الاياقتارعا الدانعان پروفەسسور كاكەن قامزين رەسمي تۇردە جابىرلەنۋشى رەتىندە تىركەلدى، دەپ حابارلايدى “ادىرنا” ۇلتتىق پورتالى.
بۇل تۋرالى نۇربولات ادىربەك جەلىدەگى پاراقشاسىندا جازدى.
ونىڭ ايتۋىنشا، الماتى قالالىق پوليتسيا دەپارتامەنتىنىڭ ءباسپاسوز حاتشىسى سالتانات ازىربەككە حابارلاسقان. ول پروفەسسوردىڭ ارىزى بويىنشا اۋەزوۆ اۋداندىق پوليتسيا باسقارماسى قىلمىستىق كودەكستىڭ الاياقتىق بابىمەن ءىس قوزعاپ، كاكەن اعايدى رەسمي تۇردە جابىرلەنۋشى رەتىندە تىركەگەنىن ايتتى.
سالتانات ازىربەك سونداي-اق، قازىرگى ساتتە ءتيىستى ورگاندارعا ناقتى تاپسىرمالار بەرىلگەنىن، ۇستازىمىزدىڭ تىنىشتىعىن بۇزۋعا ەشكىمنىڭ قۇقىعى جوق ەكەنىن مالىمدەگەن.
سونداي-اق، اۋەزوۆ اۋداندىق پوليتسيا باسقارماسى باستىعىنىڭ ورىنباسارى، پولكوۆنيك ارمان توقسەيىتوۆ تە حابارلاسىپ، تەرگەۋ امالدارى باستالعانىن، ءىستىڭ سوتقا دەيىنگى تەرگەپ-تەكسەرۋ تىزىلىمىنە ەنگىزىلگەنىن راستاعان.
ونىڭ ايتۋىنشا، تەرگەۋ اياقتالىپ، سوت ناقتى شەشىم شىعارعانعا دەيىن كاكەن قامزيننىڭ پاتەرىنە بۇعات (ارەست) قويىلادى. ياعني، پاتەردى ساتىپ العاندار دا، باسقا ادامدار دا ۇستازدى مازالاي المايدى. پولكوۆنيك توقسەيىتوۆ وسىعان تولىق كەپىلدىك بەردى.
