پاكىستانداعى ۇشاق اپاتىنان 2 ادام ءتىرى قالعان

534

ساراپشىلار پاكىستاندا جۇما كۇنى تاڭەرتەڭ بولعان اۋە اپاتى ورنىنداعى ۇشاق سىنىقتارىن مۇقيات زەرتتەپ جاتىر. بۇل تۋرالى  CBS News اگەنتتىگىنە سىلتەمە جاساپ، قازاقپارات حابارلايدى.

بورتىندا 100-گە جۋىق ادام وتىرعان Airbus ۇشاعى كاراچي قالاسىنداعى ۇيلەردىڭ ۇستىنە قۇلاعان. اپات كەزىندە ەكى ادام ءتىرى قالعان. بەينەباقىلاۋ كامەرساسى ۇشاقتىڭ تۇرعىن ۇيلەر ۇستىنە قۇلاپ تۇسكەن ءساتىن جازىپ العان.

قۇتقارۋشىلار ءۇيىندى استىنان بانك پرەزيدەنتى زافار ماسۋدتى ارشىپ الدى. ابىروي بولعاندا، ماسۋد ءتىرى، تەك بىرنەشە جەرى سىنعان. ونىڭ قاسىنداعى جولاۋشى مۇحاممەد زۋباير دە امان قالعان.

«ۇشاق ورتەنە باستادى... مەن قاۋىپسىزدىك بەلدىگىن شەشتىم، جارىقتى كوردىم»، دەدى ول اۋرۋحانا پالاتاسىندا جاتىپ.

اۆياتسيالىق قىزمەت وكىلدەرى بورتىندا 98 ادام بولعان ا320 ۇشاعى لاحوردان ۇشىپ شىعىپ، كاراچيعا قونباق بولعانىن مالىمدەدى. الايدا، جول ۇستىندە ەكى قوزعالتقىشى دا ىستەن شىققان.

پاكىستان جاقىندا كوروناۆيرۋس پاندەمياسى كەزىندە بىرنەشە اپتاعا سوزىلعان كارانتيننەن كەيىن ىشكى رەيستەردى قايتا قالپىنا كەلتىرگەن.

ەلدىڭ پرەمەر-ءمينيسترى يمران حان ۇشاق اپاتى تولىق تەرگەلەتىنىن ايتىپ ۋادە بەردى.

پىكىرلەر