الماتىدا شوب كاسىپورىندارىنىڭ سانى 33,7%-عا ءوستى

1549
Adyrna.kz Telegram

«ۇلتتىق تابىستىڭ يگىلىگىن ءبارى بىردەي كورىپ وتىرعان جوق». بۇل پرەزيدەنت قاسىم-جومارت كەمەلۇلىنىڭ جولداۋدا ايتقان ءسوزى ەدى.  مەملەكەت باسشىسى ءوزى اتاپ وتكەندەي، بۇنىڭ بارلىعى –كۇردەلى ماسەلەلەر. ونى شەشۋدىڭ جولدارى سان تاراپتى. سونىڭ ءبىرى – شاعىن جانە ورتا بيزنەستى دامىتۋ.الماتى قالالىق اكىمدىگىنىڭدە باستى باسىمدىق بەرىپ وتىرعان سالاسى- شاعىن جانە ورتا بيزنەس. اتالعان سالانى دامىتۋ مەگاپوليس باسشىلىعىنىڭ الدىنا قويعان مەرەيلى مىندەتى بولىپ تابىلادى. بۇل تۋرالى بيزنەس، سالالىق قاۋىمداستىق جانە «اتامەكەن» ۇكپ وكىلدەرىمەن كەزدەسۋدە قالا اكىمى ەربولات دوساەۆ مالىمدەدى، دەپ حابارلايدى "ادىرنا" ءتىلشىسى. 

مەملەكەتتىك بيۋدجەت كىرىسىنىڭ تورتتەن ءبىر بولىگى جانە قازاقستاننىڭ بارلىق ساۋدا وپەراتسياسىنىڭ 35%-دان استامى الماتىعا تيەسىلى. ال مەگاپوليستىڭ شاعىن جانە ورتا بيزنەسى قالانىڭ 65% جۇمىسپەن قامتاماسىز ەتەدى.

ەربولات دوساەۆ ءماسليحات قابىلداعان «الماتى قالاسىن 2025 جىلعا دەيىن دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالارى» تۋرالى ايتىپ بەردى.

قۇجاتتا باسىم سالالار ايقىندالعان. بۇل وڭدەۋ ونەركاسىبى، كرەاتيۆتى يندۋستريا، IT سالا جانە تۋريزم. جۇمىس ورىندارىن قۇرۋعا، ينۆەستيتسيا تارتۋعا جانە ىسكەرلىك ورتانى جاقسارتۋعا باسا ءمان بەرىلەدى.

«الماتىنىڭ بولاشاق دامۋىنىڭ جەتىستىگى مەن جوسپارلاردىڭ جۇزەگە اسۋى ەكونوميكانىڭ تۇراقتى وسۋىمەن، تۇراقتى قارجىلىق كىرىستەرمەن جانە كاسىپكەرلەر ءۇشىن دە، سىرتقى ينۆەستورلار ءۇشىن دە قولايلى ىسكەرلىك كليماتپەن انىقتالادى دەگەن نىق سەنىمدەمىن»، – دەدى اكىم ءوز سوزىندە.

2022 جىلعى 1 قىركۇيەكتەگى جاعداي بويىنشا الماتىدا 262 مىڭ شاعىن جانە ورتا بيزنەس سۋبەكتىسى جۇمىس ىستەيدى. وتكەن جىلدىڭ وسى كەزەڭىمەن سالىستىرعاندا شوب كاسىپورىندارىنىڭ سانى 33,7%-عا ءوستى. بيىل ولاردى دامىتۋعا مەملەكەتتىك جانە قالالىق باعدارلامالار اياسىندا 47,6 ملرد تەڭگە ءبولىندى. 1,3 مىڭنان استام جوبا ماقۇلداندى.

 

 

پىكىرلەر