Prezıdent ekonomıkalyq máseleler jóninde keńes ótkizip, 2023-2025 jyldarǵa arnalǵan respýblıkalyq bıýdjet jobasyn qoldady, dep jazady "Adyrna" ulttyq portaly.
Qasym-Jomart Toqaevtyń tóraǵalyǵymen ótken keńestiń kún tártibinde elimizdiń 2023-2027 jyldarǵa arnalǵan áleýmettik-ekonomıkalyq damýynyń boljamy, sondaı-aq 2023-2025 jyldarǵa arnalǵan respýblıkalyq bıýdjet jobasyna qatysty máseleler qaraldy.
Keńeske Premer-Mınıstr Álıhan Smaıylov, Prezıdent Ákimshiliginiń basshysy Murat Nurtileý, Ulttyq bank tóraǵasy Ǵalymjan Pirmatov, Premer-Mınıstrdiń orynbasary – Qarjy mınıstri Erulan Jamaýbaev, Prezıdent Ákimshiligi basshysynyń birinshi orynbasary Tımýr Súleımenov, Esep komıtetiniń tóraǵasy Natalıa Godýnova jáne Ulttyq ekonomıka mınıstri Álibek Qýantyrov qatysty.
Premer-Mınıstr usynǵan makroekonomıkalyq kórsetkishter boıynsha 2022 jyly jalpy ishki ónimniń naqty ósimi 3 paıyzdan kem bolmaıdy. Al 2023 jyly 4 paıyzǵa jetedi.
Prezıdent usynylǵan áleýmettik-ekonomıkalyq damý boljamynyń tepe-teńdigin atap ótti. Úkimettiń derekterine sáıkes, jalpy ishki ónimniń nomınaldy ósimi bıylǵy 103,6 trıllıon teńgeden 2023 jyly 120,7 trıllıon teńgege deıin jetedi dep boljanyp otyr. Boljam boıynsha kelesi jyly salyq túsimderiniń artýy esebinen bıýdjettiń kiris bóligi 10,5 trıllıon teńgeden 13,5 trıllıon teńgege deıin ulǵaıady.
Respýblıkalyq bıýdjet jobasynyń oń aspektisi retinde Ulttyq qordan kepildendirilgen transfertterdiń 2022 jylǵy 4 trıllıon teńgeden 2023 jyly 2,2 trıllıon teńgege deıin kúrt tómendeýin aıtýǵa bolady. Makroekonomıkalyq turaqtylyqqa shıkizattyq emes defııttiń 2023 jyly 8,3 paıyzdan 6,8 paıyzǵa deıin tómendeýi de oń áser etedi.
Jıyn sońynda Qasym-Jomart Toqaev Úkimet nazaryn taǵy da qarjyny tıimdi josparlaý men úlestirý qajettiligine aýdardy. Jalpy alǵanda, Prezıdent Qazaqstan Respýblıkasynyń 2023-2027 jyldarǵa arnalǵan áleýmettik-ekonomıkalyq damýynyń usynylǵan boljamyn jáne 2023-2025 jyldarǵa arnalǵan respýblıkalyq bıýdjet jobasyn keńes barysynda talqylanǵan máselelerdi jetildirýdi eskerte otyryp, qoldady.
"Adyrna" ulttyq portaly
