بۇگىن، 4 ناۋرىز ورداباسى اۋدانىنا قازاق عىلىمى مەن ءوندىرىسىنىڭ وركەندەۋىنە ولشەۋسىز ۇلەس قوسقان، جەزقازعان سيرەك مەتالل ءوندىرىسىنىڭ دامۋىنا سۇبەلى ەڭبەگى سىڭگەن، ەلگە بەلگىلى تۇلعا، ۇلىتاۋ وبلىسىنىڭ جانە جەزقازعان قالاسىنىڭ قۇرمەتتى ازاماتى تولەگەن بۇكىروۆ ارنايى ىسساپارمەن كەلدى.
ساپار بارىسىندا تولەگەن نۇرماعانبەتۇلى قازاقتىڭ اتى اڭىزعا اينالعان الىپ كۇش يەسى قاجىمۇقان مۇڭايتپاسوۆتىڭ كەسەنەسىنە زيارات ەتىپ، باتىر بابامىزدىڭ رۋحىنا قۇران باعىشتادى. سونداي-اق، داڭقتى بالۋاننىڭ ءومىرى مەن ەرلىكتەرىن دارىپتەيتىن تەمىرلان اۋىلىنداعى قاجىمۇقان اتىنداعى وبلىستىق سپورت مۇراجايىنا ات باسىن بۇردى.
تولەگەن بۇكىروۆتى ورداباسى اۋدانىنىڭ اكىمى ازات ورالباەۆ پەن تۇركىستان وبلىستىق ءماسليحاتىنىڭ دەپۋتاتى دۋلات ءابىش جىلى قارسى الىپ، قۇرمەت كورسەتتى. قوناققا قازاقى داستۇرمەن شاپان جاۋىپ، ورداباسى اۋدانىنىڭ 60 جىلدىعىنا وراي جارىق كورگەن «ورداباسى – كيەلى مەكەن» كىتابىن جانە قاجىمۇقان مۇڭايتپاسوۆتىڭ ءمۇسىنىن سىيعا تارتتى.
بۇل كەزدەسۋدىڭ ءمانى تەرەڭدە. تولەگەن بۇكىروۆ سىندى ەلگە ەڭبەگى سىڭگەن ازاماتتاردىڭ قاجىمۇقان بابا رۋحىنا تاعزىم ەتۋى – ۇلتتىق بىرلىگىمىز بەن تاريحي مۇرامىزعا دەگەن قۇرمەتتىڭ ايقىن كورىنىسى. مۇنداي يگى باستامالار جاس ۇرپاققا ونەگە بولىپ، ۇلت رۋحانياتىنىڭ وركەندەۋىنە ءوز ۇلەسىن قوسپاق.
