ورال قالاسىندا «قالا كۇنى» مەرەكەسىنە وراي «ساپالى ءونىم – 2022» ازىق-تۇلىك وندىرۋشىلەرىنىڭ كورمەسى ءوتتى.
ءداستۇرلى كورمەگە قالامىزدان بارلىعى 15 كاسىپورىن مەن جەكە كاسىپكەرلەر قاتىسىپ، ءوز ونىمدەرىن ۇسىندى. اتالمىش كورمە بيىل 14-ءشى رەت ۇيىمداستىرىلىپ وتىر.
ورال قالاسىنىڭ اكىمى ميرجان ساتقانوۆ جارمەڭكەنى ارالاپ، كاسىپكەرلەردىڭ ونىمدەرىمەن تانىسىپ شىقتى. شاھار تۇرعىندارىن مەرەكەمەن قۇتتىقتاعان جارمەڭكەگە قاتىسقان ۇزدىك جەرگىلىكتى تاۋار وندىرۋشىلەرىنە ارنايى العىس حات پەن ەستەلىك سىيلىقتار تابىس ەتتى.
– «ساپالى ءونىم» جارمەڭكەسى جىل سايىن ءداستۇرلى تۇردە ءوتىپ كەلەدى. اۋا رايىنىڭ قولايسىزدىعىنا قاراماستان بەلسەنە قاتىسىپ جاتقان كاسىپكەرلەرگە العىسىمدى بىلدىرەمىن. سىزدەر ەكولوگيالىق تازا ءونىم ءوندىرىپ، نارىققا شىعارىپ، ەل ەكونوميكاسىنا ەلەۋلى ۇلەس قوسىپ كەلەسىزدەر، – دەدى قالا اكىمى ميرجان مۇنايدارۇلى.
ماراپاتتالعاندار قاتارىندا «جەلاەۆ استىق ونىمدەرى كومبيناتى» اق، «بالزيا»، «نۇرجانار»، «ورال قۇس فابريكاسى»، «رودنيك»، «اگروفيرما»، «اقاس»، «ورال ءسۇت زاۋىتى»، «ورال شۇجىقتارى» جاۋاپكەرشىلىگى شەكتەۋلى سەرىكتەستەرى مەن «بەلەس كومپانيالار توبى»، «ۆاليەۆ»، «انتيپوۆ ۆ.م»، «كاۆەرينا س.ۆ»، «وماروۆ ر.ە»، «تالەتسكي و.ۆ» جەكە كاسىپكەرلىكتەرى، «KAZKON» ورال كونديتەرلىك فابريكاسى بار.
سونىمەن قاتار، ءدال وسى ۋاقىتتا اربات بويىندا «جايىق قالاشىعى» قىلقالام شەبەرلەرى، «سۇيىكتى قالام – ورالىم» اتتى فوتوسۋرەتشىلەر جانە موبيلوگرافتار بايقاۋى، «گۇلدەر» فەستيۆالى مەن «ۇلتتىق تاعامدار» كورمەسى دە ۇيىمداستىرىلدى. تۇرعىندارعا ەرەكشە كوڭىل-كۇي سىيلاۋ ماقساتىندا قالامىزداعى ەتنو-مادەني بىرلەستىكتەر دايىنداعان مەرەكەلىك كونتسەرتتە نازارعا ۇسىنىلدى.
