«AMANAT» پارتياسى جانىنداعى كولىك جانە لوگيستيكا كوميتەتىنىڭ وتىرىسىندا ەلىمىزدىڭ ترانزيتتىك قۋاتىن ارتتىرۋ جانە «قازاقستان تەمىر جولى» ۇلتتىق كومپانياسى» اق-نىڭ ترانزيتتىك-لوگيستيكالىق كورپوراتسيا بولىپ قايتا قۇرىلۋى ماسەلەلەرى تالقىلاندى.
وتىرىستى اشا وتىرىپ، كوميتەت توراعاسى، ءماجىلىس دەپۋتاتى سامات اقىشەۆ پرەزيدەنت قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋى رەفورمالار باعىتىنىڭ ساباقتاستىعىن ايقىندايتىنىنا نازار اۋداردى. ال ونى ىسكە اسىرۋ – ەلدەگى جەكە بيزنەستىڭ دامۋىنا تىڭ سەرپىن بەرەدى.
«جولداۋدا كولىك ماسەلەسىنە قاتىستى ايتىلعان تاپسىرمالار قوعام مەن جەكە بيزنەستى تارتا وتىرىپ ورىندالۋى ءتيىس. سول ارقىلى بيزنەس ءوز دامۋىن جوسپارلاي الادى. سالاعا ينۆەستيتسيا قۇيادى جانە ورتاق جاۋاپكەرشىلىكتى ارقالايدى. مەملەكەت باسشىسى ايتقانداي: «ءبىز بۇل مۇمكىندىكتى تولىق پايدالانىپ، الەمدىك ماڭىزى بار كولىك-تاسىمال تورابىنا اينالۋىمىز كەرەك»، – دەپ اتاپ ءوتتى س.اقىشەۆ.
يندۋستريا جانە ينفراقۇرىلىمدىق دامۋ ۆيتسە-ءمينيسترى الماز ىدىرىسوۆ كوميتەت مۇشەلەرىنە قازاقستاننىڭ ترانزيتتىك قۋاتىن ارتتىرۋ بويىنشا قابىلدانىپ جاتقان شارالار تۋرالى باياندادى. ول ترانسكاسپي حالىقارالىق كولىك باعدارىن دامىتۋ ترانزيتتىك جانە ەكسپورتتىق مۇمكىندىكتەردى ارتاراپتاندىرۋعا جاعداي تۋعىزاتىنىن اتاپ ءوتتى.
«الدىمىزدا وسى باعىتتىڭ وتكىزۋ قابىلەتىن 2025 جىلعا قاراي 6 ملن توننادان 10 ملن تونناعا دەيىن ارتتىرۋ مىندەتى تۇر. اتاپ ايتقاندا، اقتاۋ پورتىندا الەمدىك لوگيستيكالىق كومپانيالاردى تارتا وتىرىپ، «كونتەينەرلىك حاب» سالۋ جوسپارلانۋدا. سونداي-اق، كاسپي تەڭىزىندەگى پاروم فلوتىنىڭ تاپشىلىعىنا بايلانىستى، 10 بىرلىك ءوز پارومىمىزدىڭ قۇرىلىسىن باستاۋ جوسپارلانۋدا. بۇعان قوسا، جىلجىمالى تەمىرجول سوستاۆىن جاڭارتۋ ماقساتىندا 2025 جىلعا دەيىن 1500 جارتىلاي ۆاگون، 3500 ۆاگون پلاتفورما جانە 310 لوكوموتيۆ ساتىپ الۋ جوسپارلانىپ وتىر»، – دەدى ۆيتسە-مينيستر.
ءوز كەزەگىندە، «قازاقستان تەمىر جولى» ۇك» اق باسقارما توراعاسىنىڭ ورىنباسارى ءانۋار احمەتجانوۆ ەۋروپا مەن ازيا ەلدەرىنىڭ تۇراقتى ساۋدا كولەمى، تەڭىز تاسىمالىنىڭ تۇراقسىزدىعى مەن جوعارى قۇنى قازاقستاننىڭ كولىك دالىزدەرىنىڭ قۋاتىن ەداۋىر ارتتىراتىنىن اتاپ ءوتتى.
«كەيىنگى 5 جىلدا ءترانزيتتىڭ جىل سايىنعى ءوسىمى ورتا ەسەپپەن 31%-دى قۇرادى. بىلتىر رەكورد ورنادى. ياعني، ترانزيت 1 ملن جفە-دەن (كونتەينەرلەردەن) استى. بۇل ناتيجەگە ۇكىمەت پەن قتج-نىڭ جوسپارلى جۇمىسى ارقىلى قول جەتكىزىلدى. ترانزيتتىك تاسىمالداردان تۇسەتىن كىرىس رەتتەلەتىن قاتىناستارداعى شىعىنداردى جابۋدى، جولاۋشىلار تاسىمالىن سۋبسيديالاۋدى، تاريفتەردىڭ ءوسۋىن تەجەۋدى قامتاماسىز ەتەدى»، – دەدى ول.
بۇل رەتتە، سامات اقىشەۆ، ت/ج تاسىمالدارى نارىعىنداعى نەگىزگى ويىنشى مارتەبەسىنە قاراماستان، سالانىڭ باسەكەگە قابىلەتىن ارتتىرۋ ءۇشىن «قازاقستان تەمىر جولى» كولىك جانە لوگيستيكالىق قىزمەتتەر سالاسىنا جەكە كومپانيالاردى كەڭىنەن تارتۋعا ىقپال ەتۋى ءتيىس دەپ ەسەپتەيدى.
«قتج ءبىر ىڭعايلى مەحانيزمدى پىسىقتاۋى قاجەت. بۇل مەحانيزم قتج-عا اۋىرتپاشىلىق تۇسىرەتىن مىندەتتەردى ورىنداۋعا بيزنەستى ىنتالاندىرۋ ءتيىس. اشىق جانە ءادىل ويىن ەرەجەلەرىن قالىپتاستىرۋ كەرەك. تۇپتەپ كەلگەندە، جۇك تاسىمالى ءتاريفىنىڭ ءار ادامعا قاتىسى بار»، – دەدى كوميتەت توراعاسى.
وتىرىس قورىتىندىسى بويىنشا، كەڭەس بەيىندى ورتالىق اتقارۋشى ورگان مەن «قتج»-عا ارنالعان بىرقاتار ناقتى ۇسىنىمدار قابىلدادى. اتاپ ايتقاندا، يندۋستريا جانە ينفراقۇرىلىمدىق دامۋ مينيسترلىگى باسەكەلەستىكتى قورعاۋ جانە دامىتۋ اگەنتتىگىمەن جانە باس كولىك پروكۋراتۋراسىمەن بىرلەسىپ، بيزنەستى قورعاۋ جانە جەكە سەكتوردى قولداۋ جونىندە ءتيىمدى شارالار قابىلداۋ قاجەتتىگىنە نازار اۋداردى.
