تۇركىستان وبلىسىندا 38,5 ملن تەڭگە اتاۋلى الەۋمەتتىك كومەك زاڭسىز تولەنگەن. بۇل تۋرالى وڭىرلىك كوممۋنيكاتسيا قىزمەتىندە وتكەن بريفينگىدە جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىرباەۆا مالىمدەدى، دەپ حابارلايدى “ادىرنا” ۇلتتىق پورتالى.
تۇگەندەۋ جۇمىستارىنىڭ بارىسىندا 22 مىڭنان استام اتاۋلى الەۋمەتتىك كومەك تاعايىنداۋلارى تەكسەرىلىپ، زاڭسىز تولەنگەن 38,5 ملن تەڭگەنىڭ 27 ملن تەڭگەسى بيۋدجەتكە قايتارىلعان. اسىرەسە، ماقتارال، سارىاعاش، كەلەس، قازىعۇرت، جەتىساي اۋداندارى مەن تۇركىستان، كەنتاۋ قالالارىندا زاڭ بۇزۋشىلىقتار كوپتەپ ورىن العان.
سونىمەن بىرگە مەملەكەتتىك گرانتتاردى بەرۋ زاڭدىلىعىن تەكسەرۋ كەزىندە دە زاڭسىزدىقتار انىقتالىپ، 18,1 ملن تەڭگەنىڭ 11,2 ملن تەڭگەسى بيۋدجەتكە قايتقان. ماسەلەن، 27 ادام ەكى رەت گرانت السا، 31 ادام تۇراقتى جۇمىسى بولا تۇرا گرانت يەگەرى دەپ تانىلعان. سونداي-اق، ولاردىڭ 90 پايىزى مىندەتتى تولەمدەردى ۋاقتىلى اۋدارماعان.
“شارت بويىنشا اقشانى قۇرىلىسقا، ساۋدا-ساتتىققا جانە توي-تومالاققا جۇمساۋعا بولمايدى. كوپشىلىگى «مەن بىلمەدىم، مەنىڭ جاعدايىم تومەن ەدى، ەمدەلۋگە جۇمسادىم» دەپ اقتالعىسى كەلەدى. دەگەنمەن، زاڭنىڭ اتى – زاڭ. قارجى تەك ماقساتتى تۇردە جۇمسالۋى قاجەت. ۇسىنىلعان بيزنەس جوسپاردان اۋىتقۋعا بولمايدى”، - دەدى ءاسيا قۇرالقىزى.
ءاسيانىڭ ايتۋىنشا، بيىل 1 قىركۇيەكتە وبلىستا 32,1 مىڭ از قامتىلعان وتباسىعا 8,7 ملرد تەڭگەگە ااك كورسەتىلگەن. ەڭبەككە جارامدى 51 222 ااك الۋشىنىڭ 35 302 ادام جۇمىسپەن قامتىلدى. سونداي-اق، ااك الۋشىلاردىڭ 1-6 جاسقا دەيىنگى 47,8 مىڭ بالاعا 1,9 ملرد تەڭگەگە كەپىلدەندىرىلگەن الەۋمەتتىك توپتاما تاعايىندالعان.
”ادىرنا” ۇلتتىق پورتالى
