پرەزيدەنت ەكونوميكالىق ماسەلەلەر جونىندە كەڭەس وتكىزىپ، 2023-2025 جىلدارعا ارنالعان رەسپۋبليكالىق بيۋدجەت جوباسىن قولدادى، دەپ جازادى "ادىرنا" ۇلتتىق پورتالى.
قاسىم-جومارت توقاەۆتىڭ توراعالىعىمەن وتكەن كەڭەستىڭ كۇن تارتىبىندە ەلىمىزدىڭ 2023-2027 جىلدارعا ارنالعان الەۋمەتتىك-ەكونوميكالىق دامۋىنىڭ بولجامى، سونداي-اق 2023-2025 جىلدارعا ارنالعان رەسپۋبليكالىق بيۋدجەت جوباسىنا قاتىستى ماسەلەلەر قارالدى.
كەڭەسكە پرەمەر-مينيستر ءاليحان سمايىلوۆ، پرەزيدەنت اكىمشىلىگىنىڭ باسشىسى مۇرات نۇرتىلەۋ، ۇلتتىق بانك توراعاسى عالىمجان ءپىرماتوۆ، پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ، پرەزيدەنت اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ، ەسەپ كوميتەتىنىڭ توراعاسى ناتاليا گودۋنوۆا جانە ۇلتتىق ەكونوميكا ءمينيسترى الىبەك قۋانتىروۆ قاتىستى.
پرەمەر-مينيستر ۇسىنعان ماكروەكونوميكالىق كورسەتكىشتەر بويىنشا 2022 جىلى جالپى ىشكى ءونىمنىڭ ناقتى ءوسىمى 3 پايىزدان كەم بولمايدى. ال 2023 جىلى 4 پايىزعا جەتەدى.
پرەزيدەنت ۇسىنىلعان الەۋمەتتىك-ەكونوميكالىق دامۋ بولجامىنىڭ تەپە-تەڭدىگىن اتاپ ءوتتى. ۇكىمەتتىڭ دەرەكتەرىنە سايكەس، جالپى ىشكى ءونىمنىڭ نومينالدى ءوسىمى بيىلعى 103,6 تريلليون تەڭگەدەن 2023 جىلى 120,7 تريلليون تەڭگەگە دەيىن جەتەدى دەپ بولجانىپ وتىر. بولجام بويىنشا كەلەسى جىلى سالىق تۇسىمدەرىنىڭ ارتۋى ەسەبىنەن بيۋدجەتتىڭ كىرىس بولىگى 10,5 تريلليون تەڭگەدەن 13,5 تريلليون تەڭگەگە دەيىن ۇلعايادى.
رەسپۋبليكالىق بيۋدجەت جوباسىنىڭ وڭ اسپەكتىسى رەتىندە ۇلتتىق قوردان كەپىلدەندىرىلگەن ترانسفەرتتەردىڭ 2022 جىلعى 4 تريلليون تەڭگەدەن 2023 جىلى 2,2 تريلليون تەڭگەگە دەيىن كۇرت تومەندەۋىن ايتۋعا بولادى. ماكروەكونوميكالىق تۇراقتىلىققا شيكىزاتتىق ەمەس دەفيتسيتتىڭ 2023 جىلى 8,3 پايىزدان 6,8 پايىزعا دەيىن تومەندەۋى دە وڭ اسەر ەتەدى.
جيىن سوڭىندا قاسىم-جومارت توقاەۆ ۇكىمەت نازارىن تاعى دا قارجىنى ءتيىمدى جوسپارلاۋ مەن ۇلەستىرۋ قاجەتتىلىگىنە اۋداردى. جالپى العاندا، پرەزيدەنت قازاقستان رەسپۋبليكاسىنىڭ 2023-2027 جىلدارعا ارنالعان الەۋمەتتىك-ەكونوميكالىق دامۋىنىڭ ۇسىنىلعان بولجامىن جانە 2023-2025 جىلدارعا ارنالعان رەسپۋبليكالىق بيۋدجەت جوباسىن كەڭەس بارىسىندا تالقىلانعان ماسەلەلەردى جەتىلدىرۋدى ەسكەرتە وتىرىپ، قولدادى.
"ادىرنا" ۇلتتىق پورتالى
