قىركۇيەكتىڭ 13 كۇنى الماتى قالاسىنىڭ ۇلان گۆاردياسى № 75/52 بولىمشەسىندە اۋعان سوعىسى ارداگەرلەرى بايبالاقوۆ ەرجان، ءجۇسىپوۆ ءالي، ءجۇسىپوۆ سەرىكباي جانە مولداباەۆ قاناتپەن كەزدەسۋ ءوتتى.
بۇل جيىندى «ادىرنا» ۇلتتىق ەتنوگرافيالىق بىرلەستىگى الماتى قالاسى ىشكى ساياسات باسقارماسىنىڭ قولداۋىمەن "ازاماتتىق بورىش" جوباسى اياسىندا وتكىزدى. وسى كەزدەسۋدى ۇيىمداستىرۋ "ادىرنا" بىرلەستىگىنىڭ باسشىسىنىڭ ورىنباسارى بەيبىت ءنالىباي، جوبا جەتەكشىسى دوس سىماعۇل جانە باسقالاردىڭ اۋعان سوعىسى ارداگەرلەرىمەن ەتەنە جاقىن ارالاسۋىنىڭ ارقاسىندا ۇيىمداستىرىلعان بۇل جۇزدەسۋگە ءتورت ارداگەر قاتىستى. ساربازدار تاراپىنان قىزىعۋشىلىق ۇلكەن تانىتىلىپ كەزدەسۋ وتە تارتىمدى ءوتتى.
كەزدەسۋدى № 75/52 بولىمشەنىڭ مايورى سالتانات سەرىكباي اشتى. كەزەگىمەن ءسوز العان اردارگەرلەر ىركىلگەن جوق. قالاي اسكەر قاتارىنا الىنعانىن، سوعىستاعى قيىنشىلىقتار مەن ەرلىككە تولى سول ءبىر جاستىق شاقتارىن قىزعىلىقتى ەتىپ بايانداي ءبىلدى. ساربازداردىڭ كوز الدىندا الىس تا بولسا جاقىن، جاقىن دا بولسا الىس، سول ءبىر قاندى سۇراپىل قارۋلى قاقتىعىستارعا تولى وقيعالاردى كوز الدىنان ەلەستەتىپ وزدەرى باستارىنان كەشكەندەي اسەر الدى.
قازىرگى تىنىشتىق جايلاعان ەلىمىزدە سوعىستا بولعان ادامداردىڭ اۋزىنان ەستىگەن اڭگىمە وتە اسەرلى بولاتىنى ارداگەرلەردى تىڭداپ وتىرعان ساربازداردىڭ ويلى دا وتتى كوزقاراستارىنان كورىنىپ تۇردى.
كۇن-ءتۇن دەمەي شارشاۋ مەن شالدىعۋ دەگەندى مويىنداماي، وق پەن وتتىڭ ورتاسىندا ءجۇرۋ كىمگە دە بولسا ۇلكەن سىن. نەبىر قيىنشىلىقتاردى باسىنان وتكەرگەن قوناقتار سول ءبىر كەزدەگى وقيعالاردى كەزەگىمەن باياندادى.
بىرنەشە كۇن بويى تاۋ باسىندا سۋ ىشپەي قينالىپ جاتسا دا، شەپتەن شەگىنبەي جاۋعا قارسى سوعىسۋ تۋرالى ەستۋ كىمگە دە بولسا وڭاي ەمەس. سونىمەن جازدىڭ اپتاپ ىستىعىندا، جاۋىنگەرلەر تاۋ شاتقالىندا جاتىر. اسپاننان كۇن كۇيدىرىپ تۇر، اينالا تاۋ مەن تاس. جوعارىدا جارتاستارعا تىعىلعان ولىسپەي بەرىسپەۋگە بەكىنگەن موجداحەدتەر اڭدىسىپ اتىسۋدا.
تومەن جاقتا، تۋراسىن ايتقاندا تاياق تاستام جەردە، ابدەن شولدەگەن ساربازداردى مازاقتاعانداي بۇلاقتىڭ سالقىن سۋى سىلدىراپ اعۋدا. بىرنەشە كۇن سۋ ىشپەي ەرنىدەرى كەزەرگەن ساربازدارىن ايادى ما، ساردار ءبىر جاۋىنگەردى سۋعا جۇمسادى. بىراق... ءيا، بىراق... اۋعاندىق مەرگەننىڭ مىلتىعىنىڭ اتىلعان وعىنىڭ داۋىسى ەستىلەر زامات جاڭاعى جاۋىنگەر بۇلاققا جەتە قۇلادى. ەكىنشى جاۋىنگەر دە سۋعا جەتە المادى... وسىلايشا ءبىر جۇتىم سۋ ءۇشىن بىرنەشە جاس ءومىر قىرشىننان قيىلدى.
ەندى نە ىستەۋ كەرەك؟ كەڭەسە كەلە اۋعان موجداحەدتەرى تىعىلىپ جاتقان جارتاستى شابۋىلداۋعا شەشىم قابىلداندى. تاڭ ەلەڭ-الاڭدا جاۋىنگەرلەر بيىككە ورمەلەي باستادى. بۇلاي بولادى دەپ كۇتپەگەن جاۋلار ويسىراي جەڭىلدى.
وسى جيىندا بۇنداي وقيعالاردىڭ قانشاماسى ەسكە الىندى؟! باياندالعاندا دا بۇل وقيعالاردى، كەزدەيسوق ادامدار ەمەس، قانداي وقيعا بولسا دا مايىن تامىزا قىزعىلىقتى ەتىپ جازا الاتىن جازۋشىلار ەمەس، سول وتتىڭ ورتاسىندا بولعان، ءولىمنىڭ كوزىنە تىكە قاراي العان، ول كەزدەرى جاپ-جاس، قازىر اۋعان سوعىسىنىڭ ارداگەرلەرى اتانعان اعالار ايتىپ جاتتى.
اعالاردىڭ نازارىنان الەمدى شىرماپ الۋعا جانتالاسىپ جاتقان ءدىني تەرروريزم تۋرالى دا كەڭىنەن اڭگىمە بولدى. ءدىني سەنىمنىڭ ەلىمىزدىڭ ۇلتتىق سالت-داستۇرلەرىنە، ءجۇرىس-تۇرىسى مەن كيىم كيىسىنە ەش قاتىسى جوق ەكەنى ايتىلدى. قازىرگى تاڭدا كەيبىر جاستاردىڭ بىلمەستىكتەن كەيبىر ءدىني كۇشتەردىڭ زىميان شىرماۋىنا ءتۇسىپ قالىپ، قيىن جاعدايعا ۇشىراپ جاتقانى دا ارداگەرلەر تاراپىنان قاتتى سىنعا الىندى.
سەزىمگە تولى وسى ءبىر سوزدەردى ۇلان گۆاردياسى № 75/52 بولىمشەسىنىڭ جاۋىنگەرلەرى سىلتىدەي تىنىپ تىڭدادى.
ەكى ساعاتتىڭ قالاي تەز وتكەنى ەشكىم دە بايقاماي قالدى. جاۋىنگەرلەر ريزا بولىسىپ، ارداگەر اعالاردىڭ اڭگىمەلەرىنەن تىڭ كۇش العانداي. ال ارداگەر بولسا ءالى دە ايتارىمىز مول، دەگەندەي جانارلارى نۇر شاشىپ تۇردى. ءوز كەزەگىندە اسكەري بولىمشە مايورى سالتانات سەرىكباي ءالى دە بۇنداي كەزدەسۋلەردىڭ ءجيى بولىپ تۇراتىنىن ايتتى.
"ادىرنا" پورتالى
