"تاڭەرتەڭ بوساتىلدى" دەدى قوستانايداعى ۋك-161/2 مەكەمەسىنىڭ كەزەكشىسى ازاتتىققا.
اقپاراتتى ادام قۇقىعىن قورعاۋ بيۋروسىنىڭ زاڭگەرى گۇلميرا قۋاتبەك تە راستادى. تۇرمە الدىنان وتەگەنوۆتى بەلسەندىلەر قارسى العان.
قۇرمانعازى وتەگەنوۆ 2006 جىلعى 14 شىلدەدە الماتىنىڭ شەتىندەگى شاڭىراق ەلدىمەكەنىندە بولعان وقيعاعا قاتىسقانى ءۇشىن سوتتالعان. شاڭىراقتا سوت "زاڭسىز سالىنعان" دەپ تانىعان باسپانالارىن سۇرۋگە كەلگەن بيلىك وكىلدەرىنە جەرگىلىكتى تۇرعىندار قارسىلىق كورسەتىپ، قاقتىعىس سالدارىنان پوليتسيا قىزمەتكەرى قازا بولعان. وسى وقيعادان كەيىن ءتورت ادام ۇزاق مەرزىمگە سوتتالعان. ولاردىڭ ەكەۋى 2020 جىلى مەرزىمىنەن بۇرىن شارتتى بوستاندىققا شىقتى.
"شاڭىراق ءىسى" بويىنشا 18 جىلعا سوتتالىپ، 15 جىلىن تۇرمەدە وتكىزگەن، بىلتىر كۇزدە دەنساۋلىعىنا بايلانىستى بوساتىلعان ديسسيدەنت، اقىن ارون اتابەك تۇرمەدەن شىققاننان كەيىن كوپ ۇزاماي اۋرۋحانادا قايتىس بولعان. حالىقارالىق قۇقىق قورعاۋ ۇيىمدارى مەن جەرگىلىكتى بەلسەندىلەر ونىڭ ولىمىنە بيلىكتى كىنالاپ، تۇسىنىكتەمە بەرۋدى تالاپ ەتتى. حالىقارالىق دارەجەدە تەرگەۋ جۇرگىزۋ قاجەتتىگىن دە العا تارتتى. ال بەلسەندىلەر "شاڭىراق ءىسىنىڭ" قايتا قارالۋىن تالاپ ەتتى.
سوت ۇكىمى بويىنشا 16 جىلعا باس ەركىندىگىنەن ايىرىلعان قۇرمانعازى وتەگەنوۆتىڭ جازا مەرزىمىنە 2013 جىلى تۇرمە اكىمشىلىگىنىڭ "زاڭدى تالابىنا باعىنباعانى" ءۇشىن تاعى ەكى جارىم جىل قوسىلعان ەدى.
"ادىرنا" ۇلتتىق پورتالى
