31 جەلتوقسان كۇنى تالدىقورعان قالاسىنىڭ شەتىندە ورنالاسقان ەكى قاباتتى جەكە ۇيدە جارىلىس بولىپ، ءبىر وتباسىنىڭ جەتى مۇشەسى كۇيىك پەن جاراقات الىپ، قالالىق اۋرۋحانالارعا جەتكىزىلدى، دەپ حابارلايدى "ادىرنا" ۇلتتىق پورتالى.
جەتىسۋ وبلىسى تجد مالىمەتىنشە، جارىلىس سالدارىنان ءۇيدىڭ ەكىنشى قاباتى، قابىرعالارى مەن شاتىرى قۇلاپ، 120 شارشى مەتر اۋماقتا ءورت شىققان.
"الدىن الا بولجام بويىنشا، ءورت تابيعي گازدىڭ اعۋىنان پايدا بولعان گاز-اۋا قوسپاسىنىڭ جارىلۋىنان بولعان. بارلىق زارداپ شەككەندەر ءتۇرلى دارەجەدە كۇيىك العان", – دەپ حابارلادى وبلىستىق تجد ءباسپاسوز قىزمەتى.
گازدىڭ قاي جەردە اعىپ كەتكەنى ازىرگە بەلگىسىز. وقيعا بويىنشا قىلمىستىق كودەكستىڭ 306-بابىنىڭ 2-بولىگى "قاۋىپسىزدىك تالاپتارىنا ساي كەلمەيتىن تاۋارلار شىعارۋ نەمەسە وتكىزۋ، جۇمىستار ورىنداۋ نە قىزمەتتەر كورسەتۋ" بويىنشا قىلمىستىق ءىس قوزعالدى.
وبلىستىق دەنساۋلىق ساقتاۋ باسقارماسى زارداپ شەككەندەردىڭ جاعدايى تۋرالى ازىرگە اقپارات بەرگەن جوق. بەلگىلىسى – بارلىق جەتى ادام ءبىر وتباسىنىڭ مۇشەلەرى جانە ءارتۇرلى مەديتسينالىق مەكەمەلەرگە جاتقىزىلعان. ولاردىڭ ۇشەۋى – كامەلەت جاسىنا تولماعان بالالار.
وقيعا ورنىندا جەرگىلىكتى گاز كومپانياسىنىڭ ماماندارى مەن قۇقىق قورعاۋ ورگاندارىنىڭ قىزمەتكەرلەرى جۇمىسىن جالعاستىرۋدا. تەرگەۋ وبلىستىق پوليتسيا دەپارتامەنتىنە تاپسىرىلعان، قاجەتتى ساراپتامالار جۇرگىزىلۋدە.
