ۇلتتىڭ رۋحاني كوسەمى

2068
Adyrna.kz Telegram

بۇگىن تىلدەر كۇنى جانە ءتىل اتاسى، الاشتىڭ رۋحاني كوسەمى، ۇلتتىڭ ۇلى ۇستازى احمەت بايتۇرسىنۇلىنىڭ تۋعانىنا 150 جىل.

ۇلىقتالار ماڭگىلىك
ۇلت كوسەمى،
احاڭ دەسە، كوڭىلدەن بۇلت كوشەدى…
الاش جىرىن كەتتى عوي اماناتتاپ،
ازاتتىققا ۇمتىلعان جۇرت كەشەگى…
ۇلىقتالار ماڭگىلىك
ۇلت كوسەمى!

قازاق دەسە، وت ويناپ قانىمىزدا،
قايرات بەرەر قايران ەر جانىمىزعا!
ۇلتتىڭ ۇلى ۇستازى
تۋعان جەرگە،
تىزە بۇگەر قالىڭ ەل، حانىڭىز دا…

باسسا دا ءالى كيەلى
جەرىمدى مۇڭ،
ازاتتىعىم - ماڭگىلىك!
سەنىمدىمىن!
توزدىرۋعا تورعايدى بولمايدى دەپ،
وزدىرۋعا كەلىپ تۇر
ەلىڭ بۇگىن!

ۇلى تويدىڭ ەستۋدە
ەل ءدۇبىرىن،
ونەگە ەتىپ ايتامىز
ەر عۇمىرىن.
اتىلاتىن ۇعىمدى “ۇلتشىل” دەگەن،
ارداقتايتىن ۋاقىت كەلدى بۇگىن!

ۇلتتى وياتقان كۇرەسىڭ - ماڭگى بەلگى!
زۇلمات زامان قىردى عوي بارلىق ەردى…
قادىرىڭە جەتە الماي تىرىڭدە جۇرت،
قابىرىڭە جەتە الماي قالدىق ەندى…

ءاليحان مەن مىرجاقىپ ارىستارىم،
ارداقتادى احاڭداي دانىشپانىن،
قۇربان بولعان ەرلەردىڭ قازاق ءۇشىن،
اڭىز ەتىپ ايتادى ەل الىسقانىن…

ايىرىلىپ قالارداي پايدادان بار،
اڭدىپ ءجۇردى جاۋلارىڭ اينالاڭدا ءار…
ارداقتىعا اينالعان اسىل ەردى،
اباقتىعا، اجالعا ايداعاندار!

ساناسا دا ساتقىندار قادامىڭدى،
سارا جولعا سالۋمەن سانالى ۇلدى،
قازاق ءۇشىن جۇمسادىڭ قالامىڭدى…
كەشەگى يتتەر جارىسىپ قاپقان سەنى،
بۇگىن مەنىڭ تىستەۋدە بالاعىمدى…

ايىپتاسام، ۇلتقا جات مىڭ دەرەكتى،
ۇلتسىزدارىڭ بولۋدا مۇلدە كەكتى…
الىپپەنى قازاقشا بىلمەيتىندەر،
الىپپەڭمەن الىسقان كۇندەر ءوتتى…

ەلىم بار دا، ءتىلىم جوق - جايىم اناۋ…
وزەك ورتەر ءاربىر كۇن - دايىن الاۋ!..
قوجايىننىڭ تىلىنە قۇلدار قۇمار،-
تابىت قانا قامىتتان ايىرادى-اۋ!؟.

ءتىلىم ءۇشىن نەگە ۇزاپ بارادى داۋ؟!.
ساڭلاقتارىم سانا ءۇشىن
سان ارىدى-اۋ…
كەتكەن كەشە ايدالىپ كەمەڭگەردى،
كۇتىپ جاتقان سارعايىپ دالا مىناۋ!..

ۇلت كوسەمى - ۇلتىمنىڭ تازا ارى ەدىڭ،
ارۋىنىڭ اققۇمنىڭ عاجاپ ءوڭىن،
انگە بولەپ، تەربەتتىڭ
ساز الەمىن.
ورىس قىزىن اياۋلى قازاق ەتتىڭ،
ۇلتسىز كوسەم ال ءبىزدىڭ… جازار ەدىم-
ورىس قىلدى وتىز جىل قازاق ەلىن!

ءتىل اتاسىن تىڭدا ەلىم، تىڭدا دالا!
نەگىزگى ۇلتىم نەگىزسىز مۇڭدانا ما؟!.
ەل تاۋەلسىز بولعالى
ءوتتى وتىز جىل!-
ءتىل تاۋەلسىز بولاتىن كۇن بولا ما؟!.

ءوز تىلىنە وگەيلەر،
وشىكتى قۇل…
تەڭدىك سۇراپ كەلەمىز كەشىپ عۇمىر…
بىزدە ءبارىن الاڭدا شەشىپتى كىل…
ءتىلسىز جاۋلار كوبەيدى -ءورت قوسىلدى،
ءتىل اتاسى تويى دا
كەشىكتى بۇل…

جۇرەكتەردە شەمەن بوپ شەر دە تەڭىز…
ءتىلسىز ءتىرى ەمەسپىز،
كەر كەتەمىز…
ازات تىلگە اينالار
قازاق ءتىلى! -
سەنىڭ ۇلى تويىڭدا سەرت ەتەمىز!

قازىبەك يسا

پىكىرلەر