Qyrkúıektiń 13 kúni Almaty qalasynyń Ulan gvardııasy № 75/52 bólimshesinde Aýǵan soǵysy ardagerleri Baıbalaqov Erjan, Júsipov Álı, Júsipov Serikbaı jáne Moldabaev Qanatpen kezdesý ótti.
Bul jıyndy «Adyrna» ulttyq etnografııalyq birlestigi Almaty qalasy Ishki saıasat basqarmasynyń qoldaýymen "Azamattyq borysh" jobasy aıasynda ótkizdi. Osy kezdesýdi uıymdastyrý "Adyrna" birlestiginiń basshysynyń orynbasary Beıbit Nálibaı, joba jetekshisi Dos Symaǵul jáne basqalardyń Aýǵan soǵysy ardagerlerimen etene jaqyn aralasýynyń arqasynda uıymdastyrylǵan bul júzdesýge tórt ardager qatysty. Sarbazdar tarapynan qyzyǵýshylyq úlken tanytylyp kezdesý óte tartymdy ótti.
Kezdesýdi № 75/52 bólimsheniń maıory Saltanat Serikbaı ashty. Kezegimen sóz alǵan ardargerler irkilgen joq. Qalaı ásker qataryna alynǵanyn, soǵystaǵy qıynshylyqtar men erlikke toly sol bir jastyq shaqtaryn qyzǵylyqty etip baıandaı bildi. Sarbazdardyń kóz aldynda alys ta bolsa jaqyn, jaqyn da bolsa alys, sol bir qandy surapyl qarýly qaqtyǵystarǵa toly oqıǵalardy kóz aldynan elestetip ózderi bastarynan keshkendeı áser aldy.
Qazirgi tynyshtyq jaılaǵan elimizde soǵysta bolǵan adamdardyń aýzynan estigen áńgime óte áserli bolatyny ardagerlerdi tyńdap otyrǵan sarbazdardyń oıly da otty kózqarastarynan kórinip turdy.
Kún-tún demeı sharshaý men shaldyǵý degendi moıyndamaı, oq pen ottyń ortasynda júrý kimge de bolsa úlken syn. Nebir qıynshylyqtardy basynan ótkergen qonaqtar sol bir kezdegi oqıǵalardy kezegimen baıandady.
Birneshe kún boıy taý basynda sý ishpeı qınalyp jatsa da, shepten sheginbeı jaýǵa qarsy soǵysý týraly estý kimge de bolsa ońaı emes. Sonymen jazdyń aptap ystyǵynda, jaýyngerler taý shatqalynda jatyr. Aspannan kún kúıdirip tur, aınala taý men tas. Joǵaryda jartastarǵa tyǵylǵan ólispeı berispeýge bekingen mojdahedter ańdysyp atysýda.
Tómen jaqta, týrasyn aıtqanda taıaq tastam jerde, ábden shóldegen sarbazdardy mazaqtaǵandaı bulaqtyń salqyn sýy syldyrap aǵýda. Birneshe kún sý ishpeı ernideri kezergen sarbazdaryn aıady ma, sardar bir jaýyngerdi sýǵa jumsady. Biraq... ıá, biraq... Aýǵandyq mergenniń myltyǵynyń atylǵan oǵynyń daýysy estiler zamat jańaǵy jaýynger bulaqqa jete qulady. Ekinshi jaýynger de sýǵa jete almady... Osylaısha bir jutym sý úshin birneshe jas ómir qyrshynnan qıyldy.
Endi ne isteý kerek? Keńese kele aýǵan mojdahedteri tyǵylyp jatqan jartasty shabýyldaýǵa sheshim qabyldandy. Tań eleń-alańda jaýyngerler bıikke órmeleı bastady. Bulaı bolady dep kútpegen jaýlar oısyraı jeńildi.
Osy jıynda bundaı oqıǵalardyń qanshamasy eske alyndy?! Baıandalǵanda da bul oqıǵalardy, kezdeısoq adamdar emes, qandaı oqıǵa bolsa da maıyn tamyza qyzǵylyqty etip jaza alatyn jazýshylar emes, sol ottyń ortasynda bolǵan, ólimniń kózine tike qaraı alǵan, ol kezderi jap-jas, qazir Aýǵan soǵysynyń ardagerleri atanǵan aǵalar aıtyp jatty.
Aǵalardyń nazarynan álemdi shyrmap alýǵa jantalasyp jatqan dinı terrorızm týraly da keńinen áńgime boldy. Dinı senimniń elimizdiń ulttyq salt-dástúrlerine, júris-turysy men kıim kıisine esh qatysy joq ekeni aıtyldy. Qazirgi tańda keıbir jastardyń bilmestikten keıbir dinı kúshterdiń zymııan shyrmaýyna túsip qalyp, qıyn jaǵdaıǵa ushyrap jatqany da ardagerler tarapynan qatty synǵa alyndy.
Sezimge toly osy bir sózderdi Ulan gvardııasy № 75/52 bólimshesiniń jaýyngerleri siltideı tynyp tyńdady.
Eki saǵattyń qalaı tez ótkeni eshkim de baıqamaı qaldy. Jaýyngerler rıza bolysyp, ardager aǵalardyń áńgimelerinen tyń kúsh alǵandaı. Al ardager bolsa áli de aıtarymyz mol, degendeı janarlary nur shashyp turdy. Óz kezeginde áskerı bólimshe maıory Saltanat Serikbaı áli de bundaı kezdesýlerdiń jıi bolyp turatynyn aıtty.
"Adyrna" portaly
