ريم پاپاسى كادىمگى پەرىشتە سياقتى عوي، ءبىر گرامم ارامدىق، قۋلىق جوق - شىڭعىس مۇقان

2227
Adyrna.kz Telegram

         الەمدىك جانە ءداستۇرلى دىندەر كوشباسشىلارىنىڭ VII سەزىنە كەلگەن قوناقتار شوعىرى الەم جۇرتشىلىعىنىڭ نازارىن قازاق ەلىنە اۋداردى. ريم پاپاسى فرانتسيسكتى كورۋگە، بىرگە ءمىناجات ەتۋگە كەلگەن كوپشىلىكتىڭ قاراسى قالىڭ.  ەلورداداعى ءىس-شاراعا پولشا، رەسەي، قىتاي، مالايزيا مەن كەنيادان ارنايى كەلگەندەر بار. مۇنداي اۋقىمدى جوبانىڭ بارىسى ەل ءىشى، ساياسي ەليتا وكىلدەرىنىڭ تاراپىنان دا قىزۋ تالقىلانۋدا.

ساياساتكەر، شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان دا كاتوليكتەرگە قاتىستى ءوز پىكىرىن ءبىلدىردى:

"2000 جىل. الماتىدا اۋدارماشىلىققا وقىپ ءجۇرمىن. اعىلشىنشامەن قوسا، ءبىرىنشى كۋرستان باستاپ يسپان ءتىلىن وقىدىم. ءتىلدى كىتاپتان وقيمىز. ءتىل دەگەن تەك جازعاندى ءتۇسىنۋ ەمەس، ەڭ الدىمەن ايتقاندى ءتۇسىنۋ جانە ءوز ويىڭدى جەتكىزۋ. ايتقاندى تۇسىنبەسەڭ، ويىڭدى دا جەتكىزە المايسىڭ. سودان، انا ءتىلى يسپانشا ادامداردى ىزدەدىك. بىرەۋلەردىڭ نۇسقاۋىمەن تاپتىق.

الماتىداعى جەلتوقسان مەن اباي كوشەلەرىنىڭ قيىلىسىنداعى ەسكى ەكى-ءۇش قاباتتى ۇيلەردەگى پاتەرلەردىڭ بىرىندە بىرنەشە كاتوليك ءدىن قىزمەتكەرى تۇرادى ەكەن. ءبىرى يتاليا، ءبىرى ارگەنتينا، ءبىرى يسپانيادان ەكەن… اپتاسىنا ەكى رەت بارىپ، يسپانشا سويلەسىپ تۇرامىز. قىستا تاۋعا بىرگە بارامىز. قانداي جاقسى ادامدار ەدى. ءبىرىنىڭ ەسىمى كارلوس، ەسىمدە قالعانى.

ءبىر جاعىنان تارتىنامىز. ءدىنتاراتۋشى دەپ ويلايمىز ىشتەي. توڭىرەگىمىز سەكتاعا ۇرىنىپ قالما دەپ قۇلاققا قۇيىپ وتىرادى. جامان كەز بولدى عوي سول ءبىر ۋاقىت. ەگەمەندىككە ون-اق جىل. نەنىڭ نە ەكەنىن ءالى بىلە بەرمەيمىز. يسپانشا ۇيرەنگىمىز كەلەدى، بىراق ساقتانىپ ءجۇرمىز. الايدا جارىقتىقتار كاتوليك بول دەگەندەي ءبىر اۋىز ءسوز ايتپادى، ەمەۋرىن دە بايقامادىق. جاسپىز عوي. 16-18 جاستامىز. بىزگە قىزىعى موينىنا اق لەنتا تاعىپ جۇرەتىن قارا كيىمدى مولدالارىن پادرە دەپ اتايدى ەكەن جانە ولار ۇيلەنبەيدى. بىزدەر، بالالىق قوي، نەگە، سوندا قالاي دەپ قايتا-قايتا سۇرايمىز.

الگى بايعۇستار (دەپ قويمىز-اۋ، كىمنىڭ شىن مانىندە بايعۇس ەكەنىن بىلمەي جاتىپ) تۇسىندىرەدى كەلىپ، ونى ءتۇسىنىپ جاتقان ءبىز جوق. قازىرگى كۇننىڭ بيىگىمەن قاراسام، كەشە استاناعا كەلگەن پاپانى باسشى كورەتىن پادرەلەر شىنىندا دا اۋليە (سۆياتوي) ەكەن. كادىمگى پەرىشتە سياقتى عوي، ءبىر گرامم ارامدىق، قۋلىق جوق. اۋزىن اشسا، جۇرەگى كورىنەدى.

كاتوليكتەرگە قاتىستى پىكىرىم، مىنە وسىلاي قالىپتاستى.  پاپانى كورە المادىق، شىمكەنتتە بولدىق. بىراق پادرەلەردى كوردىك. پادرەلەر سولاي بولسا، پاپا قالاي بولماق، اقىلىم جەتپەيدى. ادامزاتقا جاقسىلىق تىلەگەننىڭ، بەيبىتشىلىكتى ناسيحات ەتكەننىڭ ءبارى كىم بولسىن، قاي ءدىندى ۇستانسىن، قاي ۇلتتان بولسىن، امان بولسىن! پاپا كىم، مەن كىممىن دەگەندەي! پاپا - تالاي تاريحتى مۇراگەر ەتكەن الەمدىك تۇلعا، تۇسىنگەنگە. امان جۇرگەي، فرانتسيسك اكەي!" - دەپ جازدى اۆتور.

 

پىكىرلەر