جاڭا جىلدىق كەشكە جوسپار قۇرىپ ۇلگەردىڭىز بە؟ قايدا قارسى الامىز؟ قانداي تاعام ازىرلەيمىز؟ ەڭ باستىسى – نە كورەمىز؟
جاڭا جىل – ءار وتباسى ءۇشىن عاجايىپ پەن شاتتىققا تولى مەيرام. بۇل كۇندى اسەرلى ءارى ەستە قالارلىقتاي وتكىزۋ ءۇشىن «Qazaqstan» تەلەارناسى كورەرمەنگە ارناپ ارنايى مەرەكەلىك باعدارلامالار لەگىن دايىندادى.
جىلدىڭ باستى كەشى – «جاقسىلىقپەن كەل، جاڭا جىل – 2026!» شوۋ-كونتسەرتى 31 جەلتوقسان كۇنى ساعات 21:00-دە ەفيرگە شىعادى.
ارنا جۇرگىزۋشىلەرى مەن تانىمال ونەر يەلەرى، ءار سالانىڭ وكىلدەرى قاتىساتىن بۇل جوبا كورەرمەنگە توسىنسىيعا تولى ەرەكشە كوڭىل-كۇي سىيلايدى. مەرەكەلىك كونتسەرتتە ەلىمىزدىڭ تانىمال ەسترادا انشىلەرى مەن زاماناۋي مۋزىكا وكىلدەرى ونەر كورسەتەدى. ولاردىڭ قاتارىندا ماقپال ءجۇنىسوۆا، روزا رىمباەۆا، «دوس-مۇقاسان» توبى، مەيرامبەك بەسباەۆ، ءالي وقاپوۆ، مادينا سادۋاقاسوۆا، Hulan Aru, Bayansulu بار.
كەشتىڭ كوركىن حالىقتىڭ سۇيىكتى اكتەرلەرى جۇلدىزاي دۇيسەنبيەۆا، ءجۇسىپ اقشورا، قاراكوز تىلەۋبەكوۆا اشا تۇسەدى. ال مەرەكەلىك كەشكە اقىن ۇلىقبەك ەسداۋلەت، كومپوزيتور تولەگەن مۇحامەدجانوۆ جانە ەل دامۋىنا ەلەۋلى ۇلەس قوسقان ەڭبەك ادامدارى قۇرمەتتى قوناق رەتىندە شاقىرىلعان.
باستى مەرەكەلىك شوۋ-كونتسەرتتەن بولەك، 31 جەلتوقسان كۇنى ساعات 19:10-دا «قازاقستان» تەلەراديوكورپوراتسياسى تۇسىرگەن 4 ءبولىمدى جاڭا جىلدىق وتباسىلىق تەلەحيكايا ەفيرگە شىعادى. وتباسى قۇندىلىقتارى، مەيىرىم مەن ماحاببات، كوڭىلدى وقيعالارعا تولى تەلەحيكايا بۋراباي ۇلتتىق تابيعي پاركى مەن استانا قالاسىندا تۇسىرىلگەن.
جاڭا جىل مەرەكەسى مەن قىسقى دەمالىس كۇندەرى «Disney» فيلمدەرىنىڭ اپتالىعى وتەدى. 27 جەلتوقسان مەن 5 قاڭتار ارالىعىندا «اڭدار شاھارى»، «راپۋنتسەل»، «موانا»، «مەيىرىمدى دينوزاۆر»، «مۇزدى ولكە»، «مۇز ءداۋىرى»، «اۆاتار»، سونداي-اق اڭىزعا اينالعان «ۇيدە جالعىز قالعاندا» كومەدياسى ەفيردەن كورسەتىلەدى.
سونىمەن قاتار 27 جەلتوقسان كۇنى ساعات 20:00-دە «ۇنايدى ماعان» كاۆەر-شوۋىنىڭ جاڭا جىلدىق ارنايى شىعارىلىمى كورەرمەن نازارىنا ۇسىنىلادى. باعدارلامادا 24 ورىنداۋشى مەن قازاق ەستراداسىنىڭ تانىمال انشىلەرى سۇيىكتى حيت اندەرىن ورىندايدى.
جاڭا جىلدىڭ العاشقى كۇندەرى دە اسەرلى مۋزىكالىق جوبالارعا تولى. 1 قاڭتار كۇنى ساعات 21:00-دە ۋاقىتتىڭ تەزىنەن ءوتىپ، كوڭىل تورىنەن ورىن العان اۋەندەر شىرقالاتىن «ساعىندىرعان اندەر-اي» ءان كەشى ەفيرگە شىعادى. ال 3 قاڭتار كۇنى ساعات 17:10-دا ءانشى ابيك جەكسەننىڭ جاندى داۋىستاعى جەكە كونتسەرتى كورەرمەنگە ەرەكشە كوڭىل-كۇي سىيلايدى.
وتاندىق كينوتۋىندىلاردى ءسۇيىپ تاماشالايتىن كورەرمەن ءۇشىن مەرەكە كۇندەرى «جۇمباق قىز»، «جار-جار»، «تۇركياداعى قازاقشا بيزنەس»، «تاقيالى پەرىشتە», سونداي-اق «بيىك سەزىم»، «بايدىڭ بالاسى» جانە «كورشىلەر» وتباسىلىق كومەديالارى كورسەتىلەدى.
2026 جىلدى «Qazaqstan» تەلەارناسىمەن بىرگە قارسى الىڭىز!
