"تايلاندقا بارىپ، جەكە بيزنەسىمدى دوڭگەلەتەمىن" دەپ سەنگەن قازاقستاندىق اكتريسا انەل بەرماعانبەتوۆا قۇلدىققا تۇسكەنىن مالىمدەدى. بۇل تۋرالى ول ءوزىنىڭ ينستاگرام پاراقشاسىندا حابارلادى، دەپ جازادى "ادىرنا" ۇلتتىق پورتالى.
"ۇشاقتان تۇسكەنىمدە بارلىق سۇراقتارىم (ۆيزا، باگاج) بويىنشا كومەكتەسكەن ادامدار كۇتىپ الدى. مەنى جەكە جۇرگىزۋشى، ۆيپ كولىپ، ادەمى قوناقۇيدەگى كەڭ بولمەمەن قامتاماسىز ەتتى. "نەنى قالايسىڭ سوعان تاپسىرىس بەرە بەر، ءبارىن كومپانيا كوتەرەدى" دەدى. ىشتەي "شىنىمەن ءبارى دە راس بولعانى عوي" دەگەن ويعا كەلدىم. بىراق تاڭەرتەڭ ۇيقىدان اپاتيالىق كوڭىل-كۇيمەن وياندىم، ەموتسيامدى بىلدىرمەي، "اۋا-رايى قانداي تاماشا" دەپ قوناقۇيدەن شىعىپ كەتتىم. جەكە جۇرگىزۋشىم كۇتىپ الدى. اۋەجايعا جول تارتتىق. سول جەردەن چيانگرايعا ۇشتىق، ودان ارى قاراي 2,5 ساعات ءبىر اۋىلعا اپاردى. "انەل، وسىمەن ءبارى ءبىتتى" دەدىم وزىمە. تولقۇجاتتى باقىلاۋ بەكەتىنە باردىق، تايلاندىقتار ءبىر-بىرىنە باسىن يزەپ، ەلدەن شىقتى دەپ تۇلقۇجاتىما ءمور باسىپ بەردى”، – دەيدى انەل.
"ول جاقتا مەنى ەشكىم قارسى العان جوق. ۋايىمعا ابدەن سالىندىم. قىتاي مەنەدجەرلەرى ء"سىزدى كۇتىپ الۋعا كەلە جاتىر" دەدى. ءسويتىپ ءبىر جاعىمسىز قىتاي كەلدى، تۇرىنەن الاياق ەكەنىن بىردەن بايقادىم. ول مەن ءۇشىن پوليتسياعا اقشا تولەپ، پتر-تەست پەن قان تاپسىردىم. سودان كەيىن مەنى قىتاي تاعامىمەن تاماقتاندىردى. ول مەنى كومپانيانىڭ كەڭسەسىنە الىپ كەلگەن بويدا، مەنى الداعاندارىن ءتۇسىندىم", - دەيدى ول.
"8 ادام تۇراتىن بولمەنى كورگەندە، مەن شوشىپ كەتتىم. ءتىپتى جىلاپ جىبەردىم. ول جاقتا كىلەڭ شوشقالاردىڭ ءومىر ءسۇرىپ جاتقانى بىردەن بايقالدى. لاس، كىر، دۋش جوق، تەمەگىنىڭ قالدىقتارى... مەنىڭ اعام مەن تانىستارىم پوليتسياعا ارىز ءتۇسىردى. ۆەتنام مەن تايلاند ەلشىلىگىنە، سونداي-اق، لاوس سىرتقى ىستەر مينيسترلىگىنە شاعىمداندى. ولار مەنى وسى جەردەن قالاي الىپ شىعامىز دەپ قامدانىپ وتىر. سەبەبى، بۇل جاقتا ءبارىن قىتايلىقتار ساتىپ العان", - دەپ جازدى انەل.
"لاوسقا كەلگەنىمە ءتورت كۇن بولدى. مەن بولمەنىڭ ەسىگىن جاۋىپ الىپ، ەشكىمدى كىرگىزبەي وتىرمىن. كەشە باسشىلىقتاعى قىتايلىقپەن سويلەسىپ، بۇل جەردە جۇمىس ىستەمەيتىنىمدى جانە جولعا كەتكەن شىعىننىڭ ءبارىن وتەپ، ۇيگە قايتاتىنىمدى جەتكىزدىم. ول ماعان "بۇل ساعان كەلىپ-كەتەتىن جەر ەمەس، ءبىر جىلعا قالۋىڭ كەرەك" دەدى. سايكەسىنشە، مەن شوشىم كەتتىم. ينۆەستيتسيا تارتۋعا باعىتتالعان كومپانيا الاياق بولىپ شىقتى. ماعان كليەنتتەرمەن جۇمىس جونىندەگى مەنەدجەردىڭ جۇمىسىن ورىنداۋ كەرەك بولدى", - دەيدى ول.
قىزىلوردا وبلىسى پوليتسيا دەپارتامەنتى بۇل دەرەككە قاتىستى قر قىلمىستىق كودەكسىنىڭ 126-بابى 1-بولىگى بويىنشا (ادام ۇرلاۋعا بايلانىستى ەمەس باس بوستاندىعىنان زاڭسىز ايىرۋ) قىلمىستىق ءىس تىركەلىپ، سوتالدى تەرگەپ-تەكسەرۋ باستالعانىن حابارلادى.
"تەرگەپ-تەكسەرۋ ناتيجەسىندە انىقتالعان مالىمەتتەرگە سايكەس رەسمي اقپاراتتار قوسىمشا ۇسىنىلادى. وقيعا تۋرالى قر سىرتقى ىستەر مينيسترلىگىنە حابارلاندى. جابىرلەنۋشىنىڭ اعاسىمەن بايلانىس ورناتىلدى. سونىمەن قاتار، قر كونسۋلدىعى دەپارتامەنتىنە حات جولداندى", - دەلىنگەن حابارلامادا.
انەل بەرماعانبەتوۆانىڭ جاعدايىنا قاتىستى سىرتقى ىستەر مينيسترلىگى دە مالىمدەمە جاسادى.
"بيىل 19 تامىزدا ءبىزدىڭ وتانداسىمىز كونسۋلمەن بايلانىسقا شىعىپ، ءوزىنىڭ جاعدايى تۋرالى حابارلادى. قازاقستان رەسپۋبليكاسىنىڭ حانويداعى ەلشىلىگى لاوستىڭ سىرتقى ىستەر مينيسترلىگىنە ازاماتىمىزدى قۇتقارۋعا بارىنشا كومەك كورسەتۋ تۋرالى ءتيىستى نوتا جولدادى. لاوس پوليتسياسى بۇل ماسەلەمەن اينالىسىپ جاتىر، ەرتەڭ لاوستىڭ ءسىم جانە ءىىم وكىلدەرىمەن ءتيىستى كەلىسسوزدەر وتەدى", - دەلىنگەن حابارلامادا.
مينيسترلىك حابارلاۋىنشا، ءبىزدىڭ وتانداسىمىزعا ەشقانداي قاۋىپ ءتونىپ تۇرعان جوق.
"جەرلەسىمىز ديپلوماتتارمەن جانە تۋىستارىمەن ۇنەمى بايلانىستا. ونىڭ ايتۋىنشا، قۇجاتتارى مەن تەلەفونىنا تيىسپەگەن، تەلەفون مەن ينتەرنەت بايلانىسىن شەكتەمەگەن، سونداي-اق، كۇش قولدانباعان. ول تايلاندقا جانە ودان ءارى ءوز ەركىمەن بارعان. سونداي-اق، انەلدىڭ ايتۋىنشا، جۇمىس بەرۋشىلەر ونىڭ ۇشۋىنا، تۇرۋىنا جانە باسقا دا شىعىندارىنا جۇمساعان قاراجاتى وتەلسە، جىبەرۋگە دايىن", - دەپ مالىمدەدى قر ءسىم رەسمي وكىلى ايبەك سمادياروۆ.
سونىمەن قاتار بۇل ماسەلە ۆەتنامداعى ەلشىلىكتىڭ ەرەكشە باقىلاۋىنا الىنعانى بەلگىلى بولدى.
"سىرتقى ىستەر مينيسترلىگى جانە قر ۆەتنامداعى ەلشىلىگى وتانداسىمىزدىڭ ەلگە ورالۋىنا قاجەتتى كومەك كورسەتەدى. قازاقستان ءسىم ازاماتتارىنان شەتەلدە جۇمىس ىستەۋ ءۇشىن قۇجاتتار مەن كەلىسىمشارتتارعا قول قويۋعا دەيىن جانە شەتەلگە شىققانعا دەيىن ولاردى مۇقيات زەردەلەۋدى، سونداي-اق كۇتپەگەن جاعدايلاردىڭ تۋىنداۋىن بولدىرماۋ ءۇشىن جۇمىس بەرۋشىلەردى تەكسەرۋدى سۇرايدى", - دەپ حابارلايدى ءسىم-ءنىڭ ءباسپاسوز قىزمەتى.
ايتا كەتەيىك، انەل بەرماعانبەتوۆا 2021 جىلدىڭ ءساۋىر ايىندا جارىققا شىققان "وفيس زا چەرتوي" فيلمىندە باستى ءرولدى سومداعان.
"ادىرنا" ۇلتتىق پورتالى
