جۋرناليست بانۋ داۋلەتباەۆا Facebook پاراقشاسىنا دەنساۋلىق ءمينيسترىنىڭ “جۇيەسىز جۇمىسى” تۋرالى جازدى، دەپ حابارلايدى “ادىرنا” ۇلتتىق پورتالى.
“جولداستار،مىناۋ بولمادى. وسى دەنساۋلىق ءمينيسترى نەگە جۇيەلى جۇمىس ىستەمەيدى؟ ءبىر جەرىڭ اۋىرسا ەمحاناعا باراسىڭ. ۋچاسكەلىك دارىگەرگە جازىلاسىڭ. جازىلۋ ءۇشىن كەزەكككە تۇراسىڭ. تاڭەرتەڭ بارۋىم مۇمكىن، بىراق ول ۋچاسكەلىك دارىگەر تۇستەن كەيىن ىستەيدى. جاقسى، جازىلىپ، تۇستەن كەيىن تاعى ءبىر باراسىڭ. بارعاندا سەنىڭ سۇراعىڭدى ول شەشە المايدى، اسقازان دەيىك مىسالى. ول ساعان گاستروەنترولوگقا جولداما بەرەدى. ول گاستروەنترولوگ باسقا ءبىر مەكەمەدە، وعان دا بارىپ نەمەسە حابارلاسىپ جازىلۋىڭ كەرەك. اسقازانىڭ تۇينەپ ءولتىرىپ بارا جاتسا دا، وعان تەك دۇيسەنبى كۇنى ساعات 15-كە جازۋى مۇمكىن. جارايدى، دۇيسەنبى دە بولدى، وعان باردىڭ، اۋپىرىمدەپ ءجۇرىپ كىرگەن سوڭ ول ساعان شلانگىمەن تەكسەرەتىن بىردەڭەگە جىبەرەدى. وعان قايتادان الگى ۋچاسكەلىك دارىگەردەن بارىپ جولداما اكەلۋ كەرەك. وعان تاعى جازىلىپ كىرەسىڭ، ول ەندى ەرتەڭ تۇسكە دەيىن ىستەيدى. جاقسى، ەرتەسى تۇستەن كەيىنگە جازىلىپ كەتىپ، ەرتەسى تۇستەن كەيىن بارىپ الگىگە جولداما الاسىڭ. سوسىن ول سەنى تاعى كەلەسى دۇيسەنبىگە جازادى. كەلەسى دۇيسەنبىدە بارىپ، شلانگىسىن جۇتاسىڭ. سوسىن ونىڭ قورىتىندىسىن الىپ گاستروەنرولوگقا قايتا باراسىڭ. بىراق وعان جولداما كەرەك قوي، جولداماسىز ول سەنى ولسە دە كىرگىزبەيدى عوي. جارايدى، قۇرسىن، اقىرى باستادىق، ەندى بارىپ جولداما اكەلە سالايىق. ۋچاسكەلىك دارىگەرگە باراسىڭ، بىراق وعان الدىن الا جازىلۋ كەرەك. ول ەرتەڭ تۇسكە دەيىن ىستەيدى. ەرتەڭ تۇسكە دەيىنگە جازىلىپ تاعى كەتەسىڭ. ەرتەڭ تۇسكە دەيىن كەلىپ قىرعىن كەزەكپەن بىردەڭە عىپ كىرەسىڭ دە، جولدامانى الاسىڭ. بىراق ول تاعى كەلەسى سەيسەنبىدە عانا قابىلداي الادى. جاقسى، سەيسەنبى دە الىس ەمەس، ءوتىپ جاتقان ءومىر عوي. سەيسەنبى دە كەلەدى، سوسىن سەن الگى قورىتىندىنى الىپ كىرەسىڭ. سوسىن ول ساعان "سىزگە باۋىرىڭىزدى تەكسەرتۋ كەرەك ەكەن" دەسە .... قۇي جىلا، قۇي جىلاما! ءبارىن باسىنان باستايسىڭ!”،- دەپ جازدى ول.
ونىڭ ايتۋىنشا مينيسترلەردىڭ ءوزى ەلدە ەمدەمەيدى.
“سول ۋچاسكەلىك دارىگەردىڭ نە قاجەتى بار؟ مەن اسقازانىم اۋىرىپ تۇر، گاستروەنترولوگكە بارۋىم كەرەك ەكەنىن بىلەم عوي. مىنا تسيفرلى قوعامدا مەن ناعىپ ءجۇرمىن، مەن كىممىن وسى؟
كەشكە دەيىن مادەنيەت مينيستر مەن ءبىلىم-عىلىم، وقۋ-اعارتۋ ءمينيسترى تۋرالى ايتا بەرمەي، ءبىر ۋاق دەنساۋلىق ءمينيسترىن وسەكتەيىكشى. ەڭ بولماسا ادامعا وسەكوتەراپيا كومەكتەسەتىن شىعار؟؟؟
مينيسترلەردىڭ ءوزى، بالالارى ءبىزدىڭ ەلدە ەمدەلمەيدى، وقىمايدى. وسى "تسيفرلى قازاقستان" دەپ الاۋلاتىپ-جالاۋلاتىپ جاتاتىن ەدى عوي، وسى قىزمەتتىڭ ەڭ بولماسا كەيبىرەۋىن ونلاين جاساي الاتىن ەتسە نە بولادى؟”، دەپ جازدى ول.
”ادىرنا” ۇلتتىق پورتالى
