دە جاتادى. سوعان بايلانىستى جەكە جانە زاڭدى تۇلعالاردىڭ قارىزدارى مەن ميكرونەسيەلەرى بويىنشا تولەمدەر مەرزىمىنىڭ ءوتۋى توتەنشە جاعدايدىڭ ەنگىزىلۋىنە بايلانىستى تۋىنداعان كەزدە – ايىپپۇلدار مەن ءوسىمپۇلدار ەسەپتەلمەۋى ءتيىس. بۇل نورما جەكە جانە زاڭدى تۇلعالارعا، بانكتەر عانا ەمەس لومباردتاردى جانە نەسيەلىك سەرىكتەستىكتەردى، قارىز بەرەتىن بارلىق كرەديتوردى قوسا العاندا بارلىق ميكروقارجى ۇيىمدارى بەرگەن قارىزدارعا قولدانىلادى»، - دەگەندى دە ايتتى.
