قىزىلوردا قالاسى ماڭىنداعى قىزىلجارما كەنتىندە كوپبالالى وتباسى تۇرىپ جاتقان ۇيدەن ءورت شىعىپ، ءبىر بالا كوز جۇمدى. ءتورت بالا اناسىمەن بىرگە اۋرۋحاناعا جەتكىزىلدى، دەپ حابارلايدى “ادىرنا” ۇلتتىق پورتالى استانا تەلەارناسىنا سىلتەمە جاساپ.
ءورت بەيسەنبىگە قاراعان ءتۇنى شىققان، ول ۋاقىتتا بالالار ۇيىقتاپ جاتقان. جەڭىل ماتەريالداردان سالىنعان ۋاقىتشا تۇرۋعا ارنالعان ءۇي بىردەن جانىپ كەتتى.
ءورت سوندىرۋشىلەر قوڭىراۋ تۇسكەننەن كەيىن وقيعا ورنىنا بىرنەشە مينۋت ىشىندە جەتىپ، جارتى ساعات ىشىندە ءورتتى ءسوندىردى. الايدا ول ۋاقىتتا 2020 جىلى تۋعان بالا تۇنشىعىپ قالعان. 28 جاستاعى ايەل مەن ءتورت بالا امان قالدى. ايەلدىڭ قولى قاتتى كۇيىپ قالعان، 8, 7, 5 جانە 2 جاستاعى ءتورت بالاعا ەكىنشى دارەجەلى كۇيىك دياگنوزى قويىلعان. ولاردىڭ ومىرىنە قاۋىپ ءتونىپ تۇرعان جوق.
"استانا" تەلەراناسىنىڭ حابارلاۋىنشا، بالالاردىڭ اكەسى ءىسساپاردا بولعان. وتباسىنىڭ كورشىلەرى ءورتتى بايقاعان كەزدە اناسى بالالارىن تەرەزە ارقىلى شىعارىپ جاتقان. الايدا بەسىنشى بالاسىنا كومەكتەسە الماعان. سەبەبى التى ايلىق ءسابي بەسىكتە جاتقان.
وتباسى ۋاقىتشا تۇرۋعا ارنالعان ءۇيدى جالداپ جۇرگەن. تانىستارىنىڭ ايتۋىنشا، بار تاپقان-تايانعانىن پاتەراقىسىنا بەرەدى.
"زاڭ بويىنشا ءبىز ولارعا 6 ايعا دەيىن ءۇي جالداپ بەرۋگە دايىنبىز. سونىمەن قاتار ءۇيدى قالپىنا كەلتىرۋ ماقساتىندا قالا مەتسەناتتارىمەن كەلىسسوزدەر جۇرگىزدىك. ولار دا كومەكتەسۋگە دايىن. سونداي-اق قارجىلىق، ازىق-تۇلىك سەكىلدى شارالاردى قاراستىرامىز", - دەدى قىزىلوردا قالاسى اكىمىنىڭ ورىنباسارى ەرمۇرات راحماتۋللاەۆ.
قازاقستاندىقتار بۇل جاعدايعا بەي-جاي قاراماي، ءورت كەسىرىنەن ءۇي-جاي، مۇلكىنەن ايىرىلعان وتباسىعا كومەك رەتىندە قارجى جيناپ جاتىر.
