شىلدەنىڭ 18-ءى كۇنى “ادىرنا” ۇلتتىق پورتالى قىزىلوردا وبلىسىنىڭ تۇرعىنى نۇرلان تۇرمانوۆتىڭ وقيعاسىن جاريالاعان بولاتىن. ول “اپپاق ءسابيت” لاقاپ اتىمەن بەلگىلى سابيتبەك ومىرزاقوۆ باستاعان قىلمىستىق توپ ولتىرمەك بولعانىن ايتىپ، شاعىمدانعان ەدى.
«ماقساتتارى مەنى ءولتىرۋ بولعان»: قىزىلوردا وبلىسىنىڭ تۇرعىنى توقاەۆقا حات جولدادى» تاقىرىبىمەن جاريالانعان ماقالادا نۇرلان تۇرماننان اقشا بوپسالاپ، ءوزىنىڭ لاس ىستەرىنە، مۇنايدى زاڭسىز تاسىمالداۋ ارەكەتتەرىنە ارالاستىرماق بولعان ومىرزاقوۆ سابيتبەكتىڭ اتىنا قانشا ارىز جازىلعانىمەن بوستاندىقتا جۇرگەنى، وعان قاتىستى ىستەردىڭ جابۋلى قازان كۇيىندە قالاتىنى جازىلعان ەدى.
الايدا اقشاسى باردىڭ مۇمكىندىگى دە مول زامان بولعانى ما؟ نۇرلان تۇرماننىڭ وقيعاسىن زاڭ دا، باسقاسى دا ەلەپ-ەسكەرمەدى. نۇرلاننىڭ ايتۋىنشا، بارلىعى قالتالىلاردىڭ ىعىنا كونىپ، اپپاق ءسابيتتىڭ ءىسىن قاراماي وتىر.
“اپپاق ءسابيت قازىر ءبارىن الداپ وتىر. ۇيىمداسقان قىلمىستىق توبى دامىعان سايىن ءورشىپ بارادى. ءتىپتى، بازاردى دا ۇستاپ وتىر. وزبەكتەردى بوپسالاۋدا. ءبارىنىڭ كوزدەگەنى اقشا بولعاندىقتان، ومىرزاقوۆ سابيتبەكتىڭ اقشاسىنا قىزىققاندار ونىڭ ارتىن جاۋىپ وتىر”، - دەيدى ول.
قانشاما ارىز جازىپ، تالاي ەسىكتى توزدىرعان نۇرلان تۇرماننىڭ ارەكەتى وسى كۇنگە دەيىن ناتيجەسىز. ءتىپتى توقاەۆقا 6 مارتە حات جولداعانىمەن، قۇزىرلى ورگانداردان ەشكىم حابارلاسپاعان. ونىڭ ادىلدىك جولىندا اياق توزدىرىپ جۇگىرىپ جازعان ارىزدارى – ءبارى قاراۋسىز كۇيى قالدى. قانشاما قىلمىسى بولا تۇرا سابيتبەك ومىرزاقوۆ ەش قينالماستان ءومىرىن ءسۇرىپ ءجۇر. «وسىنىڭ ءبارىن اقشامەن شەشىپ وتىر» دەگەن نۇرلان مىرزا وزىنە قاتىستى ءىستىڭ قايتادان قوزعالعانىن تالاپ ەتەدى.
نۇرلاننىڭ ايتۋىنشا، قىلمىستى بۇركەپ وتىرعان وبلىس پروكۋرورى نۇرلان بيجانوۆ ەكەن.
“قىزىلورداداعى قىلمىس الەمنىڭ كرىشاسى - بيجانوۆ نۇرلان بولىپ تۇر. ول بارلىعىن قاناتىنىڭ استىنا الىپ وتىر. اپپاق ءسابيت تە وسىمەن بايلانىستى. سوندىقتان دا ول جازالانبايدى”،- دەدى نۇرلان.
ايتا كەتەيىك، بيجانوۆ نۇرلان داۋرەنۇلى قىزىلوردا وبلىسىنىڭ پروكۋرورى.
“مەن اپپاق ءسابيتتىڭ جازالانعانىن قالايمىن. ول ماعان قانشاما زالال كەلتىردى. بىراق ءالى كۇنگە دەيىن جازاسىن وتەگەن جوق. ادىلدىك ىزدەيمىن! قازىر بازارداعىلاردى دا بوپسالاپ، ءوز بيزنەسىن اشىپ الدى. سىرت كوزگە موماقان بيزنەسمەن كورىنگەنىمەن، “قوي تەرىسىن جامىلعان قاسقىر” بولىپ وتىر. مەن تەك ءوزىمدى عانا ەمەس، زارداپ شەككەن وزگەلەرگە دە الاڭدايمىن. سوندىقتان ومىرزاقوۆ سابيتبەكتى تەكسەرىپ، ءىس قوزعاۋلارىڭىزدى سۇرايمىن. ادىلدىك بار شىعار”، - دەدى نۇرلان تۇرمان.
نەلىكتەن نۇرلان تۇرمانوۆتىڭ ارىزى قايتا قارالمايدى؟ بىرنەشە مارتە بوپسالاۋ ارەكەتتەرىمەن قوسا، مۇنايدى زاڭسىز تاسىمالداۋعا قاتىسى بار سابيتبەك ومىرزاقوۆ نە سەبەپتى جازالانبايدى؟ اپپاق ءسابيتتىڭ قىلمىستىق ارەكەتتەرىنە قاتىسى بار يمانقۇلوۆ نۇربولات، بەركىنباەۆ ايدوس، تىلەۋوۆ نۇرلاندار ىسكە تارتىلىپ، نەگە قاماۋعا الىنبادى؟ وسى سۇراقتار توڭىرەگىندە ماسەلەلەرىنىڭ شەشىلگەنىن قالاعان، وتباسى مەن قۇقىعىن قورعاماق بولعان، ءارى ادىلدىك ىزدەگەن نۇرلان تۇرمانوۆ ارىزىنىڭ قارالعانىن تالاپ ەتىپ، رەداكتسيامىزعا حابارلاسقان ەدى. وسىنى ەسكەرگەن ءبىز دە پرەزيدەنتكە، قر ۇقك، قر جوعارعى سوتى، باس پروكۋراتۋراسىنا قىلمىستىق ءىستىڭ قارالۋىن تالاپ ەتەمىز.
”ادىرنا” ۇلتتىق پورتالى
