Qazaqstan men Resei Federasiiasy şekarasy aumaǧynda bolyp jatqan ahual baqylauda, barlyq küştık qūrylymdar men memlekettık organdar jūmyldyryldy. Būl turaly BQO äkımınıŋ orynbasary Baqytjan Narymbetov aitty, dep habarlaidy “Adyrna” ūlttyq portaly.
“Qazırgı taŋda Resei Federasiiasynan Qazaqstanǧa ötetın şekara punktterınde täulıktık patruldeu jürgızılude. Syrym, Şaǧan, Tasqala, Teplyi şekara posttarynda täulık boiy üzdıksız şekaraşylarmen qatar polisiia qyzmetkerlerı de jūmys ısteude. Oral qalasy boiynşa patruldık polisiia men jaiau nariadtar köbeitılıp, barlyq qoǧamdyq jerler baqylanuda.
Ärine, Batys Qazaqstan oblysynyŋ Resei Federasiiasynyŋ bes oblysymen şekaralas boluy jäne basqa da geografiialyq- demografiialyq faktorlarǧa bailanysty şekarada tūrǧandardyŋ sany azaimauda. Sondyqtan 330 myŋ tūrǧyny bar oblys ortalyǧy – Oral qalasy bırneşe myŋdaǧan şeteldıkterdı qabyldauǧa daiyn bolmaǧandyǧy aitpasaq ta tüsınıktı.
Sol sebeptı oblys erıktılerınıŋ bastamasymen Oral qalasynyŋ jazǧy lagerlerınıŋ bazasynda 330 orynǧa keluşılerdı aqyly türde qabyldau punktterı ūiymdastyryldy. (uaqytşa tūru + tamaqtanu aqysy – 5000 teŋge)”,-dep jazdy Baqytjan Haberūly.
Sondai-aq, Baqytjan Narymbetovtyŋ aituynşa, tūrǧyndar üşın jäne RF-nan kelgen azamattarǧa tüitkıldı mäselelerdı şeşu maqsatynda 109 bıryŋǧai call-ortalyǧyna habarlasuǧa bolady. Sonymen bırge äleumettık jelılerde elımızdıŋ basqa öŋırlerıne jüretın tūraqty avtobus marşruttarynyŋ qozǧalys kestesı, jolaqy qūny turaly aqparattar ornalastyrylǧan.
“Taldau körsetkendei bızdıŋ öŋır arqyly şekaradan kırgen Resei azamattarynyŋ basym köpşılıgı oblysymyzdy uaqytşa tranzittık punkt retınde körude. Sol sebeptı qalyptasqan jaǧdaiǧa bailanysty avtobus parkterınıŋ künıne bır ret Atyrauǧa jüretın jolauşylar avtobusyn künıne 5 ret jıberuge mümkındıgı bar. Aqtöbe qalasy boiynşa da marşrut jıberuge daiyn. Sonymen bırge barlyq poezd baǧyttaryna qosymşa vagondar tırkeu boiynşa tiıstı ministrlık pen «Qazaqstan temır joly» ūlttyq kompaniiasymen kelıssözder jürgızdık, olar da qoldauǧa äzır. Işkı jäne syrtqy äue reisterın de oilastyryp jatyrmyz.
Oblysta azyq-tülık baǧasyn tekseru jäne deldaldardy anyqtau maqsatynda monitoringtık toptar jūmystanuda. Soŋǧy aptada azyq-tülık tauarlary baǧasynyŋ ösuı baiqalmaidy.
Tek resmi aqparatqa senu kerektıgın esterıŋızge salamyn. Bız üşın eŋ aldymen jerlesterımızdıŋ qauıpsızdıgı men köŋıl-küiı maŋyzdy.
Volonterlerge aitarym bar. Ärine, Abai atamyz «Adamzattyŋ bärın süi bauyrym dep» aitpaqşy, barşaǧa jaqsylyq jasaǧan dūrys qoi, degenmen otandastarymyzdyŋ müddesı bırınşı kezekte ekendıgın ūmytpaǧan jön”, - dep qorytyndylady.
”Adyrna” ūlttyq portaly
