Oral qalasynda «Qala kúni» merekesine oraı «Sapaly ónim – 2022» azyq-túlik óndirýshileriniń kórmesi ótti.
Dástúrli kórmege qalamyzdan barlyǵy 15 kásiporyn men jeke kásipkerler qatysyp, óz ónimderin usyndy. Atalmysh kórme bıyl 14-shi ret uıymdastyrylyp otyr.
Oral qalasynyń ákimi Mırjan Satqanov jármeńkeni aralap, kásipkerlerdiń ónimderimen tanysyp shyqty. Shahar turǵyndaryn merekemen quttyqtaǵan jármeńkege qatysqan úzdik jergilikti taýar óndirýshilerine arnaıy alǵys hat pen estelik syılyqtar tabys etti.
– «Sapaly ónim» jármeńkesi jyl saıyn dástúrli túrde ótip keledi. Aýa raıynyń qolaısyzdyǵyna qaramastan belsene qatysyp jatqan kásipkerlerge alǵysymdy bildiremin. Sizder ekologııalyq taza ónim óndirip, naryqqa shyǵaryp, el ekonomıkasyna eleýli úles qosyp kelesizder, – dedi qala ákimi Mırjan Munaıdaruly.
Marapattalǵandar qatarynda «Jelaev astyq ónimderi kombınaty» AQ, «Balzııa», «Nurjanar», «Oral qus fabrıkasy», «Rodnık», «Agrofırma», «Aqas», «Oral sút zaýyty», «Oral shujyqtary» jaýapkershiligi shekteýli seriktesteri men «Beles kompanııalar toby», «Valıev», «Antıpov V.M», «Kaverına S.V», «Omarov R.E», «Talekıı O.V» jeke kásipkerlikteri, «KAZKON» Oral kondıterlik fabrıkasy bar.
Sonymen qatar, dál osy ýaqytta Arbat boıynda «Jaıyq qalashyǵy» qylqalam sheberleri, «Súıikti qalam – Oralym» atty fotosýretshiler jáne mobılograftar baıqaýy, «Gúlder» festıvali men «Ulttyq taǵamdar» kórmesi de uıymdastyryldy. Turǵyndarǵa erekshe kóńil-kúı syılaý maqsatynda qalamyzdaǵy etno-mádenı birlestikter daıyndaǵan merekelik konertte nazarǵa usynyldy.
