اقىن سەرىك اقسۇڭقارۇلى قر-داعى وزگەرىستەرگە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى
– بيىل كوپتەگەن وقيعالار مەن ساياسي وزگەرىستەردىڭ كۋاسى بولىپ جاتىرمىز. ءالى تالايىنا كۋا بولارىمىز انىق. سونىڭ ءبىرى – قاراشادا وتكەلى تۇرعان كەزەكتەن تىس پرەزيدەنت سايلاۋى. مەملەكەت باسشىسى 1 قىركۇيەكتەگى جولداۋدا وسى جاڭالىقتى جاريا ەتكەندە كوپتى تاڭىرقاعانى راس. دەسەك تە، پرەزيدەنت سايلاۋىنىڭ مەرزىمىنەن بۇرىن وتەتىنى اقىلعا قونىمدى دۇنيە. نەگىزى سايلاۋ 2024 جىلى بولۋى كەرەك ەكەنىن بىلەمىز. بىراق مەملەكەت بيلىگى بۇرىنعىدان مۇلدە باسقا، جاڭاشا سوقپاققا ءتۇستى. سوندىقتان باس بولا بىلەتىن باسشىنى ەرتەرەك سايلاپ الىپ، جۇيەلى ىستەردى ويلاستىرىپ، سول جولدا جۇمىلا بىلگەن ابزال.
اينالامىزداعى ەلدەردىڭ تۇتاستىعىنا سىزات تۇسكەن مەزەتتە ءبارىن تەرەڭىنەن بولجاعان دۇرىس. ءبىز دە سول قاتەلىكتەردى جىبەرمەس ءۇشىن ساياسي رەفورمالار باعىتىن نىعايتۋدامىز دەپ ويلايمىن. ونىڭ ۇستىنە، الداعى پرەزيدەنتتەر تەك ءبىر مەرزىمگە سايلانادى. بۇل دا جاڭاشا ءبىر وزگەرىستىڭ كورىنىسى. الەمدە پرەزيدەنتتىڭ وكىلەتتىگىن وسىلاي رەتتەگەن ەلدەر اسا كوپ ەمەس. ايتكەنمەن حالىق ءۇشىن تەر توگىپ، جانىن سالىپ جۇمىس ىستەيتىن ادامعا 7 جىل ۋاقىت ازدىق ەتپەيدى. جولعا قويعان ماقساتىن ورىنداپ، كوپ ماسەلەنى رەتكە كەلتىرىپ ۇلگەرۋى ءتيىس. وسىلايشا، الەم ساياساتىندا دەموكراتيانى ۇستاناتىن ەلدەردىڭ قاتارىن تولىقتىرۋعا ۇمتىلىس جاساپ وتىرمىز. مەملەكەت بيلىگىنىڭ جاڭا ساياسي جۇيەگە كوشىپ جاتقانى وتە دۇرىس. سونىڭ ارقاسىندا حالىق پەن ەل اڭساعان ادىلەتتى كەزەڭگە جەتە الامىز. ول ءۇشىن وسى باستان مەملەكەت مۇددەسىن ويلايتىن ءار ادام ايانباي ەڭبەك ەتكەنى ءجون، - دەدى قالامگەر.
