Túrkistan oblysynda 38,5 mln teńge ataýly áleýmettik kómek zańsyz tólengen. Bul týraly óńirlik kommýnıkaııa qyzmetinde ótken brıfıngide jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva málimdedi, dep habarlaıdy “Adyrna” ulttyq portaly.
Túgendeý jumystarynyń barysynda 22 myńnan astam ataýly áleýmettik kómek taǵaıyndaýlary tekserilip, zańsyz tólengen 38,5 mln teńgeniń 27 mln teńgesi bıýdjetke qaıtarylǵan. Ásirese, Maqtaral, Saryaǵash, Keles, Qazyǵurt, Jetisaı aýdandary men Túrkistan, Kentaý qalalarynda zań buzýshylyqtar kóptep oryn alǵan.
Sonymen birge memlekettik granttardy berý zańdylyǵyn tekserý kezinde de zańsyzdyqtar anyqtalyp, 18,1 mln teńgeniń 11,2 mln teńgesi bıýdjetke qaıtqan. Máselen, 27 adam eki ret grant alsa, 31 adam turaqty jumysy bola tura grant ıegeri dep tanylǵan. Sondaı-aq, olardyń 90 paıyzy mindetti tólemderdi ýaqtyly aýdarmaǵan.
“Shart boıynsha aqshany qurylysqa, saýda-sattyqqa jáne toı-tomalaqqa jumsaýǵa bolmaıdy. Kópshiligi «men bilmedim, meniń jaǵdaıym tómen edi, emdelýge jumsadym» dep aqtalǵysy keledi. Degenmen, zańnyń aty – zań. Qarjy tek maqsatty túrde jumsalýy qajet. Usynylǵan bıznes jospardan aýytqýǵa bolmaıdy”, - dedi Ásııa Quralqyzy.
Ásııanyń aıtýynsha, bıyl 1 qyrkúıekte oblysta 32,1 myń az qamtylǵan otbasyǵa 8,7 mlrd teńgege AÁK kórsetilgen. Eńbekke jaramdy 51 222 AÁK alýshynyń 35 302 adam jumyspen qamtyldy. Sondaı-aq, AÁK alýshylardyń 1-6 jasqa deıingi 47,8 myń balaǵa 1,9 mlrd teńgege kepildendirilgen áleýmettik toptama taǵaıyndalǵan.
”Adyrna” ulttyq portaly
