اعالاردىڭ اسىلى

2678
Adyrna.kz Telegram

قوعام قايراتكەرى، ولكەتانۋشى، مەتاللۋرگ تولەگەن بۇكىروۆ مەرەيلى 70 جاسقا تولىپ وتىر. كيەلى دە قاستەرلى ۇلىتاۋ ولكەسىندە تۋعان تولەگەن اعامىزدىڭ مەرەيتويىنا ارنالعان قۇتتىقتاۋلار لەگى مەن ولەڭ جولدارىن نازارلارىڭىزعا ۇسىنامىز.  

 

قۇرمەتتى تولەگەن نۇرماعانبەتۇلى!

مەرەيلى بيىگىڭىز قۇتتى بولسىن! بۇل كۇنگە ءسىز تالاي جىلدار بويى ەل قامى ءۇشىن جاساعان ەڭبەگىڭىزدىڭ ساۋابىن جيناپ، ابىرويلى قىزمەتىڭىزدىڭ جەمىسىن، ءۇرىم – بۇتاقتىڭ قىزىعىن كورىپ جەتىپ تۇرسىز. ءبىز ءسىزدى جاس كەزىمىزدەن قوعامنىڭ ىسىنە بەلسەنە ارالاسىپ، ۇلتتىڭ تاعدىرىنا بەيجاي قارا المايتىن تۇلعا رەتىندە تانىپ كەلەمىز. سوناۋ سەكسەنىنشى جىلداردىڭ سوڭىنان باستاپ جەزقازعان جۇرتشىلىعىن ايماقتىڭ، ەلدىڭ وزەكتى ماسەلەلەرىنە جۇمىلدىرىپ، كوپتەگەن يگى باستامالاردىڭ باسى-قاسىندا ءجۇرسىز.
بۇگىنگى كۇنى ءسىز ەل اعاسى رەتىندە تامىرىن تەرەڭنەن الاتىن تاريحىمىزبەن بۇگىنگى جەتىستىكتەردى بايلانىستىراتىن ىستەردىڭ كوشباسشىسى بولىپ، ءوزىڭىزدىڭ وسى جاسقا دەيىن جيناعان بەدەل، ابىرويىڭىزدى ەل يگىلىگىنە جۇمساۋدىڭ تاعى ءبىر قىرىن كورسەتىپ ءجۇرسىز. قۇرمەتتى توكە! سىزگە زور دەنساۋلىق، قاجىماس قايرات، باق پەن باقىت تىلەيمىن.

ىزگى نيەتپەن،
باۋىرىڭىز ءاليحان بايمەنوۆ

 

وسمي-اعا

بۇل ولەڭدى قايراتكەر اعامىز تولەگەن بۇكىروۆتىڭ 70 جاسقا تولعان تويىنا ارنايمىن.

وشكەن بولار ول جىلدار ەل ەسىنەن،
بىلەتىندەر كەتتى عوي كەمەسىمەن.
...ءبىر نارسە ىزدەپ جۇرگەنسىز زاۋىتتاعى
گاز جۇرەتىن قۇبىردىڭ وڭەشىنەن.

كوڭىلىڭدى سەندىرىپ جۇرگەندە ءۇمىت،
ەرتەڭىڭە شاقىردى ءبىر بەلگى نىق.
«تامام جۇرتتى تاڭ قىلار» دەمەدى ەشكىم
گاز قۇبىرىن تازالاپ جۇرگەن جىگىت.

الدامادى ارمانىڭ اق قاناتتى،
تاريح ءوزى جازدى، اعا، تاقتاعا اتتى.
تالماي ءجۇرىپ ءسىز تاپقان الگى وسمي
جەزقازعانعا جەر جۇرتىن جالت قاراتتى.

وسمي بوپ جارق ەتتى اتاعىڭىز،
جاڭالىققا قول سوقتى قاتارىڭىز.
وسى كۇيدەن ايىرماي كەلەدى ءالى
وسميدەن باستالعان ساپارىڭىز.

سودان بەرى تىنشۋدى بىلمەدىڭىز،
ۇلت دەدىڭىز ۇران ساپ، ءتىل دەدىڭىز.
ولجا ەكەنىن، اعاسى، بىلەسىز بە
ورتامىزدا تاۋداي بوپ جۇرگەنىڭىز.

بايلىعىڭىز - ورمان، تاۋ، جەر مەن كولىڭ،
پايدا تابۋ جات ساعان ەلدەن تەگىن.
كوكىرەگىڭدە - قوبىزى كەتبۇقانىڭ،
ساناڭىزدا - تاعدىرى كەندى ولكەنىڭ.

پاتشالىعىن جاسادى ساعان ارىڭ،
سول ارىڭدى بارىم دەپ باعالادىڭ.
ءتۇن ۇيقىڭدى ءتورت بولگەن شىعار تالاي
«ءتورت بوساعا» اتانعان بابالارىڭ.

ومىرىڭنەن كورەمىز ەرلىك ءىزدى،
سول ىزبەنەن باستاي بەر ەندى ءبىزدى.
ءجۇز جىلدان سوڭ قويسا ەكەن ۇرپاعىڭىز
وسميدەن جاساتىپ بەلگىڭىزدى.

كەيىتسە ءومىر، كەتكەندە بەزەرىپ ءوڭ،
جانىمىزدى جازامىز ءسوز ەمىمەن.
ءبىز دە، اعاسى، الدەنە ىزدەپ ءجۇرمىز
ءومىر دەيتىن قۇبىردىڭ وزەگىنەن.

ۋاقىتتىڭ وزگەشە كۇيى مۇلدە،
سول ورلىك تۇر ۇستانىم-تۇيىنىڭدە.
ءتورت باباڭداي تورەلىك جاسا، اعاسى،
جەتپىس جاستىڭ تۇرىپ اپ بيىگىندە.

ىنىلىك ىزگى تىلەكپەن
عازيز ەشتاناەۆ،
قازاقستان جازۋشىلار وداعىنىڭ مۇشەسى.

 

اعالاردىڭ اسىلى!

(ەلدىڭ قۇرمەتتى ازاماتى، ولكەتانۋشى، تەحنيكا عىلىمدارىنىڭ كانديداتى،ونەر جاناشىرى تولەگەن نۇرماعانبەتۇلى بۇكىروۆتىڭ 70 جىلدىق مەرەيتويىنا جىر شاشۋ)

1.سوزدەن كورمەگەن ىركىلىپ،
ايتپايدى استە كۇپىرلىك.
قۇرمەتىنە ەلدىڭ بولەنگەن،
تولەگەن اعا بۇكىروۆ.

2.قانىندا بار تەكتىلىك،
جاراتقان يەم ەپتى عىپ.
تۋعان جەردىڭ تاعدىرىنا،
تۇرادى ءدايىم شەپ قۇرىپ.

3.ەلىن جۇرەكپەن سۇيگەن ەر،
كوشباسشى اعامىز سۇيەنەر.
ارداقتىما قارىزدار،
تاريحي بۇل كيەلى جەر.

4.تاريحتى العا سۇيرەدى،
قىزمەت ەتتى جۇيەلى.
رۋحىن قايتا ورالتتى،
كەتبۇقاداي بيلەردى.

5. كەزى جوق بىلەمىز انت بۇزعان،
عىلىمدا دا اتى وزعان.
ۇرپاق كادەسىنە جاراسىن،
كوز مايىن تاۋىسقان قول جازباڭ.

6.ءار سالانىڭ بىلگىرى،
ىسىندە جوق ءبىر ءمىنى.
تۋعان ولكەگە بايلانعان،
جاقسى اعانىڭ كىندىگى.

7. بۇگىنگى كۇنگى بەك دەر ەم.
جانى ەگىز وسى ولكەممەن.
ساليقالى اعانىڭ،
ورىنى بار تەك توردەن.

8. وسى بەتتەن ءبىر تانباي،
ەڭبەگىن كورگەن جوق بۇلداپ-اي.
بەدەلدى ەردىڭ ءبىرىسىز،
ماقتايدى جۇرت كوپ سىرتتانداي.

9. قازىناسى وسى ەلدىڭ.
توكەڭمەن العا مول سەنىم.
كەمەلدىك جاس قۇت بولسىن،
تولەگەن اعام ءدۇر مەنىڭ!

ىزتولەۋ بەكەنۇلى ءتۇسىپوۆ
اقىن، قر جۋرناليستەر وداعىنىڭ مۇشەسى،
«حالىق العىسى» مەدالىنىڭ يەگەرى.

«ادىرنا» ۇلتتىق پورتالى جەزقازعان سيرەك مەتالل ءوندىرىسىنىڭ وركەندەۋىنە ۇلەس قوسقان عالىم تولەگەن نۇرماعامبەتۇلىن مەرەيلى جاسىمەن شىن جۇرەكتەن قۇتتىقتايدى! وتباسىڭىز امان، دەنىڭىز ساۋ بولسىن!

 

"ادىرنا" ۇلتتىق پورتالى

پىكىرلەر