ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى ماقسات تولىقباي شاعىن جانە ورتا بيزنەسكە ارنالعان مەملەكەتتىك قولداۋ شارالارىنىڭ ءتيىمسىز جۇزەگە اسىرىلىپ جاتقانىن مالىمدەدى، دەپ حابارلايدى «ادىرنا» ءتىلشىسى.
«سوڭعى كەزدەرى شاعىن جانە ورتا بيزنەستىڭ نەسيەسىنە بيۋدجەتتەن سۋبسيديانىڭ كەشىكتىرىپ بەرىلەتىنى ء«تارتىپسىز» تارتىپكە اينالدى. ەلىمىزدە ءجۇز مىڭداعان كاسىپكەر ونسىز دا قىمبات نەسيەسىنىڭ پايىزدىق سىياقىسىنا مەملەكەت ۋادە ەتكەن وتەماقىنى ايلاپ الا الماي، سارىلىپ كۇتىپ وتىر. قىسىلتاياڭ شاقتا كاسىپكەرلەردى قولتىعىنان سۇيەيدى دەگەن باعدارلاما قازىر الماتى قالاسىنان باسقا ءوڭىردىڭ بارىندە توقىراپ تۇر. بىراق وڭتۇستىكتەگى مەگاپوليستىڭ كاسىپكەرلەرىنە دە تىقىر تايانعان. قالعان وڭىرلەردە سۋبسيدياعا بولىنگەن قارجى جازدا تاۋسىلىپ قالعان، جاڭا وتىنىشتەر ازىرگە جاۋاپسىز قالىپ وتىر»،–دەدى ول پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە جولداعان دەپۋتاتتىق ساۋالىندا.
ماقسات تولىقباي ۇلتتىق بانك بازالىق مولشەرلەمەنى كوتەرگەندىكتەن، ەكىنشى دەڭگەيلى بانكتەر بەرەتىن نەسيە مەن ليزينگ شارتتارى كاسىپكەرلەر ءۇشىن وتە اۋىر ەكەنىن اتاپ ءوتتى.
«بيزنەسكە بەرەتىن نەسيەنىڭ پايىزدىق سىياقىسىنىڭ جىلدىق مولشەرلەمەسى 25 پايىزعا جەتەدى. باتپانداي بورىشتى ورتا جانە شاعىن بيزنەس قالاي تولەيدى؟ مۇنداي قىمبات نەسيەمەن الەمدە قانداي بيزنەس جوسپار بولسا دا تابىسقا كەنەلمەيدى. «دامۋ» قورى جىل باسىنان بەرى بانكتەر شاعىن جانە ورتا بيزنەستىڭ جالپى قۇنى 300 ملرد تەڭگە بولاتىن 2 200 جوباسىن ماقۇلداعانى تۋرالى دەرەك ۇسىنادى. ال شىن مانىندە 120 ملرد تەڭگە عانا جۇمسالعان، ياعني ءوتىنىش بەرگەندەردىڭ 40 پايىزى عانا نەسيەگە قول جەتكىزگەن. قالعان كاسىپكەرلەر قولداۋسىز، قۇرالاقان قالدى. وسىدان كەيىن بيزنەس مەملەكەتتىك باعدارلامالارعا قالاي ارقا سۇيەيدى؟ مەملەكەتكە سەنىم بولماسا، وندا ساندا بار، ساناتتا جوق مۇنداي باعدارلامالاردان نە پايدا؟»–دەدى ول.
