BI Group باسشىسى ايدىن راحىمباەۆ رەسەيدەن كەلگەن ەتنيكالىق قازاقتارعا استانا مەن اتىراۋداعى جاتاقحانالاردان ورىن بەرىپ، تاماقپەن قامتاماسىز ەتۋگە ۋادە بەردى. بۇل تۋرالى ول ءوزىنىڭ الەۋمەتتىك جەلىلەردەگى پاراقشالارىندا جازدى، دەپ حابارلايدى “ادىرنا” ۇلتتىق پورتالى.
“قانداس باۋىرلار! سوڭعى كۇندەرى كورشى ەلدە بولعان جاعدايلار بىزگە دە اۋىر ءتيىپ جاتىر. موبيليزاتسيا دەگەن سۇمدىق نارسە عوي.. اسىرەسە ورىنبور، ومبى، استراحان وڭىرلەرىندەگى مايدانعا جۇزدەگەن قازاق باۋىرلارىمىزدى دا الىپ كەتىپ جاتىر ەكەن. جاسىن دا، كارىسىن دە. وبال-اي... كەتكەندەردىڭ كوبى امان كەلمەيتىنى انىق قوي.
سوندىقتان ءبىز جىگىتتەرمەن كەلگەن اسكەر جاسىنداعى قازاقتارعا استانا، اتىراۋداعى جاتاقحانالاردان ورىن مەن تاماعىن بەرىپ، كومەكتەسەيىك دەپ شەشتىك. ەلگە قاراي جەتسە بولدى عوي. اعايىندار، قازىر ءسوز بەن داۋ كوپ، بىراق كوپ داۋلاسپاي، ءوزىمىزدىڭ قاراپايىم قازاقتارىمىزدى قۇتقارىپ قالايىقشى…
وسىنداي جاعدايلاردا ءبىر-بىرىمىزگە قولداۋ كورسەتپەسەك، قاشان جانە كىم كورسەتەدى”، - دەپ جازدى ايدىن راحىمباەۆ.
”ادىرنا” ۇلتتىق پورتالى
⠀
