القابيلەر اقتاپ شىققان ەكس-شەنەۋنىك جانە ەكس-ەلشى كوكىرەكباەۆ ۇزاق مەرزىمگە سوتتالدى

جامبىل وبلىسىنىڭ بۇرىنعى اكىمى كارىم كوكىرەكباەۆ 12 جىلعا سوتتالدى. بۇل تۋرالى بۇگىن، 3 شىلدەدە الماتى وبلىسى سوتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.

ەكس-باسشىدان بولەك، ونىڭ ورىنباسارى ادىلەت احاتاەۆ پەن مەردىگەر اندرەي پوپلاۆسكي كىنالى دەپ تانىلدى.

كوكىرەكباەۆ پەن احاتاەۆقا قىلمىستىق كودەكستىڭ 366-بابى (اسا ءىرى مولشەردە پارا الۋ), ال پوپلاۆسكيعا 195 جانە 367-باپتارى (اسا ءىرى مولشەردە پارا بەرۋ، سونداي-اق ۇرلاۋ ماقساتىنسىز مۇلىكتىك زالال كەلتىرۋ) بويىنشا ايىپ تاعىلدى.

«تەرگەۋ مالىمەتتەرى بويىنشا كوكىرەكباەۆ پەن احاتاەۆ لاۋازىمدى تۇلعالار بولا وتىرىپ، مەردىگەر ۇيىمنىڭ ديرەكتورى پوپلاۆسكيمەن ءسوز بايلاسىپ، ورىندالعان جۇمىستار اكتىلەرىنە كەدەرگىسىز قول قويۋ ءۇشىن اسا ءىرى كولەمدە پارا العان. سونداي-اق پوپلاۆسكي شىن مانىندە ورىندالماعان قۇرىلىس-مونتاج جۇمىستارىنىڭ اكتىلەرىنە قول قويۋدى ۇيىمداستىرعان»،—دەلىنگەن حابارلامادا.

بۇل ارەكەتتەردىڭ سالدارىنان مەملەكەتكە 2 ميلليارد تەڭگەگە جۋىق شىعىن كەلگەن.

سوت ۇكىمىمەن كوكىرەكباەۆ 12 جىلعا، احاتاەۆ پەن پوپلاۆسكي 11 جىلعا باس بوستاندىعىنان ايىرىلدى. ۇكىم زاڭدى كۇشىنە ەنگەن جوق.

ەسكە سالايىق، كارىم كوكىرەكباەۆ 2022 جىلى ۇستالعان بولاتىن.  2023 جىلعى 24 مامىردا الماتى وبلىسى بويىنشا سىبايلاس جەمقورلىققا قارسى قىزمەت «قازسەلدەنقورعاۋدىڭ» ءبىر ەمەس، بىرنەشە باسشىسىنا قاتىستى سوتقا دەيىنگى تەرگەۋدىڭ اياقتالعانى تۋرالى حابارلاعان. سول كەزدە ولاردىڭ كاسىپكەرلەردەن ورىندالعان جۇمىستار اكتىلەرىنە قول قويعانى جانە جالپى قامقورلىعى ءۇشىن جالپى سوماسى 396 ملن تەڭگەگە ءىرى جانە اسا ءىرى كولەمدە پارا العانى ايتىلعان.

كەيىن كارىم كوكىرەكباەۆ سوتتا اقتالىپ شىققان. الايدا 2024 جىلعى 25 شىلدەدە الماتى وبلىستىق سوتى «قازسەلدەنقورعاۋ» مەملەكەتتىك مەكەمەسىنىڭ بۇرىنعى باسشىسىنا قاتىستى اقتاۋ ۇكىمىنىڭ كۇشىن جويىپ، قىلمىستىق ءىس ءبىرىنشى ساتىداعى سوتقا قايتا قاراۋعا جىبەرىلگەن. ال كوكىرەكباەۆ سوت زالىندا قاماۋعا الىنعان.

ايتا كەتەيىك، ول 2019 جىلى «قازسەلدەنقورعاۋ» مەملەكەتتىك مەكەمەسىنىڭ باسشىسى بولىپ تاعايىندالعان. بۇدان بولەك، 2018-2019 جىلدارى قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى، 2013-2018 جىلدار ارالىعىندا جامبىل وبلىسىنىڭ اكىمى لاۋازىمدارىن اتقارعان.