گۇلميرا ساتىبالدى ادام ۇرلاۋمەن اينالىستى دەپ ايىپتالدى. بۇل تۋرالى سىبايلاس جەمقورلىققا قارسى قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
سىبايلاس جەمقورلىققا قارسى قىزمەت گۇلميرا ساتىبالدىعا، ونىڭ باقىلاۋىنداعى «اريا-جاڭا استانا» جشس كومپانياسىنىڭ باسشىلىعىنا جانە مەملەكەتتىك ورگانداردىڭ لاۋازىمدى تۇلعالارىنا قاتىستى وبەكتىلەردى سالۋعا بولىنگەن بيۋدجەت قاراجاتىن جىمقىرۋ فاكتىلەرى بويىنشا تەرگەۋدى جالعاستىرۋدا.
بىرنەشە وبەكتىلەر بويىنشا ءىس جۇزىندە ورىندالماعان قۇرىلىس-مونتاجداۋ جۇمىستارىنا اقى تولەۋ ناتيجەسىندە مەملەكەتكە جالپى سوماسى 3,9 ميليارد تەڭگەگە اسا ءىرى مولشەردە زالال كەلتىرىلدى.
تەرگەۋ ساتىسىندا قابىلدانعان شارالارمەن مەملەكەتكە كەلتىرىلگەن زالال تولىق وتەلدى.
سونداي-اق، وعان جانە ونىڭ سەنىمدى تۇلعالارىنا قاتىستى بىرقاتار كاسىپورىنداردىڭ قاتىسۋ ۇلەستەرى مەن اكتيۆتەرىن زاڭسىز يەلەنۋ، ادامدى ۇرلاۋ جانە باس بوستاندىعىنان زاڭسىز ايىرۋ فاكتىلەرى بويىنشا تەرگەۋ جۇرگىزىلۋدە. جابىرلەنۋشىلەرگە كەلتىرىلگەن زالالدىڭ الدىن الا سوماسى 6,6 ميليارد تەڭگەدەن اسادى.
ايتا كەتەيىك، گۇلميرا ساتىبالدى - قازاقستان ەكس-پرەزيدەنتى نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ بۇرىنعى ايەلى.
”ادىرنا” ۇلتتىق پورتالى
