سىبايلاس جەمقورلىققا قارسى قىزمەت گۇلميرا ساتىبالدىعا، ونىڭ باقىلاۋىنداعى «اريا-جاڭا استانا» جشس كومپانياسىنىڭ باسشىلىعىنا جانە مەملەكەتتىك ورگانداردىڭ لاۋازىمدى تۇلعالارىنا قاتىستى وبەكتىلەردى سالۋعا بولىنگەن بيۋدجەت قاراجاتىن جىمقىرۋ فاكتىلەرى بويىنشا تەرگەۋدى جالعاستىرىپ جاتىر. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
بىرنەشە نىسان بويىنشا ءىس جۇزىندە ورىندالماعان قۇرىلىس-مونتاجداۋ جۇمىستارىنا اقى تولەۋ ناتيجەسىندە مەملەكەتكە جالپى سوماسى 3,9 ميليارد تەڭگەگە اسا ءىرى مولشەردە زالال كەلتىرىلدى.
تەرگەۋ ساتىسىندا قابىلدانعان شارالاردىڭ ناتيجەسىندە مەملەكەتكە كەلتىرىلگەن زالال تولىق وتەلگەن.
«سونىمەن قاتار، گ.ساتىبالدى مەن ونىڭ سەنىمدى تۇلعالارىنا قاتىستى بىرقاتار كاسىپورىنداردىڭ قاتىسۋ ۇلەستەرى مەن اكتيۆتەرىن زاڭسىز يەلەنۋ، ادامدى ۇرلاۋ جانە باس بوستاندىعىنان زاڭسىز ايىرۋ فاكتىلەرى بويىنشا تەرگەۋ جۇرگىزىلۋدە. جابىرلەنۋشىلەرگە كەلتىرىلگەن زالالدىڭ الدىن الا سوماسى 6,6 ميليارد تەڭگەدەن اسادى»، - دەلىنگەن انتيكور حابارلاماسىندا.
كۇدىكتى ادامدار كۇزەتپەن ۇستالىپ، تەرگەۋ جالعاسۋدا.
ەسكە سالايىق، 17 ناۋرىزدا سىبايلاس جەمقورلىققا قارسى قىزمەت قايرات ساتىبالدىۇلىنا، ونىڭ بۇرىنعى جۇبايى گۇلميرا ساتىبالدىعا جانە باسقا دا تۇلعالارعا قاتىستى بيزنەستى رەيدەرلىك باسىپ الۋ فاكتىسى بويىنشا سوتقا دەيىنگى تەرگەۋدى باستادى.
16 ناۋرىزدا گ.ساتىبالدى قر قىلمىستىق-پروتسەستىك كودەكسىنىڭ 128-بابى بويىنشا ۇستالىپ، نۇر-سۇلتان قالاسىنىڭ ۋاقىتشا ۇستاۋ يزولياتورىنا قامالعان بولاتىن.
”ادىرنا” ۇلتتىق پورتالى
