Aqtau qalasyndaǧy Nazarbaev Ziiatkerlık mektebınıŋ oquşylary «Auyldaǧy ekı apta» äleumettık jobasy aiasynda jazǧy demalystaryn auylda ötkızdı, dep habarlaidy “Adyrna” ūlttyq portaly.
«Auyldaǧy ekı apta» — ūlttyq mädeniet pen salt-dästürlerdı tanyp, auyldyŋ tūrmys-tırşılıgın bıluge baǧyttalǧan äleumettık täjıribe. Basty maqsaty – auyl ömırımen tanysu arqyly oquşy boiyna ruhani qūndylyqtardy sıŋıru, auyldaǧy ülkenderdıŋ önegelı äŋgımesın tyŋdau, qūrby-qūrdastarymen aralasu. Joba aiasynda auyldaǧy ata-äjesıne nemese auyldaǧy tuysqandaryna baryp, auyl ömırımen tanysyp, kündelık jürgızıp, foto jäne video materialdar jinaqtaidy. Osy maqsatta ūiymdastyrylǧan būl äleumettık jobaǧa Ziiatkerlık mekteptıŋ 7-11 synyp oquşylary qatysty.
«Ekı apta auylda» jobasy ūlttyq qūndylyqtardy saqtau jäne oquşynyŋ bolaşaq qoǧamǧa beiımdeluıne baǧyttalǧan keremet mümkındık beretın joba. Būl jobaǧa mektep oquşylary asqan qyzyǧuşylyqpen qatysady. Köp oquşylar osy jobaǧa qatysqan kezde auyldaǧy aǧaiynnyŋ tynys tırşılıgımen etene tanys boldy. Ata-analar tarapynan da būl joba oŋ baǧasyn alyp ülgerdı”,- deidı Nazarbaev Ziiatkerlık mektebı direktorynyŋ tärbie ısı jönındegı orynbasary Aibar Beibıtūly
«Auyldaǧy ekı apta» äleumettık jobasyna belsendı qatysqan balalar öte köp, sonyŋ bırı Ziiatkerlık mektebınıŋ segızınşı synyp oquşysy Damir Amanjol. Damir Maŋǧystau oblysy, Beineu audany, Sarǧa auylynda ekı apta bolyp, eldıŋ tynys tırşılıgımen tanysyp, auyldyŋ aldyŋǧy qatarly tūlǧalarymen sūqbattasyp qaitqan.
Sondai aq Damir auyl äkımı Emıl Tūrlanmen sūqbattasyp, auyldyŋ hal-ahualyn sūrap, alda auyldyŋ örkendeuı üşın jasalatyn şaralardyŋ josparyn bıldı.
“Sarǧa auylynyŋ tūrǧyndary men öte jaqsy qarsy aldy. «Auyldaǧy ekı apta» jobasy aiasynda auyl äkımımen, mektep, kıtaphana qyzmetkerlerımen sūqbattastym. Sarǧa auylynyŋ beldı azamaty, grepplingten älem chempionatynyŋ qola jüldegerı, sport şeberı Aqniet İmanǧaliden sūqbat alu men üşın ülken jetıstık boldy. Barlyǧy menı quana qarsy alyp, bılgenderımen bölıstı. Auyl balalary da jyly lebızderın bıldırıp, atqa mınu, asyq atu sekıldı ūlttyq oiyndardy üirettı”,- deidı Damir Amanjol
«Auyldaǧy 2 apta» äleumettık jobasy qazaq balasyndaǧy adamgerşılık ruhani qūndylyqtaryn özgerte alady. Auyl — dästürlı qazaq qoǧamynda ejelden qalyptasqan qauymdastyq. Qazaq halqyndaǧy «Auyl tübı-bırlık, qauym tübı-tırlık» degen maqal auyldyŋ etnikalyq, ekonomikalyq jäne ruhani maŋyzdylyǧyn bıldıredı.
Osyǧan bailanysty būl jobada balanyŋ auyldaǧy tūrmys-tırşılıgıne qyzyǧuşylyǧyn aiqyndaityn jäne ony jandandyruyn qarastyrady.
”Adyrna” ūlttyq portaly
