Búgin Tilder kúni jáne til atasy, Alashtyń rýhanı kósemi, Ulttyń uly ustazy Ahmet Baıtursynulynyń týǵanyna 150 jyl.
Ulyqtalar máńgilik
Ult kósemi,
Ahań dese, kóńilden bult kóshedi…
Alash jyryn ketti ǵoı amanattap,
Azattyqqa umtylǵan jurt keshegi…
Ulyqtalar máńgilik
Ult kósemi!
Qazaq dese, ot oınap qanymyzda,
Qaırat berer qaıran er janymyzǵa!
Ulttyń Uly Ustazy
týǵan jerge,
Tize búger qalyń el, hanyńyz da…
Bassa da áli kıeli
jerimdi muń,
Azattyǵym - Máńgilik!
Senimdimin!
Tozdyrýǵa Torǵaıdy bolmaıdy dep,
Ozdyrýǵa kelip tur
Eliń búgin!
Uly toıdyń estýde
el dúbirin,
Ónege etip aıtamyz
er ǵumyryn.
Atylatyn uǵymdy “Ultshyl” degen,
Ardaqtaıtyn ýaqyt keldi búgin!
Ultty oıatqan kúresiń - máńgi belgi!
Zulmat zaman qyrdy ǵoı barlyq erdi…
Qadirińe jete almaı tirińde jurt,
Qabirińe jete almaı qaldyq endi…
Álıhan men Mirjaqyp arystarym,
Ardaqtady Ahańdaı danyshpanyn,
Qurban bolǵan Erlerdiń Qazaq úshin,
Ańyz etip aıtady el alysqanyn…
Aıyrylyp qalardaı paıdadan bar,
Ańdyp júrdi jaýlaryń aınalańda ár…
Ardaqtyǵa aınalǵan asyl erdi,
Abaqtyǵa, ajalǵa aıdaǵandar!
Sanasa da satqyndar qadamyńdy,
Sara jolǵa salýmen sanaly uldy,
Qazaq úshin jumsadyń qalamyńdy…
Keshegi ıtter jarysyp qapqan seni,
Búgin meniń tisteýde balaǵymdy…
Aıyptasam, ultqa jat myń derekti,
Ultsyzdaryń bolýda múlde kekti…
Álippeni qazaqsha bilmeıtinder,
Álippeńmen alysqan kúnder ótti…
Elim bar da, Tilim joq - jaıym anaý…
Ózek órter árbir kún - daıyn alaý!..
Qojaıynnyń tiline quldar qumar,-
Tabyt qana qamyttan aıyrady-aý!?.
Tilim úshin nege uzap barady daý?!.
Sańlaqtarym sana úshin
san arydy-aý…
Ketken keshe aıdalyp kemeńgerdi,
Kútip jatqan sarǵaıyp dala mynaý!..
Ult kósemi - Ultymnyń taza ary ediń,
Arýynyń Aqqumnyń ǵajap óńin,
Ánge bólep, terbettiń
saz álemin.
Orys qyzyn aıaýly qazaq ettiń,
Ultsyz kósem al bizdiń… jazar edim-
Orys qyldy otyz jyl Qazaq elin!
Til atasyn tyńda elim, tyńda dala!
Negizgi ultym negizsiz muńdana ma?!.
El Táýelsiz bolǵaly
ótti otyz jyl!-
Til Táýelsiz bolatyn kún bola ma?!.
Óz tiline ógeıler,
óshikti qul…
Teńdik surap kelemiz keship ǵumyr…
Bizde bárin alańda sheshipti kil…
Tilsiz jaýlar kóbeıdi -órt qosyldy,
Til atasy toıy da
keshikti bul…
Júrekterde shemen bop sher de teńiz…
Tilsiz tiri emespiz,
ker ketemiz…
Azat Tilge aınalar
Qazaq Tili! -
Seniń uly toıyńda Sert etemiz!
Qazybek ISA
