الماتى وبلىسى تالعار اۋدانىنداعى قوقىس ۇيىندىسىنە شىققان يىسكە تۇرعىندار شاعىمدانۋدا، دەپ حابارلايدى " ادىرنا" ءتىلشىسى.
جەرگىلىكتى حالىق ءيىسىن بىلاي قويعاندا، ەلدى مەكەندە ەگەۋقۇيرىقتاردىڭ قاتاپ كەتكەنىن ايتىپ الەك. ال، پوليگون يەسى بيزنەسى ءۇشىن الاڭداۋدا.
پوليگون اۋىلدان شامامەن ءجۇز مەتردەي جەردە ورنالاسقان. قوقىستىڭ ءيىسى بۇكىل اۋىلعا جايىلىپ، تۇرعىندار تەرەزە اشا المايتىن جاعدايعا جەتكەن. ءيىس ءوز الدىنا اۋىلدى ەگەۋقۇيرىقتار جايلاي باستاعاندىقتان تۇرعىندار پوليگوندى جابۋدى نەمەسە ورنىن باسقا جەرگە اۋىستىرۋدى تالاپ ەتۋدە.
“قوقىس الاڭى ۇيىمىزدەن ءجۇز-اق مەتر جەردە ورنالاسقان. وعان جينالعان جاندىكتەر، قۇستار مەن ەگەۋقۇيرىقتار تۇرلى ينفەكتسيا تاراتادى. قالدىقتار سىڭگەن جەردەن ءبىز سۋ ءىشىپ وتىرمىز. قازىر سىرقاتتانعان بالالار مەن قاريالار كوپ. ال بۇل پوليگونعا قاراپ جاتقان ەشكىم جوق. جينالماي شاشىلىپ جاتىر",- دەدى تالعار اۋدانىنىڭ تۇرعىنى جاننا كيم.
جوسپار بويىنشا بۇل جەردە قوقىس الاڭى ەمەس، كەرىسىنشە قوقىستى وڭدەيتىن زاۋىت سالىنۋى قاجەت بولعان. بىراق سول كۇيى قۇرىلىس باستالماعان ەكەن. سالدارىنان كاسىپكەر اكىمدىك ءبولىپ بەرگەن جەرگە قوقىس توگۋگە كىرىسكەن. ەكولوگتار قازىر پوليگوننىڭ 1 گەكتاردان استام جەردى الىپ جاتقانىن ايتتى.
“زەرتتەۋدىڭ ناتيجەسى بويىنشا اۋانىڭ ەكولوگيالىق تا، سانيتارلىق تا تالاپتارعا ساي ەمەس ەكەنى انىقتالدى. اۋاداعى مىس پەن مىرىش 8-8,5 پايىزعا ارتىق. ءارى پوليگون قورشالماعان. جەر استى سۋلارىنىڭ لاستانۋ دەڭگەيىن باقىلايتىن ارنايى قۇرىلعىلار دا ورناتىلماپتى. مۇنىڭ ءبارى ەلدىڭ دەنساۋلىعىنا زيان”،- دەدى تالعار اۋدانى بويىنشا ەكولوگيالىق كەڭەستىڭ توراعاسى ميراس بايسەيىتوۆ.
