Älemdık jäne dästürlı dınder köşbasşylarynyŋ VII sezıne kelgen qonaqtar şoǧyry älem jūrtşylyǧynyŋ nazaryn Qazaq elıne audardy. Rim Papasy Fransisktı köruge, bırge mınäjat etuge kelgen köpşılıktıŋ qarasy qalyŋ. Elordadaǧy ıs-şaraǧa Polşa, Resei, Qytai, Malaiziia men Keniiadan arnaiy kelgender bar. Mūndai auqymdy jobanyŋ barysy el ışı, saiasi elita ökılderınıŋ tarapynan da qyzu talqylanuda.
Saiasatker, Şymkent qalasy äkımınıŋ bırınşı orynbasary Şyŋǧys Mūqan da katolikterge qatysty öz pıkırın bıldırdı:
"2000 jyl. Almatyda audarmaşylyqqa oqyp jürmın. Aǧylşynşamen qosa, bırınşı kurstan bastap ispan tılın oqydym. Tıldı kıtaptan oqimyz. Tıl degen tek jazǧandy tüsınu emes, eŋ aldymen aitqandy tüsınu jäne öz oiyŋdy jetkızu. Aitqandy tüsınbeseŋ, oiyŋdy da jetkıze almaisyŋ. Sodan, ana tılı ispanşa adamdardy ızdedık. Bıreulerdıŋ nūsqauymen taptyq. Almatydaǧy Jeltoqsan men Abai köşelerınıŋ qiylysyndaǧy eskı ekı-üş qabatty üilerdegı päterlerdıŋ bırınde bırneşe katolik dın qyzmetkerı tūrady eken. Bırı İtaliia, bırı Argentina, bırı İspaniiadan eken… Aptasyna ekı ret baryp, ispanşa söilesıp tūramyz. Qysta tauǧa bırge baramyz. Qandai jaqsy adamdar edı. Bırınıŋ esımı Karlos, esımde qalǧany. Bır jaǧynan tartynamyz. Dıntaratuşy dep oilaimyz ıştei. Töŋıregımız sektaǧa ūrynyp qalma dep qūlaqqa qūiyp otyrady. Jaman kez boldy ǧoi sol bır uaqyt. Egemendıkke on-aq jyl. Nenıŋ ne ekenın älı bıle bermeimız. İspanşa üirengımız keledı, bıraq saqtanyp jürmız. Alaida jaryqtyqtar katolik bol degendei bır auyz söz aitpady, emeurın de baiqamadyq. Jaspyz ǧoi. 16-18 jastamyz. Bızge qyzyǧy moinyna aq lenta taǧyp jüretın qara kiımdı moldalaryn padre dep ataidy eken jäne olar üilenbeidı. Bızder, balalyq qoi, nege, sonda qalai dep qaita-qaita sūraimyz. Älgı baiǧūstar (dep qoimyz-au, kımnıŋ şyn mänınde baiǧūs ekenın bılmei jatyp) tüsındıredı kelıp, ony tüsınıp jatqan bız joq. Qazırgı künnıŋ biıgımen qarasam, keşe astanaǧa kelgen Papany basşy köretın padreler şynynda da äulie (sviatoi) eken. Kädımgı perışte siiaqty ǧoi, bır gramm aramdyq, qulyq joq. Auzyn aşsa, jüregı körınedı. Katolikterge qatysty pıkırım, mıne osylai qalyptasty. Papany köre almadyq, Şymkentte boldyq. Bıraq padrelerdı kördık. Padreler solai bolsa, Papa qalai bolmaq, aqylym jetpeidı. Adamzatqa jaqsylyq tılegennıŋ, beibıtşılıktı nasihat etkennıŋ bärı kım bolsyn, qai dındı ūstansyn, qai ūlttan bolsyn, aman bolsyn! Papa kım, men kımmın degendei! Papa - talai tarihty mūrager etken älemdık tūlǧa, tüsıngenge. Aman jürgei, Fransisk äkei!" - dep jazdy avtor.
Ūqsas jaŋalyqtar
