اتىراۋدا كوپبالالى وتباسىنان شىققان بالاعا ءوزىنىڭ ولشەمىنەن بىرنەشە ەسە ۇلكەن مەكتەپ فورماسىن بەرگەن. كيىمنىڭ كەڭدىگى سونشا، ونى قىسقارتىپ تىگىپ بەرۋ ءۇشىن تىگىنشى 30 مىڭ تەڭگە سۇراعان، دەپ جازادى "ادىرنا" ۇلتتىق پورتالى.
"اق جايىق" باسىلىمىنىڭ حابارلاۋىنشا، وقۋ جىلىنىڭ باستالۋىنا نەبارى جارتى اي قالعاندا كوپبالالى انالار بالالارىن مەكتەپكە قالاي دايىندايمىن دەپ مازاسى كەتىپ ءجۇر. ۆەنەرا نۇرمولديدانىڭ التى بالاسىنىڭ ەكەۋى مەكتەپكە بارادى. وقۋشىلاردىڭ كەرەك-جاراعىن جيناپ بەرۋ وڭاي ەمەس، سەبەبى بىلتىرعى جىلمەن سالىستىرعاندا كيىم دە، اياق كيىم دە بىرنەشە ەسە قىمباتتاپ كەتكەن. سوندىقتان ول ۇكىمەتتىڭ كومەگىن الۋ ءۇشىن قاجەتتى قۇجات جيناعان.
- ماعان بىلتىردان قالعان كيىم بار دەدى. مەن ەڭ بولماسا تىگىنشىگە اپارىپ، قىسقارتامىن دەگەن ويمەن الدىم. سويتسەم، ول تىم ۇلكەن بولدى - كيىمدى قايتا تىگىپ بەرۋگە 30 مىڭ تەڭگە سۇرادى. بىرىنشى سىنىپ وقۋشىسىنا 10-سىنىپتىڭ بالاسى كيەتىن كيىم بەرگەنى ماسقارا عوي، - دەيدى ۆەنەرا.
ول شاعىمىن ايتىپ اكىمدىككە بارعان. ءبىلىم بەرۋ باسقارماسى باسشىسىنىڭ مىندەتىن اتقارۋشى ايناگۇل دۇيسەكەنوۆا ونىڭ ماسەلەسى وقۋ جىلى باستالعانشا شەشىلەدى دەپ ۋادە بەردى.
- بۇل وتباسىعا كيىمدى بايقاۋدى ۇتىپ العان مەردىگەر مەكەمە قىزمەتكەرلەرى بەرگەن. قازىر جاعدايدى انىقتاپ جاتىرمىز. الداعى ۋاقىتتا مۇنداي ماسەلە تۋىندامايدى. بۇل جاعداي اتا-انا وتكەن جىلعى قاجەتتى ولشەمى قالماعان مەكتەپ فورماسىن العاندىقتان بولدى. فورماسىن اۋىستىرىپ بەرەمىز، - دەيدى ا.دۇيسەكەنوۆا.
ونىڭ ايتۋىنشا، بۇرىن از قامتىلعان وتباسىلاردىڭ بالالارىنا دايىن مەكتەپ فورماسى تاراتىلعان، زاڭداعى سوڭعى وزگەرىسكە سايكەس ول كومەك ەندى اقشالاي بەرىلمەك. ۇكىمەت اقشالاي كومەكتىڭ مولشەرىن بىر بالاعا 37 مىڭ تەڭگەدەن بەكىتتى. بيىل بۇل كومەكتى وبلىستاعى 9645 وقۋشى الادى. اتا-انا العان كيىمنىڭ قۇجاتىن، ياعني چەكتى ءبىلىم بەرۋ ۇيىمدارىنا تاپسىرۋعا مىندەتتى.
وبلىستىق ءبىلىم بەرۋ باسقارماسىنىڭ باسپاسوز قىزمەتى بۇل جاعدايعا قاتىستى مىنانداي تۇسىنىكتەمە بەردى:
«جاڭا وقۋ جىلى قارساڭىندا №21 ورتا مەكتەپتىڭ ەكى وقۋشىسىنىڭ اناسى ۆەنەرا نۇرمولدينا «مەكتەپكە جول» اكتسياسى اياسىندا ەكى ۇلىنا مەكتەپ فورماسىن بولۋگە ءوتىنىش بەردى. وسى مەكتەپتىڭ الەۋمەتتىك پەداگوگى ءتيىستى ولشەمدەگى كيىم ۇلگىسىنىڭ بولماۋىنا بايلانىستى ماتەريالدىق كومەكتى كۇتە تۇرۋدى ۇسىندى. الايدا، ۆەنەرا نۇرمولدينا مەكتەپ فورماسىنىڭ ولشەمى ءدال كەلمەسە دە الىپ كەتە الامىز دەپ قولحات جازىپ بەرگەن. ءبىلىم بولىمىنە №21 ورتا مەكتەپ ديرەكتورىنان «مەكتەپكە جول» قايىرىمدىلىق اكتسياسى بويىنشا اتا-انالارعا ءتۇسىندىرۋ جۇمىستارى جۇرگىزىلىپ جاتقانى تۋرالى حابارلاما تۇستى».
بيلىكتەگىلەر مەكتەپ فورماسىنىڭ ماسەلەسىن تۇبەگەيلى شەشۋ ۇشىن كومەككە قايىرىمدىلىق قورلارى مەن كاسىپكەرلەردى دە تارتپاق، دەپ قوسىمشا حابارلادى وبلىستىق ءبىلىم بەرۋ باسقارماسى.
"ادىرنا" ۇلتتىق پورتالى
