قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا «تسيفرلاندىرۋ، عىلىم جانە يننوۆاتسيا ەسەبىنەن تەحنولوگيالىق سەرپىلىس» ۇلتتىق جوباسىن ىسكە اسىرۋ بارىسى قارالدى، دەپ حابارلايدى «ادىرنا» ءتىلشىسى.
عىلىم جانە جوعارى ءبىلىم ءمينيسترى ساياسات نۇربەك ۇلتتىق جوبا اياسىندا عىلىمي ەكوجۇيەنىڭ باسەكەگە قابىلەتتىلىگىن ارتتىرۋ بويىنشا جۇرگىزىلىپ جاتقان جۇمىستار تۋرالى ايتىپ بەردى.
بايانداماشىلاردى تىڭداعان پرەمەر-مينيستر ۇلتتىق جوبانى ىسكە اسىرۋ IT-سالاداعى جالپى ىشكى ءونىمنىڭ ۇلەسىن 5%-عا دەيىن ۇلعايتىپ، قولدانبالى عىلىمي زەرتتەۋلەردى قارجىلاندىرۋدا جەكە سەكتوردىڭ ۇلەسىن كەمىندە 50%-عا ارتتىرۋى ءتيىس ەكەنىن ايتتى. سونىمەن قاتار ونىڭ اياسىندا ازاماتتارعا الەۋمەتتىك قولداۋ الۋدى جەڭىلدەتۋگە مۇمكىندىك بەرەتىن جوبالار پۋلى ىسكە اسىرىلىپ جاتىر.
«جاقىندا پيلوتتىق نەگىزدە ىسكە قوسىلعان «وتباسىنىڭ تسيفرلىق كارتاسى» جوباسى وسى تاسىلدەردىڭ ءبىرى بولىپ تابىلادى. بۇل جوبا اتاۋلى الەۋمەتتىك كومەك الۋعا مۇقتاجدىق تۋى مۇمكىن 480 مىڭنان استام وتباسىن جانە زەينەتاقى تولەمدەرى مەن جاردەماقى الىپ وتىرعان 100 مىڭعا جۋىق ازاماتتى قامتۋعا مۇمكىندىك بەردى. جوبانى بيىلعى جىلدىڭ سوڭىنا دەيىن پايدالانۋعا بەرۋ جوسپارلانىپ وتىر»، — دەدى ءاليحان سمايىلوۆ.
ونىڭ ايتۋىنشا، «الەۋمەتتىك ءاميان» جۇيەسىن ىسكە قوسۋ جانە ينۆەستورلارعا ناقتى ۋاقىت رەجيمىندە مينەرالدىق رەسۋرستاردىڭ دەرەكتەر بانكىنە ەركىن قول جەتكىزۋگە مۇمكىندىك بەرەتىن «Kaznedra» پلاتفورماسىن ەنگىزۋ جوسپارلانىپ وتىر.
پرەمەر-مينيستر ۇكىمەت الدىندا عىلىمي زەرتتەۋلەردىڭ ناتيجەلىلىگى مەن ەكونوميكانىڭ ءتۇرلى سەكتورلارىندا قولدانىلۋىن ارتتىرۋ سياقتى ماڭىزدى مىندەت تۇرعانىن اتاپ ءوتتى.
وسى ورايدا ءاليحان سمايىلوۆ سوڭعى جىلدارى عىلىم تۋرالى زاڭناماعا ءبىرشاما وزگەرىستەر ەنگىزىلگەنىن جانە ونى قارجىلاندىرۋ 2 ەسەگە جۋىق وسكەنىن ايتتى.
«بىزگە جۇمسالعان قاراجاتتىڭ ءتيىمدى قايتارىمى قاجەت. وتاندىق يندۋستريا، عىلىمي قوعامداستىق، ۋنيۆەرسيتەتتەر مەن بيزنەس بارىنشا ءوزارا تىعىز بايلانىس ورناتۋى قاجەت. عىلىمي جەتىستىكتەر وندىرىسكە ەنگىزىلىپ، حالىققا ناقتى پايدا اكەلۋى ءتيىس. عىلىم مينيسترلىگى بۇعان ەرەكشە نازار اۋدارۋى كەرەك»، — دەدى ءاليحان سمايىلوۆ.
بۇل رەتتە پرەمەر-مينيستر بىرقاتار باعىتتار بويىنشا بۇرىن بەلگىلەنگەن جوسپارلار مەن كەيبىر كورسەتكىشتەردىڭ ورىندالماي قالعانىن اتاپ ءوتتى. پاتسيەنتتەردىڭ دەنساۋلىق جاعدايىن ۇزدىكسىز باقىلاۋ جانە پرواكتيۆتى مەديتسينالىق قىزمەت كورسەتۋ ءۇشىن eHealth بىرىڭعاي ەكوجۇيەسىن ازىرلەۋ جۇمىستارى ۋاقىتىلى جۇرگىزىلگەن جوق. سونىمەن قاتار «تسيفرلىق اگروكاسىپورىن» جانە «تسيفرلىق كارەر» جوبالارىن ىسكە اسىرۋ بارىسىندا دا سۇراقتار بار. جەر مەن جىلجىمايتىن مۇلىكتىڭ مەملەكەتتىك كاداسترىن اۆتوماتتاندىرۋ جانە ورتالىقتاندىرۋ ءراسىمى اياقتالعان جوق.
«جالپى، ينتەرنەت-قىزمەتتەردىڭ ساپاسىنا سۇراقتار بار. الىستاعى ەلدى مەكەندەردى ايتپاعاندا، ءبىزدىڭ ءىرى قالالارىمىزدا ينتەرنەت بايلانىستىڭ ساپاسى بارلىق جەردە بىردەي جاقسى ەمەس. حالىقتان ءتۇسىپ جاتقان شاعىم كوپ. ەگەر ينتەرنەت بايلانىس جاقسى بولماسا تسيفرلىق پلاتفورمالاردىڭ جانە اقپاراتتىق جۇيەلەردىڭ پايداسى جوق. تسيفرلىق دامۋ مينيسترلىگى بۇل ماسەلەنى ەرەكشە باقىلاۋدا ۇستاۋ كەرەك»، — دەدى ءاليحان سمايىلوۆ.
سونداي-اق ول تسيفرلاندىرۋ سالاسىنداعى بارلىق مۇددەلى مەملەكەتتىك ورگانداردىڭ جانە ۇيىمداردىڭ جۇمىسىن ۇيلەستىرۋدى كۇشەيتۋ قاجەت ەكەنىن ايتتى.
ءسوز سوڭىندا ءاليحان سمايىلوۆ اقپاراتتىق جۇيەلەردىڭ ىستەن شىعۋىن ازايتاتىن جۇيەلى شارالار قابىلداۋدى، بيىلعى جىلدىڭ سوڭىنا دەيىن «وتباسىنىڭ تسيفرلىق كارتاسى» جانە «الەۋمەتتىك ءاميان» جوبالارىنىڭ ءتيىمدى جۇمىسىن قامتاماسىز ەتۋدى، سونداي-اق 2023 جىلدىڭ سوڭىنا دەيىن «Kaznedra» پلاتفورماسىن ىسكە قوسۋدى تاپسىردى.
