جۋرناليست باقتيار تايجان سىننىڭ استىندا قالعان بەكبولات تىلەۋحانعا اراشا ءتۇسىپ، دوسىنا تۇسىنىستىكپەن قاراۋعا شاقىردى. بۇل تۋرالى "ادىرنا" ۇلتتىق پورتالى جازادى.
"بەكبولات تىلەۋحانوۆ ەكەۋىمىز ءبىر توپىراقتىڭ تۇلەگىمىز. ساكەندەي نۇر ديدارلى ازاماتتى دۇنيەگە اكەلگەن ايماقتا، «جاڭاارقا - بالۋاندار مەن انشىلەردىڭ ەلى» دەگەن قاناتتى ءسوز بار. سوناۋ سەكسەنىنشى جىلدارى الاقانداي جاڭاارقا قازاقستاننىڭ سامبو، قازاقشا كۇرەس قۇراماسىن تەڭ تۇسەردەي حالدە ەدى. جەڭىلمەيتىن. ال، انشىلەرى بەرىدەن تارتقاندا يگىلىك وماروۆ، قايرات بايبوسىنوۆ، باردا انشىلەردىڭ كۋميرىنە اينالعان قوراباي ەسەنوۆ، سولاردىڭ ءىزىن باسقان، قازتۋعان، اقتامبەردى شالكيىزدەردەردىڭ جىرىنان قوزعاعاندا جالاڭ قىلىشپەن اتقا مىنگىزىپ جىبەرە جازدايتىن بەكبولات تىلەۋحانوۆ. اتى ەرتە شىقتى. ەرتە ەسەيدى. ۇلىستىڭ ءسوزىن قاي سىندا دا قايىسپاي سويلەيتىن قايتپاس قايراتكەرىنە اينالدى. وتكەندە مەرەيتويىمدا اكادەميالىق يننوۆاتسيالىق ۋنيۆەرسيتەتتىڭ قۇرىلتايشىسى، پروفەسسور، قازاقستانعا ەڭبەگى سىڭگەن جاتتىقتىرۋشى جاحان وڭالبەكوۆ «باقتيار، ادامداردىڭ تەك جاقسى جاعىن كورەدى» دەپتى. مومىن، ادال اكە-شەشەمىزدەن جۇققان قاسيەت بولار، شىندىعى وسى. ماعان جۇرتتىڭ ءبىرازى كۇستانالاپ جاتقان بەكبولاتتىڭ «كۇماندى» جاقتارى ەمەس ۇلتقا جاساعان جاقسىلىقتارى ابدەن جاقىن. دۇمبىلەزدەۋ، ورىسقولدى ءبىلىم ءمينيسترى «الىپپەنى» وقۋ پانىنەن الاستاپ جاتقاندا پارلامەنتتە شىبىن جانىن شىرقىراتىپ قايتارىپ العان اتادان ەر بولىپ تۋعان بەكبولاتىڭ ەمەس پا ەدى بۇل؟! قازاق ءوز جەرىندە ازشىلىق بولدى. ءۇنى قۇمىعا بەردى. الىستاعى اعايىننىڭ كوشى توقتاۋعا اينالعاندا اقتامبەردىنىڭ ۇرانىنا باسىپ، مەملەكەتتىڭ ەسىن جيعىزعان، جارتى ەستى مينيسترلەردىڭ اپشىسىن قۋىرعان، كوشتى ورنىنان قوزعاعان بەكبولاتىڭ ەمەس پە بۇل؟!",- دەپ جازدى باقتيار تايجان ءوزىنىڭ فەيسبۋك پاراقشاسىندا.
ءجۋرناليستتىڭ ايتۋىنشا، بەكبولات تىلەۋحان ۇلت مۇددەسىن ساتاتىن ازامات ەمەس.
"وڭتۇستىك قازاقستان - كەڭەس يمپەرياسىنىڭ ءتىسى باتپاعان جەر. سولتۇستىك، ورتالىقتى ورىسقا اينالدىرۋعا شاق قالعاندا قازاعى مول، سالت-ءداستۇرىن ساقتاپ قالعان وڭتۇستىك يلەۋىنە كونە قويمادى. يمپەريانىڭ وڭتۇستىكتى جەرگە ۇرعان ساياساتىن ءبىزدىڭ كوپ اعايىن ءالى دە شىڭدىق دەپ ءبىلىپ، شىمكەنت دەسە ەجىرەيىپ شىعا كەلەدى. «اپىر-اۋ، ەلدى ەل قىلعان حان، تورە، بي، سۇلتان، باتىر، باي باعىلاندارىڭنىڭ دەنى وڭتۇستىكتە ماڭگى دامىلداپ جاتىر. ارعىسىن بىلاي قويعاندا قازاق رۋحانياتىنىڭ ساردارى وزبەكالى جانىبەكوۆ، بەرىسى وكتيابر جارىلقاپوۆ، ءابدىسالان نۇرماحانوۆ، بەكزات ساتتارحانوۆ پەن مۇحتارحان دىلدابەكوۆتى جاقسى كورەسىڭدەر دە، ولاردى دۇنيەگە اكەلگەن وڭتۇستىكتى قالاي جامان كورەسىڭدەر دەپ ۇلتتىڭ ەسىن جيدىرعان بەكبولاتتىڭ ەمەس پە بۇل؟! ايتسا ايتار كەپ كوپ قوي. كەيىنگى كەزدەرى بەكبولاتتى سىناپ-مىنەۋشىلەردىڭ كوبەيگەنى قورقىتادى. انەبىرەۋ، بۇگىندە بۇكىل الەمگە قازاقشا ءان سالدىرىپ قويعان ديماشتى ەلدەگى كونكۋرستا قۇلاتىپ «وسى قاتىنداۋىستى، شىڭعىرىپ ءان ايتاتىن انشىلەردەن قورقامىن» دەپ ۇلى جاڭالىق اشقان، جاۋ جوقتا اتتانداپ، جاۋ كەتكەندە قىلىشىن بوققا ۇراتىن ايتىس اقىنى «بەكبولات قاڭتار وقيعاسىن ءبىلدى، قاشىپ كەتتى» دەپ ءجۇر. سول بەكبولات جەلتوقساندا قىزمەت اۋىستىرعانىن، تۇركيادا بولاتىنىن ايتپاپ پا ەدى. اشىعى تەك اللاعا ايان. قاڭتاردا قايدا بولدىق. تىعىلىپ ۇيدە جاتتىق. بۇگىندە «قاڭتاردا قايدا بولدىڭ؟» دەپ اركىمگە سۇق ساۋساعىن بەزەيتىن اسىرەپاتريوتتار دا سول قىرعىندا ەشبىرى توبە كورسەتىپ، حالىق ورتاسىندا جۇرمەگەنىن كوردىك قوي. بەكبولاتتىڭ ادۆوكاتى ەمەسپىن. سوناۋ مەكتەپتە ءجۇرىپ سىيلاعان سىرالعى دوس، ۇلت ءسوزىن سويلەگەن جاقسى ءىنىنى جۇندەي ءتۇتىپ جاتقان سوڭ اۋلاعىراق تۇرا المادىق. راس، بەكبولات كەمشىلىكسىز ەمەس. وندايدان ەشقايسىمىز قۇرالاقان ەمەسپىز. ۇلىق اللا عانا كەمشىلىكسىز. بىراق، قانشا جەرگە ۇرساق تا بەكبولات ۇلت مۇددەسىن ساتاتىن ازامات ەمەس ەدى. تۇسىنىستىكپەن قارايىق. ارداقتىلارىمىزدى كەنەۋسىز قىرعان زۇلمات زامانى ەمەس. پارلامەنتكە شەرحان مۇرتازا، امانگەلدى ايتالى، مۇحتار شاحانوۆتان كەيىن ۇلتتىق رۋح اكەلگەن، قازاق ماسەلەسىنە كەلگەندە شوۆينيستەرگە قاسقايىپ قارسى تۇرعان قارعا بويدى قازتۋعانىمىزدى قادىرلەي بىلەيىك. وسى ەدى ايتپاعىم. بارىمىزدى باعالايىقشى. «باعالاي بىلگەنگە باق قونادى، قۋانا بىلگەنگە قۇت قونادى» دەپ ابىز ءابىش اعا ايتپاپ پا ەدى", - دەيدى ول.
"ادىرنا" ۇلتتىق پورتالى
