باس پروكۋراتۋرا "تاسماعامبەتوۆكە قاتىستى تەرگەۋ جۇمىستارى تۋرالى" اقپاراتقا تۇسىنىكتەمە بەردى، - دەپ حابارلايدى "ادىرنا" ءتىلشىسى باس پروكۋراتۋرانىڭ ءباسپاسوز قىزمەتىنە سىلتەمە جاساپ.
«الەۋمەتتىك جەلىلەردە باس پروكۋراتۋرانىڭ ۆەدومستۆوارالىق تەرگەۋ توبى ي.ن.تاسماعامبەتوۆكە قاتىستى ونىڭ «Astana LRT» جشس-دا قارجى جىمقىرۋعا قاتىسى بار فاكتىسى بويىنشا تەكسەرۋ جۇرگىزگەنى تۋرالى حابارلاما تارالۋدا.
باس پروكۋراتۋرا بۇل اقپارات شىندىققا جاناسپايدى دەپ حابارلايدى.
ءبىز ازاماتتاردى تەك رەسمي اقپارات كوزدەرىنە سەنۋگە شاقىرامىز.
يمانعالي تاسماعامبەتوۆ ديرەكتورلار كەڭەسىنىڭ مۇشەسى، 2021 جىلدىڭ ماۋسىمىندا كاماز تاۋەلسىز ديرەكتورى بولىپ سايلاندى.
تاسماعامبەتوۆ 1993 جىلدان 1995 جىلعا دەيىن قازاقستان پرەزيدەنتىنىڭ كومەكشىسى، 1995 جىلدان 1997 جىلعا دەيىن پرەمەر-ءمينيستردىڭ ورىنباسارى قىزمەتىن اتقاردى. سونداي-اق ءارتۇرلى ۋاقىتتا پرەزيدەنت اكىمشىلىگى باسشىسىنىڭ ورىنباسارى جانە پرەزيدەنتتىڭ ءبىرىنشى كومەكشىسى قىزمەتتەرىن اتقاردى. 2002 جىلى پرەمەر-مينيستر، 2003 جىلى مەملەكەتتىك حاتشى بولىپ تاعايىندالدى. كەيىن الماتى قالاسىنىڭ اكىمى (2004-2008), ەلوردا اكىمى (2008-2014) بولدى.
2014 جىلدىڭ 22 قازانىندا تاسماعامبەتوۆ قازاقستاننىڭ قورعانىس ءمينيسترى بولىپ تاعايىندالدى. 2016 جىلدىڭ 13 قىركۇيەگىندە پرەمەر-ءمينيستردىڭ ورىنباسارى بولدى. 2017 جىلدىڭ 3 اقپانىنان باستاپ رەسەيدەگى توتەنشە جانە وكىلەتتى ەلشى قىزمەتىن اتقاردى. 2019 جىلى جەلتوقساندا يمانعالي تاسماعامبەتوۆ زەينەتكەرلىك جاسقا تولۋىنا بايلانىستى قازاقستاننىڭ رەسەيدەگى ەلشىسى قىزمەتىنەن بوساتىلدى.
"ادىرنا" ۇلتتىق پورتالى
