توقاەۆ 5 قىركۇيەكتە قوستاناي وبلىسىنا بارىپ، ۇلت ۇستازى احمەت بايتۇرسىنۇلىنىڭ 150 جىلدىق مەرەيتويىنا ارنالعان رەسمي ءىس-شارالارعا قاتىسادى. بۇل تۋرالى "ادىرنا" ۇلتتىق پورتالى جازادى.
24.kz حابارلاۋىنشا، احمەت بايتۇرسىنۇلىنىڭ ەڭبەك جولى مەن ءومىرى بيىل ەرەكشە نازاردا. مەرەيتوي اياسىندا اقكولدە احمەت بايتۇرسىنۇلىنىڭ اتا-اناسى جاتقان كەسەنەگە توپىراق سالۋ ءراسىمى وتەدى. ۇلت ۇستازىنىڭ كىندىك قانى تامعان ورىندا مۋزەي ءۇيى جانە تورعايدا احمەت بايتۇرسىنۇلى مەن مىرجاقىپ دۋلاتۇلىنىڭ جاڭا ەسكىرتكىشى اشىلادى.
"الاش ارىسى احمەت بايتۇرسىنۇلىنىڭ مەرەيتويىنا ارنالعان ينفراقۇرىلىمدىق جوبالار جوسپارعا سايكەس ىسكە اسىرىلىپ جاتىر وبلىسىمىزدا. جەرگىلىكتى تۇرعىنداردىڭ سۇراۋى بويىنشا احمەت بايتۇرسىنۇلى اۋىلىنا اپاراتىن جولدىڭ جانە تورعاي وزەنى ارقىلى وتەتىن كوپىردىڭ جوندەۋ جۇمىستارى باستالىپ كەتتى. سونىمەن قاتار جاڭادان مەديتسينالىق پۋنكت سالىنىپ، اقكولدەگى اۋىلدىق امبۋلاتورياسى جوندەۋدەن وتكىزىلەدى", - دەدى قوستاناي وبلىسىنىڭ اكىمى ارحيمەد مۇحامبەتوۆ.
اعارتۋشىنىڭ ەڭبەك جولىن زەرتتەۋ جۇمىستارى جالعاسىپ جاتىر. ءبىر اپتا بۇرىن فيلولوگتار ارنايى ەكسپەديتسياعا شىقتى. بۇل جولى زەرتتەۋشى توپ مەڭدىقارا اۋدانىنا باعىت الدى. ءبىر كەزدەرى احمەت بايتۇرسىنۇلى وسى اۋدانداعى ورىنباەۆ مەكتەبىندە مۇعالىم بولىپ قىزمەت اتقارعان. بىراق ءبىلىم وشاعىنىڭ قاشان اشىلعاندىعى تۋرالى ناقتى ماعلۇمات جوق. بۇل ەكسپەديتسيانىڭ ماقساتى اعارتۋشىنىڭ كوپكە بەيمالىم ءومىربايانىنىڭ وسى ءبىر بولىگىن تولىقتىرۋ.
"ەكسپەديتسيانىڭ قورىتىندىسىن ىبىراي التىنسارين اتىنداعى مەكتەپتە شىعارعالى وتىرمىز. سەبەبى كەزىندە وسى مەكتەپتىڭ قابىرعاسىندا قوستاناي پەداگوگيكالىق سىنىبى جۇمىس جاساعان. اتالمىش سىنىپتا احمەت بايتۇرسىنۇلى قازاق تىلىنەن ساباق بەرگەن ەدى. مىنەكي ەكسپەديتسيانى ۇيىمداستىرا وتىرىپ، ءبىز قوعامدى، جۇرتشىلىقتى احمەت بايتۇرسىنوۆتىڭ قوستاناي كەزەڭىنە نازار اۋدارتقىمىز كەلەدى", - دەيدى ەكسپەديتسيا جەتەكشىسى الماس ابسادىق.
"ادىرنا" ۇلتتىق پورتالى
